Jubilees 49

The Ethiopic Bible (Ge'ez)

¹ ተዘከር፡ ትእዛዘ፡ ዘአዘዘከ፡ እግዚአብሔር፡ በእንተ፡ ፋሲካ፡ ከመ፡ ትግበር፡ በጊዜሁ፡ አመ፡ ዐሡር፡ ወረቡዑ፡ ለወርኅ፡ ቀዳማዊ፡ ከመ፡ ትጥብሖ፡ ዘእንበለ፡ ይምሰይ፡ ወከመ፡ ይብልዕዎ፡ በሌሊት፡ አመ፡ ምሴት፡ ዘዐሡር፡ ወኀሙስ፡ እምጊዜ፡ ዕርበተ፡ ፀሐይ።

² እስመ፡ በዛቲ፡ ሌሊት፡ ቀዳሜ፡ በዓል፡ ይእቲ፡ ወቀዳሜ፡ ፍሥሐ፡ ይእቲ፡ አንትሙ፡ ትነብሩ፡ ትብልዑ፡ ጳስካ፡ በግብጽ።

³ ወዛቲ፡ ዘወሀበ፡ እግዚአብሔር፡ ሎሙ፡ ውስተ፡ ኵሉ፡ ቤት፡ ዘርእዩ፡ ውስተ፡ አንቀጹ፡ ደመ፡ በግዕ፡ ዘዓመት፡ ኢይባኡ፡ ውስተ፡ ቤቱ፡ ለቀቲል፡ አላ፡ ይትዓደዉ፡ ከመ፡ ይድኀኑ፡ ኵሎሙ፡ እለ፡ ውስተ፡ ቤት፡ እስመ፡ ትእምርተ፡ ደም፡ ውስተ፡ አንቀጹ።

⁴ ወገብሩ፡ ኀይላቲሁ፡ ለእግዚአብሔር፡ ኵሎ፡ ዘመጠነ፡ አዘዞሙ፡ እግዚአብሔር፡ ወተዐደዉ፡ እምኵሉ፡ ደቂቀ፡ እስራኤል፡ ወኢቦአ፡ ላዕሌሆሙ፡ መቅሠፍት፡ ለአማስኖ፡ እምኔሆሙ፡ ኵሎ፡ ነፍሰ፡ እምእንስሳ፡ እስከ፡ ሰብእ፡ ወእስከ፡ ከልብ።

⁵ ወኮነ፡ መቅሠፍት፡ በግብጽ፡ ጥቀ፡ ዐቢይ፡ ወአልቦ፡ ቤተ፡ በግብጽ፡ ዘአልቦ፡ በድነ፡ ውስቴታ፡ ወብካየ፡ ወዐውያተ።

⁶ ወኵሉ፡ እስራኤል፡ ይነብር፡ እንዘ፡ ይበልዕ፡ ሥጋ፡ ጳስካ፡ ወእንዘ፡ ይሰቲ፡ ወይነ፡ ወይሴብሕ፡ ወይባርክ፡ ወያአኵት፡ እግዚአብሔር፡ አምላከ፡ አበዊሁ፡ ወድልወ፡ ይከውን፡ ለወፂእ፡ እምአርዑተ፡ ግብጽ፡ ወእምቅኔ፡ እኪት።

⁷ ወአንተኒ፡ ተዘከር፡ ዛተ፡ ዕለተ፡ ኵሎ፡ መዋዕለ፡ ሕይወትከ፡ ወግበራ፡ እምዓም፡ ለዓም፡ ኵሎ፡ መዋዕለ፡ ሕይወትከ፡ ምዕረ፡ ለዓመት፡ በዕለቱ፡ በከመ፡ ኵሉ፡ ሕጉ፡ ወኢታስተኃልፍ፡ ዕለተ፡ እምዕለት፡ ወእምወርኅ፡ ለወርኅ።

⁸ እስመ፡ ሥርዐት፡ ዘለዓለም፡ ውእቱ፡ ወቍሩጽ፡ ውስተ፡ ጽላተ፡ ሰማይ፡ ላዕለ፡ ውሉደ፡ እስራኤል፡ ከመ፡ ይግበርዎ፡ በኵሉ፡ ዓመት፡ ወዓመት፡ በዕለቱ፡ ምዕረ፡ በዓመት፡ ውስተ፡ ኵሉ፡ ትውልዶሙ፡ ወአልቦ፡ ወሰነ፡ መዋዕል፡ እስመ፡ ለዓለም፡ ውእቱ፡ ሥሩዕ።

⁹ ወብእሲ፡ እንዘ፡ ንጹሕ፡ ውእቱ፡ ወኢመጽአ፡ ይግበሮ፡ በጊዜ፡ ዕለቱ፡ ለአብኦ፡ ቍርባን፡ ዘይሠምር፡ ቅድመ፡ እግዚአብሔር፡ ወለበሊዕ፡ ወለሰቲይ፡ በቅድመ፡ እግዚአብሔር፡ በዕለተ፡ በዓሉ፡ ወይሠረዉ፡ ውእቱ፡ ብእሲ፡ ዘንጹሕ፡ ወቅሩብ፡ እስመ፡ ቍርባነ፡ እግዚአብሔር፡ ኢያብአ፡ በጊዜሁ፡ ወኀጢአተ፡ ይነሥእ፡ ውእቱ፡ ብእሲ፡ ለርእሱ።

¹⁰ ከመ፡ ይኩኑ፡ ውሉደ፡ እስራኤል፡ እለ፡ ይመጽኡ፡ ወይገብሩ፡ ጰስከ፡ በዕለተ፡ ጊዜሁ፡ አመ፡ ዐሡሩ፡ ወረቡዑ፡ ለወርኅ፡ ቀዳማዊ፡ በማእከለ፡ ምስያታት፡ እምሣልስታ፡ ለዕለት፡ እስከ፡ ሣልስታ፡ ለሌሊት፡ እስመ፡ ክልኤ፡ መክፈልታ፡ ለዕለት፡ ተውህበ፡ ለብርሃን፡ ወሣልስታ፡ ለምሴት።

¹¹ ዝውእቱ፡ ዘአዘዘከ፡ እግዚአብሔር፡ ከመ፡ ትግበሮ፡ በማእከለ፡ ምሴታት።

¹² ወኢይከውን፡ ጠቢሖቱ፡ በኵሉ፡ ጊዜ፡ ብርሃን፡ ዘእንበለ፡ ጊዜ፡ ወሰነ፡ ምሴት፡ ወይበልዕዎ፡ በጊዜ፡ ምሴት፡ እስከ፡ ሣልስተ፡ ሌሊት፡ ወዘተርፈ፡ እምኵሉ፡ ሥጋሁ፡ እምሣልስተ፡ ሌሊት፡ ወከሐ፡ በእሳት፡ ያውዕይዎ።

¹³ ወኢይከውን፡ ያብስልዎ፡ በማይ፡ ወኢይብልዕዎ፡ ጥራየ፡ አላ፡ ጥቡሰ፡ በእሳት፡ ብሱለ፡ በእሳት፡ በአስተሐምሞ፡ ርእስ፡ ምስለ፡ ንዋየ፡ ውስጡ፡ ወምስለ፡ እገሪሁ።

¹⁴ በእንተዝ፡ አዘዞሙ፡ እግዚአብሔር፡ ለውሉደ፡ እስራኤል፡ ከመ፡ ይግበሩ፡ ጳስካ፡ በዕለተ፡ ጊዜሁ።

¹⁵ ወአንተሂ፡ አዝዞሙ፡ ለውሉደ፡ እስራኤል፡ ከመ፡ ይግበሩ፡ ጳስካ፡ በመዋዕሊሆሙ፡ በኵሉ፡ ዓመት፡ ምዕረ፡ ለዓመት፡ በዕለተ፡ ጊዜሁ፡ ወይመጽእ፡ ተዝካር፡ እምቅድመ፡ እግዚአብሔር፡ ዘይሠምር፡ ወኢይመጽኦሙ፡ መቅሠፍት፡ ለቀቲል፡ ወለማኅፀት፡ በውእቱ፡ ዓመት፡ አመ፡ ገብሩ፡ ጳስካ፡ በጊዜሁ፡ በኵሉ፡ በከመ፡ ተአዘዘ።

¹⁶ ወኢይከውን፡ እንከ፡ ለበሊዖቱ፡ በአፍአ፡ እምቤተ፡ መቅደሱ፡ ለእግዚአብሔር፡ ወበአንጸረ፡ ቤተ፡ መቅደሱ፡ ለእግዚአብሔር፡ ወኵሉ፡ ሕዝበ፡ ማኅበሮሙ፡ ለእስራኤል፡ ይግበርዎ፡ በጊዜሁ።

¹⁷ ኵሉ፡ ሰብእ፡ ዘመጽአ፡ በዕለቱ፡ ይብልዖ፡ በቤተ፡ መቅደሱ፡ ለአምላክክሙ፡ በቅድመ፡ እግዚአብሔር፡ ዘእምዕሥራ፡ ዓመት፡ ወላዕለ፡ እስመ፡ ከመዝ፡ ተጽሕፈ፡ ወተሠርዐ፡ ከመ፡ ይብልዕዎ፡ በቤተ፡ መቅደሱ፡ ለእግዚአብሔር።

¹⁸ ወእምከመ፡ ቦኡ፡ ውሉደ፡ እስራኤል፡ ውስተ፡ ምድር፡ እንተ፡ ይእኅዙ፡ ውስተ፡ ምድረ፡ ከናአን፡ ወይተክሉ፡ ደብተራ፡ እግዚአብሔር፡ ማእከለ፡ ምድር፡ ውስተ፡ አሐዱ፡ እምነ፡ ሠራዊቶሙ፡ እስከ፡ አመ፡ ይትሐነጽ፡ መቅደሱ፡ ለእግዚአብሔር፡ በዲበ፡ ምድር።

¹⁹ ወበመዋዕል፡ አመ፡ ተሐንጸ፡ ቤት፡ በስመ፡ እግዚአብሔር፡ በምድረ፡ ርስቶሙ፡ ህየ፡ ይሖሩ፡ ወይጥብሑ፡ ጳስካ፡ ምሴተ፡ እንዘ፡ የዐርብ፡ ፀሐይ፡ በትሥልስታ፡ ለዕለት።

²⁰ ወያዐርጉ፡ ደሞ፡ ውስተ፡ ምክያዳ፡ ለምሥዋዕ፡ ወሥብሐ፡ ያንብሩ፡ ዲበ፡ እሳት፡ ዘላዕለ፡ ምሥዋዕ፡ ወሥጋሁ፡ ይብልዑ፡ ጥቡሰ፡ በእሳት፡ በውስተ፡ ዐጸደ፡ ቤተ፡ መቅደስ፡ በስመ፡ እግዚአብሔር።

²¹ ወኢይክሉ፡ ገቢረ፡ ጳስካ፡ በአህጉሪሆሙ፡ ወበኵሉ፡ በሓውርት፡ ዘእንበለ፡ በቅድመ፡ ደብተራ፡ እግዚአብሔር፡ ወእመ፡ አኮ፡ በቅድመ፡ ቤት፡ ኀበ፡ ኀደረ፡ ስመ፡ ዚአሁ፡ ወስቴቱ፡ ወኢይስሕቱ፡ ድኅረ፡ እግዚአብሔር።

²² ወአንተኒ፡ ሙሴ፡ አዝዞሙ፡ ለውሉደ፡ እስራኤል፡ ወይዕቀቡ፡ ሥርዐተ፡ ጳስካ፡ በከመ፡ ተአዘዘ፡ ለከ፡ ከመ፡ ትንግሮሙ፡ ዓመቶ፡ ለለ፡ ዓመት፡ ወዕለቶ፡ ለዕለታት፡ ወበዓለ፡ ናእት፡ ከመ፡ ይብልዑ፡ ናእተ፡ ሰቡዐ፡ ዕለተ፡ ከመ፡ ይግበሩ፡ በዓሎ፡ ከመ፡ ያብኡ፡ ቍርባኖ፡ ዕለተ፡ እምዕለት፡ በእላ፡ ሰቡዕ፡ መዋዕለ፡ ፍሥሐ፡ ቅድመ፡ እግዚአብሔር፡ ዲበ፡ ምሥዋዐ፡ አምላክክሙ።

²³ እስመ፡ ዛተ፡ በዓለ፡ በውልዋሌ፡ ገበርክምዋ፡ አመ፡ ትወፅኡ፡ እምግብጽ፡ እስከ፡ አመ፡ ተዐድዉ፡ ባሕረ፡ ውስተ፡ ገዳመ፡ ሱር፡ እስመ፡ በኀበ፡ ድንጋገ፡ ባሕር፡ ሰለጥክምዋ።