Messale 9

The Ethiopic Bible (Ge'ez)

¹ ጥበብ፡ ሐነፀት፡ ላቲ፡ ቤተ፡ ወአቀመት፡ ሰብዓተ፡ አዕማደ።

² ዘብሐት፡ ዘዚአሃ፡ ጥብሐ፡ ወቶስሐት፡ ውስተ፡ ስያሓ፡ ዘዚአሃ፡ ወይነ።

³ ወፈነወት፡ ዘዚአሃ፡ አግብርተ፡ እንዘ፡ ትጼውዕ፡ በነዋኅ፡ ስብከት።

⁴ እንዘ፡ ትብል፡ ዘዓብድ፡ ውእቱ፡ ይግኀሥ፡ ኀቤየ፡ ወለእለሂ፡ የሐዖሙ፡ አእምሮ።

⁵ ትቤ፡ ንዑ፡ ብልዑ፡ ኅብስትየ፡ ወስትዩ፡ ወይንየ፡ ዘቀዳሕኩ፡ ለክሙ።

⁶ ወኀድግዋ፡ ለዕበድ፡ ወኅሡ፡ አእምሮ፡ ከመ፡ ትሕየዉ።

⁷ አርትዑ፡ አእምሮ፡ በጠይቆ፡ ወዘይሜህሮሙ፡ ለእኩያን፡ ይነሥእ፡ ሎቱ፡ ኃሣረ።

⁸ ወዘይጌሥፆ፡ ለረሲዕ፡ የሐይስ፡ ርእሶ።

⁹ ኢትዝልፎሙ፡ ለዓብዳን፡ ከመ፡ ኢይጽልኡከ።

¹⁰ ዝልፎ፡ ለጠቢብ፡ ወያፈቅረከ፡ ዓብድሰ፡ ይጸልአከ፡ ሀቦ፡ ለጠቢብ፡ ምክንያተ፡ ወያፈደፍድ፡ ጥበበ፡ አምሮ፡ ለጠቢብ፡ ወይዌስክ፡ ተወክፎ።

¹¹ ቀዳሚሃ፡ ለጥበብ፡ ፈሪሀ፡ እግዚአብሄር፡ ወምክረ፡ ቅዱሳን፡ አእምሮ፡ ወአእምሮ፡ ሕግሰ፡ ለልብ፡ ኄር፡ ውእቱ።

¹² በዝ፡ ሥርዓት፡ ብዙኀመዋዕለ፡ ተሐዩ፡ ወይትዌስካከ፡ ዓመታተ፡ ሕይወት።

¹³ ወልድየ፡ እመ፡ ጠቢበ፡ ኮንከ፡ ለርእስከ፡ ጠቢበ፡ ትከውን፡ ለቢጽከ፡ ወእመሰ፡ እኩየ፡ ኮንከ፡ ለባሕቲትከ፡ ትቀድሕ፡ እኪቶ።

¹⁴ ዘያስተዳሉ፡ ሐሰተ፡ ይመስል፡ ከመ፡ ዘያስተዳሉ፡ ነፋሳተ፡ ወውእቱ፡ ከመ፡ ዘይዴግን፡ ዖፈ፡ ዘይሠርር።

¹⁵ ወኀደገ፡ ፍናወ፡ ዓፀደ፡ ወይኑ፡ ወመንኰራኵረ፡ ወፍሬ፡ ዚአሁ፡ ረስዐ፡ ወየሐውር፡ ውስተ፡ በድው፡ ገዳመ፡ ወውስተ፡ ምድር፡ እንተ፡ ተሠርዓት፡ ለጽምእ፡ ወያስተጋብእ፡ በእዴሁ፡ ዘኢይፈሪ፡ ወኢይበቊል።

¹⁶ ብእሲት፡ ዓብድ፡ ወመግዝእት፡ ጽንስተ፡ ኅብስት፡ ትከውን፡ እንተ፡ ኢተአምር፡ ኀፊረ፡ ምንተኒ፡ ወነበረት፡ ውስተ፡ አንቀጸ፡ ቤታ።

¹⁷ ወውስተ፡ መንበራ፡ ገሃደ፡ ወውስተ፡ መርኅብ፡ ትጼውዕ፡ ኃላፍያነ፡ ፍኖት፡ እለ፡ ያረትዑ፡ ፍኖቶሙ።

¹⁸ እለ፡ እምውስቴቶሙ፡ ዓብድ፡ ይቀርብ፡ ሐቤሃ፡ ወለዘሂ፡ የሐፅዖ፡ አእምሮ፡ ትኤዝዞ።

¹⁹ ወትቤሎ፡ ኅብስተ፡ ኅቡአ፡ አስተሐዊዘከ፡ ግሥሥ፡ ወማየ፡ ስርቅ፡ መዓርዒረ፡ ስተይ።

²⁰ ወውእቱሰ፡ ኢየአምር፡ ከመ፡ እምኃያላን፡ በኀቤሃ፡ ይትኀጐሉ፡ ወመጽፈርተ፡ ሲኦል፡ ይትረከብ፡ ውስተ፡ ቤታ።

²¹ ወባሕቱ፡ ቅንጽ፡ ወኢትጐንዲ፡ ውስተ፡ መካና፡ ወኢታውትር፡ ዓይነከ፡ ኀቤሃ፡ ከመ፡ ትትዓደው፡ ፈለገ፡ ነኪር።

²² ወእማየ፡ ነኪር፡ ረኀቅ፡ ወእምዓዘቅተ፡ ነኪር፡ ኢትስተይ፡ ከመ፡ ብዙኀ፡ መዋዕለ፡ ትሕየው፡ ወይትወሰካከ፡ ዓመታተ፡ ሕይወት።