Messale 10

The Ethiopic Bible (Ge'ez)

¹ ወልድ፡ ጠቢብ፡ ያስተፌሥሕ፡ አባሁ፡ ወወልድ፡ ዓብድ፡ ያኃዝና፡ ለእሙ።

² ኢይበቊዕ፡ መዛግብት፡ ለኃጥአን፡ ጽድቅሰ፡ ታድኅን፡ እሞት።

³ ኢያስተፄንስ፡ እግዚአብሔር፡ ነፍሰ፡ ጻድቅተ፡ ወሕይወተ፡ ረሲዓንሰ፡ ያአትት፡ እምድር።

⁴ እድ፡ ሀካይ፡ ብእሴ፡ ያቴሕት፡ ወእደ፡ ጽኑዕ፡ ብእሴ፡ ያብዕል።

⁵ ወልድ፡ ምሁር፡ ጠቢበ፡ ይከውን፡ ወዓብድሰ፡ ላእከ፡ ይሬሲ፡ ርእሶ፡ ድኅነ፡ እመርቄ፡ ወልድ፡ ጠቢብ።

⁶ ወልድ፡ ጠቢብ፡ ይትጌበር፡ በማእረር፡ ወወልድሰ፡ ዓብድ፡ ይነውም፡ በማእረር፡ ነሣኤ፡ ነፍስ፡ ይከውን፡ በውስተ፡ ዓውድ፡ ወልድ፡ ኃጥእ።

⁷ በረከተ፡ እግዚአብሔር፡ ውስተ፡ ርእሰ፡ ጻድቃን፡ አፈረሲዓንሰ፡ ይፌጽም፡ ላህ፡ ግብተ።

⁸ ዝክረ፡ ጻድቃን፡ ምስለ፡ ውዳሴ፡ ወስመ፡ ረሲዓንሰ፡ ይጠፍእ።

⁹ ልብ፡ ጠቢብ፡ ይትዌከፍ፡ ትእዛዘ፡ ወዘኢይትዔገሥ፡ በከናፍሪሁ፡ በማዕቅፍ፡ ይወድቅ።

¹⁰ ወዘየሐውር፡ በየዋሃት፡ የሐውር፡ እሙነ፡ ወዘይትሀወክ፡ ፍናዊሁ፡ ይትከሠት።

¹¹ ዘይትቃጸብ፡ በአዕይንቲሁ፡ ለእከይ፡ ያስተጋብእ፡ ለሰብእ፡ ኃዘነ፡ ወዘሰ፡ ይዘልፍ፡ ገሃደ፡ ሰላመ፡ ይገብር።

¹² ነቅዐ፡ ሕይወት፡ ውስተ፡ አፈ፡ ጻድቃን፡ ወለአፈ፡ ረሲዓን፡ ይከድኖ፡ ኃጒል።

¹³ ጽልአ፡ ያነሥእ፡ መዓት፡ ወለኵሎሙ፡ እለ፡ ይትገአዙ፡ ይከድኖሙ፡ ፍቅር።

¹⁴ ብእሲ፡ ጠቢብ፡ እምከናፍሪሁ፡ ያወጽእ፡ ጥበበ፡ በበትር፡ ይዘብጥ፡ (ይዘበጥ)፡ ብእሲ፡ ዘእንበለ፡ ልብ።

¹⁵ ጠቢብ፡ የኃብእ፡ አእምሮ፡ ወአፍ፡ ጒጒእ፡ ይቀርብ፡ ለቅጥቃጤ።

¹⁶ ጥሪቶሙ፡ ለአብዕልት፡ ሀገር፡ ጽንዕት፡ ወቅጥቃጤሆሙ፡ ለረሲዓን፡ ንዴተ፡ አእምሮ።

¹⁷ ግብረ፡ ጻድቃን፡ ሕይወተ፡ ይገብር፡ ወፍሬ፡ ረሲዓን፡ ኀጢአት።

¹⁸ ፍናወ፡ ሕይወት፡ የዓቅብ፡ ተግሣፅ፡ በተግሣፅ፡ ዘኢይዘለፍ፡ ይስሕት።

¹⁹ ከናፍር፡ ልሙጻት፡ ይከድና፡ ጽልአ፡ ወእለሰ፡ ያወጽኡ፡ ጽእለተ፡ ዓብዳን፡ እሙንቱ።

²⁰ እምብዝኀ፡ ነገር፡ ኢያመስጥ፡ ኃጥእ፡ እምኃጢአት፡ ወዘይምህከሰ፡ በከናፍሪሁ፡ ማእምረ፡ ይከውን።

²¹ ብሩር፡ ርሱን፡ ልሳነ፡ ጻድቅ፡ ወልበ፡ ረሲዓንሰ፡ የሐፅፅ።

²² ከናፍረ፡ ጻድቃን፡ የአምራ፡ ነዋኀ፡ ወዓብዳንሰ፡ በንዴተ፡ አእምሮ፡ ይመውቱ።

²³ በረከተ፡ እግዚአብሔር፡ ላዕለ፡ ርእሰ፡ ጻድቃን፡ ይእቲ፡ ታብዕል፡ ወኢታመጽእ፡ ኀዘነ፡ ውስተ፡ ልብ።

²⁴ ወስተ፡ ሐጒል፡ ይትመየጥ፡ ረሲዕ፡ ፍትወቱ፡ ለጻድቅ፡ ሥምረት፡ በኀበ፡ እግዚአብሔር።

²⁵ በኅልፈተ፡ ዓውሎ፡ ይማስን፡ ረሲዕ፡ ጻድቅሰ፡ ተግኂሦ፡ ለዓለም፡ ይድኅን።

²⁶ ከመ፡ ቆዕ፡ ከንቱ፡ ለስነን፡ ወጢስ፡ ለዓይን፡ ከማሁ፡ ኃጢአት፡ ለእለ፡ አጥረይዋ።

²⁷ ፈሪሀ፡ እግዚአብሔር፡ ያነውኅ፡ መዋዕለ፡ ወዓመተ፡ ረሲዓንሰ፡ ይውኅድ።

²⁸ ትጐነዲ፡ ትፍሥሕት፡ ምስለ፡ ጻድቃን፡ ተስፋሆሙሰ፡ ለረሲዓን፡ ትትኀጐል።

²⁹ ፅንዑ፡ ለኄር፡ ፈሪሀ፡ እግዚአብሔር፡ ወቀቅጥቃጤ፡ ለእለ፡ ይገብሩ፡ እኩየ።

³⁰ ጻድቅ፡ ለዓለም፡ ኢይኤብስ፡ ወረሲዓንሰ፡ ኢየኀድሩ፡ ውስተ፡ ምድር።

³¹ አፈ፡ ጻድቃን፡ ይነብብ፡ ጥበበ፡ ወልሳነ፡ ዓማፅያን፡ ይትኀጐል።

³² ከናፍረ፡ ጻድቃን፡ ያውኅዛ፡ ሞገሰ፡ ወአፈ፡ ረሲዓንሰ፡ ይትከላእ፡ እምአእምሮ።