Messale 14

The Ethiopic Bible (Ge'ez)

¹ ጠባባት፡ አንስት፡ ሐነፃ፡ አብያተ፡ ወዐብዳትሰ፡ ነሠታ፡ አብያቲሆን፡ በእደዊሆን።

² ዘየሐውር፡ ፍኖተ፡ ርቱዐ፡ ይፈርሆ፡ ለእግዚአብሔር፡ ወዘሰ፡ ያጠዊ፡ ፍኖቶ፡ ይትሜነን።

³ እምአፈ፡ ዐብዳን፡ ይወፅእ፡ በትረ፡ ጽእለት፡ ወከናፍረ፡ ጠቢባንሰ፡ ተዓቅቦሙ።

⁴ ወእደ፡ አልቦ፡ አልሕምት፡ ምጽንጋዕ፡ ንጹሕ፡ ወእደሰ፡ ብዙኅ፡ እክል፡ ይትዓወቅ፡ እምኃይለ፡ ላሕሙ።

⁵ ስምዐ፡ መሃይምናን፡ ኢይሔሱ፡ ወያነድድ፡ ነፍሰ፡ ሰማዕተ፡ ሐሰት።

⁶ ተኃሥሣ፡ ለጥበብ፡ በኀበ፡ እኩያን፡ ወኢትረክባ፡ ወአእምሮሰ፡ በኀበ፡ ጠቢባን፡ ቀሊል።

⁷ ኵሉ፡ ርቱዕ፡ በቅድሜሁ፡ ለብእሲ፡ ዐብድ፡ ወወልታ፡ አእምሮ፡ ከናፍረ፡ ጠቢባን።

⁸ ጥበብ፡ ለማእምራን፡ ተአምር፡ ፍኖቶሙ፡ ወለእለ፡ ዘእንበለ፡ ልብሰ፡ ውስተ፡ ስሒት፡ ይከውን፡ ፍኖቶሙ።

⁹ አብያቲሆሙ፡ ለኃጥአን፡ ይፈድዩ፡ ለንጹሐን፡ ወአብያተ፡ ጻድቃንሰ፡ ሥሙር።

¹⁰ ልበ፡ ብእሲ፡ ማእምር፡ ኀዘን፡ ለነፍሱ፡ ወሶበሂ፡ ይትፌሣሕ፡ ኢይትሐወሶ፡ ጽልእ።

¹¹ አብያተ፡ ረሲዐን፡ ይማስኑ፡ ወማኅደረ፡ ራትዓንሰ፡ ይቀውም።

¹² ቦ፡ ፍኖት፡ እንተ፡ ትመስል፡ ርትዕተ፡ በኀበ፡ ሰብእ፡ ወደ፡ ኃሪታሰ፡ ታበጽሕ፡ ውስተ፡ ማዕምቅተ፡ ሲኦል።

¹³ ውስተ፡ ፍሥሓ፡ ኢይዴመር፡ ኃዘን፡ ደኃሪታሰ፡ ለፍሥሓ፡ ውስተ፡ ላህ፡ ትገብእ።

¹⁴ እምፍኖተ፡ ዚአሁ፡ ይመልእ፡ ዕቡየ፡ ልብ፡ ወብእሲ፡ ኄር፡ እምሕሊናሁ፡ ይመልእ፡ በረከተ።

¹⁵ የዋህ፡ የአምን፡ ኵሎ፡ ነገረ፡ ማእምር፡ ባሕቱ፡ ይገብእ፡ ውስተ፡ ንስሓ።

¹⁶ ጠቢብ፡ ፈሪሖ፡ ተግኅሠ፡ እምአኩይ፡ ወዐብድሰ፡ ተአሚኖ፡ ርእሶ፡ ይጸመር፡ ምስለ፡ ዐብዳን።

¹⁷ መዓትም፡ ይገብር፡ ዘእንበለ፡ ምክር፡ ብእሲሰ፡ ጠቢብ፡ ብዙኀ፡ ይትዔገሥ።

¹⁸ ይትካፈሉ፡ ዓብዳን፡ እከየ፡ ማእምራንሰ፡ ይእኅዝዎ፡ ለጠይቆ።

¹⁹ ይድኅፁ፡ እኩያን፡ በቅድመ፡ ኄራን፡ ወረሲዓንሰ፡ ይትቀነዩ፡ በኆኅተ፡ ጻድቃን።

²⁰ አዕርክተ፡ አብዕልት፡ ይጸልኡ፡ አዕርክተ፡ ነዳያን፡ አዕርክተ፡ አብዕልትሰ፡ ብዙኀን።

²¹ ዘይሜንኖ፡ ለነዳይ፡ ይነዲ፡ ወዘይምሕሮሰ፡ ለፅኑስ፡ ብፁዕ፡ ውእቱ።

²² ስሑታን፡ ይሔልዩ፡ እከየ፡ ወሣህለ፡ ወጽድቀ፡ ይሔልዩ፡ ኄራን፡ ወኢየአምሩ፡ ሣህለ፡ ወምሕረተ፡ ጸረብተ፡ እኪት።

²³ ምሕረት፡ ባሕቱ፡ ወሃይማኖት፡ ኀበ፡ ጸረብት፡ ኄራን፡ በኵሉ፡ ሕሊና፡ ትሩፍ፡ ውእቱ፡ ወላህይሰ፡ ዘኢየሐምም፡ ፅኑስ፡ ውእቱ።

²⁴ አክሊሎሙ፡ ለጠቢባን፡ ማእምር፡ ወመምህሮሙ፡ ለዐብዳን፡ እኩይ።

²⁵ ያድኅን፡ ነፍሶ፡ እምእኩይ፡ ሰማዕት፡ ማእምር፡ ወያነድድ፡ ባሕቱ፡ በሐሰት፡ ሰማዕት፡ መዓምዕ።

²⁶ በፍርሃተ፡ እግዚአብሔር፡ ተስፋ፡ ኃያል፡ ወየኀድግ፡ ለደቂቁ፡ ጽንዐ።

²⁷ ትእዛዘ፡ እግዚአብሔር፡ ነቅዐ፡ ሕይወት፡ ወይሬሲ፡ ከመ፡ ይትገኃሡ፡ እመሥገርተ፡ ሞት።

²⁸ በብዝኀ፡ አሕዛብ፡ ክብሩ፡ ለንጉሥ፡ ወበውኅደተ፡ አሕዛብ፡ ድቀቱ፡ ለመኰንን።

²⁹ ብእሲ፡ ነዊኅ፡ መንፈስ፡ ወርኂበ፡ ልብ፡ ጠቢበ፡ ይከውን።

³⁰ ብእሲ፡ መስተዐግሥ፡ ብዙኀ፡ ጠቢበ፡ ይከውን፡ ወኅፀፀ፡ ነፍስሰ፡ ፅኑስ፡ ዓብድ፡ ውእቱ።

³¹ አራቂ፡ ብእሲ፡ መፈውሰ፡ ልብ፡ ከመ፡ ነቀዝ፡ ለአዕፅምት፡ ቅንአት፡ ወትዝኅርት፡ እኩይ፡ ለልብ፡ ማእምር።

³² ዘይትዔገል፡ ነዳየ፡ ይዌህኮ፡ ለፈጣሪሁ፡ ወዘያከብሮሰ፡ ይምሕር፡ ነዳየ።

³³ በእከዩ፡ ይትአተት፡ ረሲዕ፡ ወዘይትአመንሰ፡ ኂሩቶ፡ ጻድቅ፡ ውእቱ።

³⁴ ውስተ፡ ልበ፡ ኄር፡ ተዓርፍ፡ ጥበብ፡ ወውስተ፡ ልበ፡ ዐብድሰ፡ ኢትትአመር።

³⁵ ጽድቅ፡ ታሌዕል፡ ሕዝበ፡ ወያሐፅፅ፡ ኃጢአት፡ ሕዝባ።

³⁶ ሥሙር፡ ለንጉሥ፡ ላእክ፡ ማእምር፡ ወበተዓቅቦቱ፡ ያርኅቅ፡ ኃሣረ፡ እምነፍሱ፡ ወመዓት፡ ታኃጒል፡ ጠቢባነ።