Jubilees 8

The Ethiopic Bible (Ge'ez)

¹ ወበዕሥራ፡ ወተስዐቱ፡ ኢዮቤልዉ፡ በሱባዐዔ፡ ቀዳሚ፡ በቀዳሚሁ፡ ነሥአ፡ ሎቱ፡ አርፋክስድ፡ ብእሲተ፡ ወስማ፡ ራሱእያ፡ ወለተ፡ ሱሰን፡ ወለተ፡ ኤላም፡ ሎቱ፡ ብእሲተ፡ ወወለደት፡ ሎቱ፡ ወልደ፡ በዓመት፡ ሣልስ፡ ዘሱባዔ፡ ዝንቱ፡ ወጸውዐ፡ ስሞ፡ ቃይናም።

² ወልህቀ፡ ወልድ፡ ወመሀሮ፡ አቡሁ፡ መጽሐፈ፡ ወሖረ፡ ይኅሥሥ፡ ሎቱ፡ መካነ፡ ኀበ፡ ይእኅዝ፡ ሎቱ፡ ሀገረ።

³ ወረከበ፡ መጽሐፈ፡ ዘቈረፁ፡ ቀደምት፡ ውስተ፡ ኰኩሕ፡ ወአንበበ፡ ዘውስቴታ፡ ወአዕለዋ፡ ወረስዐ፡ እምውስቴታ፡ ከመ፡ ሀሎ፡ ውስቴታ፡ ትምህርት፡ ዘትጉሃን፡ በዘ፡ ይሬእዩ፡ ሰገለ፡ ፀሓይ፡ ወወርኅ፡ ወከዋክብት፡ ወውስተ፡ ኵሉ፡ ተአምረ፡ ሰማይ።

⁴ ወጸሐፈ፡ ወኢነገረ፡ በእንቲአሃ፡ እስመ፡ ይፈርሆ፡ ለኖኅ፡ ነጊረ፡ በእንቲአሃ፡ ከመ፡ ኢይትመዓዕ፡ ላዕሌሁ፡ በእንቲአሃ።

⁵ ወአመ፡ ሠላሳ፡ ኢዮቤልዉ፡ በሱባዔ፡ ካልእ፡ በቀዳሚ፡ ዓመቱ፡ ነሥአ፡ ሎቱ፡ ብእሲተ፡ ወስማ፡ ሜልካ፡ ወለተ፡ አበዳይ፡ ወልደ፡ ያፌት።

⁶ ወበዓመት፡ ራብዕ፡ ተወልደ፡ ወልህቀ፡ ሳላ፡ ወነሥአ፡ ሎቱ፡ ብእሲተ፡ ወስማ፡ ሙአክ፡ ወለተ፡ ኬሴድ፡ እኅወ፡ አቡሁ፡ ሎቱ፡ ብእሲተ።

⁷ ወለደት፡ ሎቱ፡ ወልደ፡ በኃምስ፡ ዓመቱ፡ ወጸውዐ፡ ስሞ፡ ኤቤር።

⁸ ወበሳድስ፡ ዓመት፡ ወለደት፡ ሎቱ፡ ወልደ፡ ወጸውዐ፡ ስሞ፡ ፋሌክ።

⁹ ወተካፈሉ፡ በእኩይ፡ በበይናቲሆሙ፡ ወነገርዎ፡ ለኖኅ።

¹⁰ ወኮነ፡ በቀዳሚሁ፡ ለሠላሳ፡ ወሠለስቱ፡ ኢዮቤልዉ፡ ወከፈልዋ፡ ለምድር፡ ሠለስተ፡ መክፈልተ፡ ለሴም፡ ወለካም፡ ወለያፌት፡ በበ፡ ርስቱ።

¹¹ ወጸውዐ፡ ደቂቆ፡ ወቀርቡ፡ ኀቤሁ፡ እሙንቱ፡ ወውሉዶሙ፡ ወከፈለ፡ ምድረ፡ በዑፃዌ፡ ዘይእኅዙ፡ ሠለስቲሆሙ፡ ውሉዱ።

¹² ወወፅአ፡ በመጽሐፍ፡ ዕፃሁ፡ ለሴም፡ ማእከለ፡ ምድር፡ ዘይእኅዝ፡ ለርስቱ፡ ወለውሉዱ፡ ለትውልድ፡ ዘለዓለም።

¹³ ወየሐውር፡ እስከ፡ ሶበ፡ ይቀርብ፡ ካራስ፡ ዝውእቱ፡ ውስተ፡ ሕፅነ፡ ልሳን፡ እንተ፡ ትኔጽር፡ መንገለ፡ ሰሜን።

¹⁴ ወየሐውር፡ መክፈልቱ፡ እንተ፡ መንገለ፡ ባሕር፡ ዐቢይ፡ ወየሐውር፡ ርቱዐ፡ እስከ፡ ይቀርብ፡ መንገለ፡ ዐረቢሃ፡ ለልሳን፡ እንተ፡ ትኔጽር፡ መንገለ፡ ሰሜን።

¹⁵ ወትገምጽ፡ እምህየ፡ መንገለ፡ ሰሜን፡ መንገለ፡ አፉሃ፡ ለባሕር፡ ዐቢይ፡ ውስተ፡ ከናፍረ፡ ማያት።

¹⁶ ወተሐውር፡ መንገለ፡ ጽባሕ፡ እስከ፡ ሶበ፡ ይቀርብ፡ ኀበ፡ ገነተ፡ ኤዶም፡ መንገለ፡ ሰሜኑ፡ ለሰሜን።

¹⁷ ዛቲ፡ መክፈልት፡ ወፅአት፡ በዕፁ፡ ለሴም፡ ወለውሉዱ፡ ለእኂዞታ፡ ለዓለም፡ ለትውልዱ፡ እስከ፡ ለዓለም።

¹⁸ ወተፈሥሐ፡ ኖኅ፡ እስመ፡ ወፅአ፡ ዝንቱ፡ መክፈልት፡ ለሴም፡ ወለውሉዱ።

¹⁹ ወአእመረ፡ ከመ፡ ገነተ፡ ኤዶም፡ ቅድስተ፡ ቅዱሳን፡ ወማኅደሩ፡ ለእግዚአብሔር፡ ውእቱ፡ ወደብረ፡ ሲና፡ ማእከላ፡ ለገዳም፡ ወደብረ፡ ጽዮን፡ ማእከለ፡ ሕንብርታ፡ ለምድር።

²⁰ ወባረኮ፡ ለአምላከ፡ አማልክት፡ ዘወደየ፡ ውስተ፡ አፉሁ፡ ንባበ፡ እግዚአብሔር፡ ወእግዚአብሔር፡ እስከ፡ ለዓለም።

²¹ ወአእመረ፡ ከመ፡ መክፈልተ፡ በረከት፡ ወቡሩክ፡ በጽሐ፡ ለሴም፡ ወለውሉዱ፡ ለትውልድ፡ ዘለዓለም፡ ኵላ፡ ምድረ፡ ኤዶም፡ ወኵላ፡ ምድረ፡ ባሕረ፡ ኤርትራ፡ ወኵላ፡ ምድረ፡ ጽባሕ፡ ወእንደኬ፡ ወበኤርትራ፡ ወአድባሪሁ፡ ወኵላ፡ ምድረ፡ ባሳ፡ ወኵላ፡ ምድረ፡ ሊባኖስ፡ ወደሰያተ፡ ክብቱር።

²² ወለካም፡ ወፅአ፡ መክፈልት፡ ዘዳግም፡ መንገለ፡ ማዕዶተ፡ ግዮን፡ መንገለ፡ ሰሜን፡ በየማነ፡ ገነት፡ ወየሐውር፡ መንገለ፡ ሰሜን፡ ወየሐውር፡ ኵሎ፡ አድባረ፡ እሳት።

²³ ወይመጽእ፡ ውስተ፡ ደቡብ፡ ውስተ፡ ጽንፈ፡ ጋዲር፡ ወይመጽእ፡ ውስተ፡ ከንፈረ፡ ማየ፡ ባሕር፡ ውስተ፡ ማያተ፡ ባሕር፡ ዐቢይ፡ እስከ፡ ሶበ፡ ይቀርብ፡ ፈለገ፡ ግዮን፡ ወየሐውር፡ ግዮን፡ ፈለግ፡ እስከ፡ ሶበ፡ ይቀርብ፡ በየማነ፡ ገነተ፡ ኤዶም።

²⁴ ወዛቲ፡ ምድር፡ እንተ፡ ወፅአት፡ ለካም፡ በመክፈልት፡ ዘይእኅዝ፡ ለዓለም፡ ሎቱ፡ ወለውሉዱ፡ ለትዝምዶሙ፡ እስከ፡ ለዓለም።

²⁵ ወለያፌት፡ ወፅአ፡ መክፈልት፡ ሣልስ፡ ማዕዶተ፡ ጢና፡ ፈለግ፡ መንገለ፡ ደቡባቲሁ፡ ለሙፃአ፡ ማያቲሁ፡ ወየሐውር፡ መንገለ፡ ጽባሕ፡ ደቡብ፡ ኵሎ፡ ደወለ፡ ጎግ፡ ወኵሎ፡ ጽባሓቲሆሙ።

²⁶ ወየሐውር፡ መንገለ፡ ደቡብ፡ ለደቡብ፡ ወየሐውር፡ መንገለ፡ አድባረ፡ ቄልጥ፡ መንገለ፡ ደቡብ፡ ወመንገለ፡ ባሕረ፡ ማኡቅ፡ ወይመጽእ፡ መንገለ፡ ጽባሑ፡ ለጋዲር፡ እስከ፡ መንገለ፡ እደ፡ ማየ፡ ባሕር።

²⁷ ወየሐውር፡ እስከ፡ ሶበ፡ ይቀርብ፡ መንገለ፡ ዐረበ፡ ፋራ።

²⁸ ወየሐውር፡ መንገለ፡ እደ፡ ጢና፡ ፈለግ፡ መንገለ፡ ጽባሐ፡ ደቡብ፡ እስከ፡ ሶበ፡ ይቀርብ፡ እስከ፡ ጽንፈ፡ ማያቲሁ፡ መንገለ፡ ደብረ፡ ራፋ፡ ወየአውዳ፡ ለደቡብ።

²⁹ ዛቲ፡ ምድር፡ እንተ፡ ወፅአት፡ ለያፌት፡ ወለውሉዱ፡ በመክፈልተ፡ ርስቱ፡ ዘይእኅዝ፡ ሎቱ፡ ወለውሉዱ፡ ለትዝምዶሙ፡ እስከ፡ ለዓለም።

³⁰ ወባሕቱ፡ ቍሩር፡ ይእቲ፡ ወምድረ፡ ካም፡ መርቄ፡ ይእቲ፡ ወምድረ፡ ሴምሰ፡ ኢመርቄ፡ ወኢደደክ፡ እስመ፡ ቱስሕት፡ ይእቲ፡ በቍር፡ ወበሞቅ።