Jubilees 39

The Ethiopic Bible (Ge'ez)

¹ ወኀደረ፡ ያዕቆብ፡ በምድረ፡ ፍልሰተ፡ አቡሁ፡ ምድረ፡ ከናአን።

² እለ፡ ትዝምደ፡ ያዕቆብ።

³ ወሤሞ፡ ለዮሴፍ፡ ዲበ፡ ኵሉ፡ ቤቱ።

⁴ ወኀደገ፡ ግብጻዊ፡ ኵሎ፡ ቅድሜሁ፡ ለዮሴፍ፡ እስመ፡ ርእየ፡ ከመ፡ እግዚአብሔር፡ ምስሌሁ፡ ወኵሎ፡ ዘገብረ፡ እግዚአብሔር፡ ይሴርሖ።

⁵ ወዮሴፍሰ፡ ሠናይ፡ ራእዩ፡ ወላሕይ፡ ጥቀ፡ ራእዩ።

⁶ ወኢመጠወ፡ ነፍሶ።

⁷ ወተዘከረ፡ ዮሴፍ፡ ዘንተ፡ ንባበ፡ ወኢፈቀደ፡ ይስክብ፡ ምስሌሃ።

⁸ ወአስተብቍዐቶ፡ ዓመተ፡ አሐተ፡ ወካልአ፡ ወአበያ፡ ሰሚዐ።

⁹ ወለጠቀቶ፡ ወአኀዘቶ፡ በቤት፡ ከመ፡ ትትባአሶ፡ ይስክብ፡ ምስሌሃ።

¹⁰ ወርእየት፡ ይእቲ፡ ብእሲት፡ ከመ፡ ኢይሰክብ፡ ምስሌሃ፡ ወጠቀለቶ፡ ቅድመ፡ እግዚኡ፡ እንዘ፡ ትብል፡ ኪያየ፡ ፈቀደ፡ ገብርከ፡ ዕብራዊ፡ ዘታፈቅር፡ ይትዐገለኒ፡ ከመ፡ ይስክብ፡ ምስሌየ።

¹¹ ወርእየ፡ ግብጻዊ፡ ልብሰ፡ ዮሴፍ፡ ወማዕፆ፡ ስቡረ።

¹² ወሀሎ፡ ህየ፡ ውስተ፡ ሞቅሕ።

¹³ ወኀደገ፡ ኵሎ፡ ቅድሜሁ፡ ወአልቦ፡ ሊቀ፡ ዐቀብተ፡ ሞቅሕ፡ ዘያአምር፡ ምስሌሁ፡ ምንተኒ፡ እስመ፡ ዮሴፍ፡ ኵሎ፡ ይገብር፡ ወእግዚአብሔር፡ ይፌጽም፡ ወነበረ፡ ህየ፡ ክልኤተ፡ ዓመተ።

¹⁴ ወበውእቱ፡ መዋዕል፡ ተምዕዐ፡ ፈርዖን፡ ንጉሠ፡ ግብጽ፡ ላዕለ፡ ክልኤቱ፡ ኅጽዋኒሁ፡ ላዕለ፡ ሊቀ፡ መዘርት፡ ወላዕለ፡ ሊቀ፡ ኀበዝት፡ ወወደዮሙ፡ ውስተ፡ ሞቅሕ፡ ውስተ፡ ቤቱ፡ ለሊቀ፡ መበስላን፡ ውስተ፡ ሞቅሕ፡ ኀበ፡ ሀሎ፡ ዮሴፍ፡ እኁዝ፡ ህየ።

¹⁵ ወሠርዖ፡ ለዮሴፍ፡ ሊቀ፡ ዐቀብተ፡ ሞቅሕ፡ ከመ፡ ይትለአኮሙ፡ ወይትለአክ፡ በቅድሜሁ።

¹⁶ ወሐለሙ፡ ክልኤሆሙ፡ ሕልመ፡ ሊቀ፡ መዘርት፡ ወሊቀ፡ ሐበዝት፡ ወነገርዎ፡ ለዮሴፍ።

¹⁷ ወበከመ፡ ፈከረ፡ ሎሙ፡ ከማሁ፡ ኮኖሙ።

¹⁸ ወረስዖ፡ ሊቀ፡ መዘርት፡ ለዮሴፍ፡ በቤተ፡ ሞቅሕ፡ እስመ፡ አይድዖ፡ ዘይከውኖ፡ ወኢተዘከረ፡ ከመ፡ ያይድዕ፡ ለፈርዖን፡ ዘከመ፡ ነገሮ፡ ዮሴፍ፡ እስመ፡ ረስዐ።