Messale 13

The Ethiopic Bible (Ge'ez)

¹ ወልድ፡ ማእምር፡ ሰማዔ፡ አብ፡ ይከውን፡ ወወልድሰ፡ ዘኢይሰምዕ፡ ይከውን፡ ለኀጒል።

² ወእምፍሬ፡ ጽድቁ፡ ይበልዕ፡ ኄር፡ ወነፍሰ፡ ዓማፅያንሰ፡ ይትኀጐል፡ ቆዖሙ።

³ ዘየዓቅብ፡ አፉሁ፡ ይትመኀፀና፡ ለነፍሱ፡ ወጒጒእሰ፡ በከናፍሪሁ፡ ያወድቅ፡ ርእሶ።

⁴ ኵሉ፡ ዘኢይትቀነይ፡ ውስተ፡ ፍትወት፡ ሀሎ፡ ወእዴሆሙ፡ ለኄራን፡ ያስተሐምም።

⁵ ቃለ፡ ዓማፂ፡ ይጸልእ፡ ጽድቀ፡ ወረሲዕሰ፡ የኀፍር፡ ወኢይመጽእ፡ ገሃደ።

⁶ ጽድቅ፡ ተዓቅቦሙ፡ ለየዋሃን፡ በፍኖት፡ ለረሲዓንሰ፡ እቡሰ፡ ይሬስዮሙ፡ ኃጢአት።

⁷ ቦ፡ እለ፡ ያሌዕሉ፡ ርእሶሙ፡ እንዘ፡ ምንትኒ፡ አልቦሙ፡ ወቦ፡ እለ፡ ያቴሕቱ፡ ርእሶሙ፡ እንዘ፡ ብዙኅ፡ ብዕሎሙ።

⁸ ቤዛ፡ ነፍሱ፡ ለብእሲ፡ ጥሪተ፡ ብዕሉ፡ ወነዳይሰ፡ ኢይትቃወም፡ መዓተ።

⁹ ብርሃን፡ ለጻድቃን፡ በኵሉ፡ ጊዜ፡ ወብርሃነ፡ ረሲዓንሰ፡ ትጠፍእ።

¹⁰ ነፍሳተ፡ ሕቡላን፡ ይስሕታ፡ በኃጢአት፡ ወጻድቃንሰ፡ ይምሕሩ፡ ወይመጸውቱ።

¹¹ እኩይ፡ ዘምስለ፡ ጽእለቱ፡ ይገብር፡ እኩየ፡ ወእለሰ፡ የአምሩ፡ ርእሶሙ፡ ጠቢባን፡ እሙንቱ።

¹² አጥርዮ፡ ዘይጐጒእ፡ በኃጢአት፡ ውኁደ፡ ይከውን፡ በደኃሪቱ፡ ወዘሰ፡ ያሥተጋብእ፡ ለርእሱ፡ በጽድቅ፡ ይፈደፍድ፡ ሎቱ፡ ጻድቅኒ፡ ይምሕር፡ ወይሌቅሕ።

¹³ ይኄይስ፡ ዘይዌጥን፡ ይርዳእ፡ ነፍሶ፡ እምነ፡ ዘይብዕል፡ ወያጸንዕ፡ ለተስፋ።

¹⁴ ዕፅ፡ ሕይወት፡ ይእቲ፡ ፍኖት፡ ሠናይት።

¹⁵ ዘያሰትት፡ ግብረ፡ እግዚአብሔር፡ ውእቱኒ፡ ያሰትቶ፡ ወዘሰ፡ ይፈርህ፡ ትእዛዞ፡ የሐዩ፡ ቦቱ።

¹⁶ ለወልድ፡ ሕቡል፡ አልቦቱ፡ ምንትኒ፡ ሠናይ፡ ለገብርሰ፡ ጠቢብ፡ ሠናየ፡ ይከውን፡ ምግባሩ፡ ወይረትዕ፡ ፍኖቱ።

¹⁷ ሕገ፡ ጠቢብ፡ ነቅዐ፡ ሕይወት፡ ወዘእንበለ፡ ልብሰ፡ በአበሳ፡ ይመውት።

¹⁸ አእምሮ፡ ሠናይ፡ ይሁብ፡ ጥበበ፡ ወሞገሰ፡ ወፍናዊሆሙሰ፡ ለኀዩያን፡ ውስተ፡ ኀጒል።

¹⁹ ኵሉ፡ ማእምር፡ ይገብር፡ በምክር፡ ወዐብድሰ፡ አሥረረ፡ እከየ፡ ዚአሁ።

²⁰ ላእክ፡ ዐብድ፡ ይወድቅ፡ ውስተ፡ እኪት፡ ወሐዋርያሰ፡ ጠቢብ፡ ያድኅን፡ ርእሶ።

²¹ ንዴተ፡ ወኃሣረ፡ ያሴስል፡ ትምህርት፡ ወዘየዓቅብሰ፡ ተግሣፀ፡ ይከብር።

²² ፍትወተ፡ ኄራን፡ ያጥዒ፡ ነፍሰ፡ ወምግባረ፡ ረሲዓንሰ፡ ርኁቅ፡ እምአእምሮ።

²³ ዘይደመር፡ ምስለ፡ ጠቢብ፡ ጠቢበ፡ ይከውን፡ ወዘሰ፡ ያንዘሃልል፡ ምስለ፡ ዓብዳን፡ ዐብደ፡ ይከውን።

²⁴ ለእለ፡ ይኤብሱ፡ ይዴግኖሙ፡ እኩይ፡ ወለጻድቃንሰ፡ ይረክቦሙ፡ ሠናይ።

²⁵ ኄር፡ ብእሲ፡ ይሬኢ፡ ውሉደ፡ ውሉድ፡ ወይዘገብ፡ ለጻድቃን፡ ብዕለ፡ ረሲዓን።

²⁶ ጻድቃን፡ ይሄልዉ፡ በብዕል፡ ዓመታተ፡ ብዙኀ፡ ወዓማፅያንሰ፡ ይትኀጐሉ፡ ፍጡነ።

²⁷ ዘይምሀከ፡ በትሮ፡ ጸልአ፡ ወልዶ፡ ወዘያፈቅርሰ፡ ወልዶ፡ ወትረ፡ ይጌሥፅ።

²⁸ ጻድቅሰ፡ እንዘ፡ ይበልዕ፡ ይመልእ፡ ነፍሶ፡ ነፍሰ፡ ረሲዓንሰ፡ ፅኑስ።