Jubilees 9

The Ethiopic Bible (Ge'ez)

¹ ወከፈለ፡ ካም፡ ማእከለ፡ ውሉዱ፡ ወወፅአ፡ ቀዳሚ፡ መክፈልት፡ ለኵስ፡ መንገለ፡ ጽባሕ፡ ወዐረቢሁ፡ ለሜጽሬም፡ ወዐረቢሁ፡ ሎቱ፡ ለፉድ።

² ወሴምኒ፡ ከፈለ፡ ውእቱሂ፡ ማእከለ፡ ውሉዱ፡ ወወፅአ፡ መክፈልት፡ ቀዳሚ፡ ለኤላም፡ ወለውሉዱ፡ መንገለ፡ ጽባሑ፡ ለጢግሪስ፡ ፈለግ፡ እስከ፡ ሶበ፡ ይቀርብ፡ መንገለ፡ ጽባሐ፡ ኵላ፡ ምድረ፡ እንደኬ፡ ወበኤርትራ፡ በእዴሁ፡ ወማያተ፡ ዴዳን፡ ወኵሉ፡ አድባር፡ ዘምብሪ፡ ወኤላ፡ ወኵሉ፡ ምድረ፡ ሱሳን፡ ወኵሉ፡ ዘበእደ፡ ፈርናክ፡ እስከ፡ ባሕረ፡ ኤርትራ፡ ወእስከ፡ ጢና፡ ፈለግ።

³ ወለአሱርኒ፡ ወፅአ፡ መክፈልት፡ ካልእ፡ ኵላ፡ ምድረ፡ አሱር፡ ወነነዌ፡ ወሲናአር፡ ወሰክ፡ እስከ፡ ቅሩበ፡ እንደኬ፡ ወየዐርግ፡ ወደፋ፡ ፈለግ።

⁴ ወለአርፋክስድ፡ ወፅአ፡ መክፈልት፡ ሣልስ፡ ኵላ፡ ምድረ፡ ዘደወለ፡ ከላዴዎን፡ መንገለ፡ ጽባሑ፡ ለኤውፍራጢስ፡ ዘቅሩብ፡ ለባሕረ፡ ኤርትራ፡ ወኵሉ፡ ማያተ፡ ገዳም፡ እስከ፡ ቅሩብ፡ ውስተ፡ ልሳነ፡ ባሕር፡ እንተ፡ ትኔጽር፡ መንገለ፡ ግብጽ፡ ኵላ፡ ምድረ፡ ሊባኖስ፡ ወሳኒር፡ ወአማና፡ እስከ፡ ቅሩበ፡ ኤውፍራጢስ።

⁵ ወለአራም፡ ወፅአ፡ መክፈልት፡ ራብዕ፡ ኵላ፡ ምድረ፡ ሜስጴጦምያ፡ ማእከለ፡ ጢግሮስ፡ ወኤፍራጢስ፡ መንገለ፡ ደቡበ፡ ከለዳውያን፡ እስከ፡ ቅሩበ፡ ደብረ፡ አሱር፡ ወምድረ፡ አራራ።

⁶ ወለሉድ፡ ውፅአ፡ መክፈልት፡ ኃምስ፡ ደብረ፡ አሱር፡ ወኵሉ፡ ዘዚአሁ፡ እስከ፡ ይቀርብ፡ ባሕረ፡ ዐቢየ፡ ወይቀርብ፡ መንገለ፡ ጽባሕ፡ አሱር፡ እኁሁ።

⁷ ወያፌት፡ ውእቱሂ፡ ከፈለ፡ ምድረ፡ ለርስት፡ ማእከለ፡ ውሉዱ።

⁸ ወወፅአ፡ መክፈልት፡ ቀዳሚ፡ ለጎሜር፡ መንገለ፡ ጽባሕ፡ እምገጸ፡ ደቡብ፡ እስከ፡ ጢና፡ ፈለግ።

⁹ ወለማዳይ፡ ወፅአ፡ መክፈልት፡ ከመ፡ የአኃዝ፡ እምዐረብ፡ ለክልኤሆሙ፡ አኃዊሁ፡ እስከ፡ ደሰያት፡ ወእስከ፡ ጽነፊሆን፡ ለደሰያት።

¹⁰ ወለኢዮእዋን፡ ወፅአ፡ መክፈልት፡ ራብዕ፡ ኵሉ፡ ደሴት፡ ወደሰያት፡ ዘመንገለ፡ እደ፡ ሉድ።

¹¹ ወለቶቤልሂ፡ ወፅአ፡ መክፈልት፡ ኃምስ፡ ማእከለ፡ ልሳን፡ እንተ፡ ትቀርብ፡ መንገለ፡ እደ፡ መክፈልተ፡ ሉድ፡ እስከ፡ ልሳን፡ ካልእት፡ ወማዕዶታ፡ ለልሳን፡ ካልእት፡ ውስተ፡ ልሳን፡ ሣልስት።

¹² ወለስምክ፡ ወፅአ፡ መክፈልት፡ ሳድስ፡ ወኵሉ፡ ማዕዶተ፡ ልሳን፡ ዘሣልስት፡ እስከ፡ ይቀርብ፡ ጽባሒሁ፡ ለጋዲር።

¹³ ወለቲራስ፡ ወፅአ፡ መክፈልት፡ ሳብዕ፡ አርባዕቱ፡ ደሰያት፡ ዐበይት፡ በማእከለ፡ ባሕር፡ እለ፡ ይቀርባ፡ ለመክፈልተ፡ ካም።

¹⁴ ወከመዝ፡ ከፈሉ፡ ውሉደ፡ ኖኅ፡ ለደቂቆሙ፡ በቅድመ፡ ኖኅ፡ አቡሆሙ።

¹⁵ ወይቤሉ፡ ኵሎሙ፡ ለይኩን፡ ወለይኩን፡ ሎሙ፡ ወለውሉዶሙ፡ እስከ፡ ለዓለም፡ በትዝምዶሙ፡ እስከ፡ አመ፡ ዕለተ፡ ደይን፡ በዘ፡ ይኴንኖሙ፡ እግዚአብሔር፡ አምላክ፡ በሰይፍ፡ ወበእሳት፡ በእንተ፡ ኵሉ፡ እከይ፡ ዘርኵስ፡ ዘጌጋዮሙ፡ ዘመልእዋ፡ ለምድር፡ አበሳ፡ ወርኵሰ፡ ወዝሙተ፡ ወኃጢአተ።