Jubilees 50

The Ethiopic Bible (Ge'ez)

¹ ወእምድኅረዝ፡ ሕግ፡ አይዳዕኩከ፡ መዋዕለ፡ ሰንበታት፡ በገዳመ፡ ሲና፡ እንተ፡ ይእቲ፡ ማእከለ፡ ኤሊም፡ ወሲና።

² ወሰንበታተ፡ ምድርኒ፡ ነገርኩከ፡ በደብረ፡ ሲና፡ ወዓመታተ፡ ኢዮቤሌዎኒ፡ ውስተ፡ ሰንበታተ፡ ዓመታት፡ ወዓመቶሰ፡ ኢነገርናከ፡ እስከ፡ አመ፡ ትበውኡ፡ ውስተ፡ ምድር፡ እንተ፡ ትእኅዙ።

³ ወታሰነብት፡ ምድርኒ፡ ሰንበታቲሃ፡ በነቢሮቶሙ፡ ዲቤሃ፡ ወዓመቶ፡ ለኢዮቤል፡ ያእምሩ።

⁴ በእንተዝ፡ ሠራዕኩ፡ ለከ፡ ሱባዔ፡ ዓመታት፡ ወኢዮቤሌዎታተ፡ አርብዓ፡ ወተስዐቱ፡ ኢዮቤሌዎታት፡ እምነ፡ መዋዕሊሁ፡ ለአዳም፡ እስከ፡ ዛቲ፡ ዕለት፡ ወሱባዔ፡ አሐዱ፡ ወክልኤ፡ ዓመታት፡ ወዓዲ፡ አርብዓ፡ ዓመት፡ ርሑቅ፡ ለአእምሮ፡ ትእዛዛተ፡ እግዚአብሔር፡ እስከ፡ አመ፡ ያዐድው፡ ማዕዶተ፡ ምድረ፡ ከናአን፡ ዐዲዎሙ፡ ዮርዳኖስ፡ ገጸ፡ ዐረቢሁ።

⁵ ወኢዮቤሌዎታት፡ የኀልፉ፡ እስከ፡ አመ፡ ይነጽሕ፡ እስራኤል፡ እምኵሉ፡ አበሳ፡ ዝሙት፡ ወርኵስ፡ ወግማኔ፡ ወኀጢአት፡ ወጌጋይ፡ ወየኀድር፡ ውስተ፡ ኵሉ፡ ምድር፡ እንዘ፡ ይትአመን፡ ወአልቦ፡ እንከ፡ ሎቱ፡ መነሂ፡ ሰይጣነ፡ ወአልቦ፡ መነሂ፡ እኩየ፡ ወትነጽሕ፡ ምድር፡ እምውእቱ፡ ጊዜ፡ እስከ፡ ኵሉ፡ መዋዕል።

⁶ ወናሁ፡ ትእዛዘ፡ ሰንበታትኒ፡ ጸሐፍኩ፡ ለከ፡ ወኵሉ፡ ፍትሐተ፡ ሕገጊሁ።

⁷ ሰዱሰ፡ ዕለተ፡ ትገብር፡ ግብረ፡ ወአመ፡ ሳብዕት፡ ዕለት፡ ሰንበት፡ ዘእግዚአብሔር፡ አምላክክሙ፡ ኢትግበሩ፡ ባቲ፡ ኵሎ፡ ግብረ፡ አንትሙ፡ ወውሉድክሙ፡ ወአግብርቲክሙ፡ ወአእማቲክሙ፡ ወኵሉ፡ እንስሳክሙ፡ ወነኪርኒ፡ ዘኀቤክሙ።

⁸ ወሰብእ፡ ዘይገብር፡ ምንተሂ፡ ግብረ፡ ባቲ፡ ይሙት፡ ኵሉ፡ ብእሲ፡ ዘይጌምና፡ ለዛ፡ ዕለት፡ ዘይሰክብ፡ ምስለ፡ ብእሲት፡ ወዘሂ፡ ይትናገር፡ ነገረ፡ ምግባር፡ ባቲ፡ ከመ፡ ይግበር፡ ባቲ፡ ገዪሶ፡ ወበእንተኒ፡ ኵሉ፡ ሠዪጥ፡ ወተሣይጦ፡ ወዘሂ፡ ማየ፡ ይቀድሕ፡ ባቲ፡ ዘኢያስተዳለወ፡ ሎቱ፡ በዕለተ፡ ሳድስት፡ ወዘኒ፡ አንሥአ፡ ዘይጸውር፡ ኵሎ፡ ከመ፡ ያውፅእ፡ እምደብተራሁ፡ ወእመኒ፡ እምቤቱ፡ ይሙት።

⁹ ኢትግበሩ፡ ሰንበት፡ ምንተሂ፡ ግብረ፡ ዘኢያስተዳለውክምዎ፡ ለክሙ፡ በዕለተ፡ ሳድስት፡ ለበሊዕ፡ ወለሰቲይ፡ ወለአዕርፎ፡ ወለአሰንብቶ፡ እምኵሉ፡ ግብር፡ በዛቲ፡ ዕለት፡ ወለባርኮ፡ እግዚአብሔር፡ አምላክክሙ።

¹⁰ እስመ፡ ዐባይ፡ ክብር፡ እንተ፡ ወሀበ፡ እግዚአብሔር፡ ለእስራኤል፡ ለበሊዕ፡ ወለሰቲይ፡ ወለጸጊብ፡ በዛቲ፡ ዕለተ፡ በዓል፡ ወለአዕርፎ፡ ባቲ፡ እምኵሉ፡ ግብር፡ ዘእምግብረ፡ እጓለ፡ እመሕያው፡ ዘእንበለ፡ ዐጢነ፡ ዕጣን፡ ወለአብኦ፡ ቍርባን፡ ወመሥዋዕት፡ ቅድመ፡ እግዚአብሔር፡ ለመዋዕል፡ ወለሰንበታት።

¹¹ ዝግብር፡ ባሕቲቱ፡ ይትገበር፡ በመዋዕለ፡ ሰንበታት፡ በቤተ፡ መቅደሱ፡ ለእግዚአብሔር፡ አምላክክሙ፡ ከመ፡ ያስተስርዩ፡ ዲበ፡ እስራኤል፡ መባአ፡ ወትረ፡ ዕለተ፡ እምዕለት፡ ለተዝካር፡ ዘይሠጠው፡ ቅድመ፡ እግዚአብሔር፡ ወይትወከፎሙ፡ ለዓለም፡ ዕለተ፡ እምዕለት፡ በከመ፡ ተአዘዝከ።

¹² ወኵሉ፡ ሰብእ፡ ዘይገብር፡ ግብረ፡ ወዘሂ፡ የሐውር፡ መንገደ፡ ወዘሂ፡ ይትቀነይ፡ ወፍረ፡ ወእመሂ፡ በቤቱ፡ ወእመሂ፡ በኵሉ፡ መካን።

¹³ ወሰብእ፡ ዘይገብር፡ ኵሎ፡ ዘእምዝ፡ በዕለተ፡ ሰንበት፡ ይሙት።