Messale 18

The Ethiopic Bible (Ge'ez)

¹ ምክንያተ፡ የኃሥሥ፡ ብእሲ፡ ዘይፈቅድ፡ ይትፈለጥ፡ እምአዕርክቲሁ፡ ወበኵሉ፡ ጊዜ፡ ዝንጓጔ፡ ይከውን።

² ኢይፈቅድ፡ ጥበበ፡ ነዳየ፡ አእምሮ፡ ወባሕቱ፡ ይመልኮ፡ ዕበድ።

³ ሶበ፡ መጽአ፡ ረሲዕ፡ ውስተ፡ ዕመቀ፡ እከያት፡ ይትኄየይ፡ ወያመጽእ፡ ኃሣረ፡ ወዝንጓጔ።

⁴ ማይ፡ ዕሙቅ፡ ውስተ፡ ልበ፡ ብእሲ፡ ጠቢብ፡ ወፈለግ፡ ዘይፈለፍል፡ ነቅዐ፡ ሕይወት።

⁵ አንክሮ፡ ገጸ፡ ረሲዓን፡ አኮ፡ ሠናይ፡ ወአኮ፡ አዳም፡ አግኅሦ፡ ጽድቅ፡ በፍትሕ።

⁶ ከናፍሪሁ፡ ለዐብድ፡ ያበጽሖ፡ ውስተ፡ እከይ፡ ወአፉሁ፡ ለጒጒዕ፡ ይጼውዕ፡ ሞተ፡ ለርእሱ።

⁷ አፉሁ፡ ለዐብድ፡ ቅጥቃጤሁ፡ ወከናፍሪሁ፡ መሥገርተ፡ ነፍሱ።

⁸ ሀካይያን፡ ያበዝኁ፡ ፍርሃተ፡ ወመንፈሰ፡ ሰብእሰ፡ ፅኑሳን፡ ይርኅብ።

⁹ ዘኢይፌውስ፡ ርእሶ፡ በምግባሪሁ፡ እኁሁ፡ ውእቱ፡ ለዘርእሶ፡ ይበልዕ።

¹⁰ ዓቢይ፡ ኃይል፡ ስመ፡ እግዚአብሔር፡ ወኪያሁ፡ በዴግኖ፡ ጻድቃን፡ ይትሌዓሉ።

¹¹ ጥሪቱ፡ ለብእሲ፡ ባዕል፡ ሀገር፡ ጽንዕት፡ ወበክብራ፡ ዓቢየ፡ ትጼልል።

¹² ዘእንበለ፡ ቅጥቃጤ፡ ይትዔበይ፡ ልበ፡ ብእሲ፡ ወዘእንበለ፡ ክብር፡ ይቴሐት።

¹³ ዘይነብብ፡ ቃለ፡ ዘእንበለ፡ ይስማዕ፡ ዐብድ፡ ውእቱ፡ ወሎቱ፡ ይደሉ፡ ምናኔ።

¹⁴ መዓተ፡ ንጉሥ፡ ያኃሥዕ፡ ገብር፡ ጠቢብ፡ ለሕፁፀ፡ ነፍስሰ፡ ብእሲ፡ መኑ፡ ይክሎ።

¹⁵ ልበ፡ ብእሲ፡ ጠቢብ፡ ያጠሪ፡ አእምሮ፡ ወዕዝነ፡ ጠቢባን፡ የኃሥሥ፡ ቃለ፡ ተግሣፅ።

¹⁶ ሀብት፡ ብእሴ፡ ያሌዕል፡ ወምስለ፡ መኳንንት፡ ያነብሮ።

¹⁷ ጻድቅ፡ መስተዋድየ፡ ርእሱ፡ እምቅድመ፡ ነገር፡ ወበዘአምጽአ፡ እድው፡ ይዘልፍ።

¹⁸ ጋእዝ፡ ያኅድግ፡ ዕፃ፡ ወማእከለ፡ ፅኑዓን፡ ይፈልጥ።

¹⁹ ወካሕደ፡ ያኀድግ፡ አርማሚ፡ ወበኀበ፡ መኳንንት፡ ይሠርዕ።

²⁰ እኁ፡ ምስለ፡ እኁ፡ ዘይትራዳእ፡ ከመ፡ ሀገር፡ ጽንዕት፡ ወልዕልት፡ ወጽኑዕ፡ ከመ፡ መሠረት፡ ሡርርት።

²¹ እምፍሬ፡ አፉሁ፡ ይመልእ፡ ብእሲ፡ ከረሦ፡ ወእምፍሬ፡ ከናፍሪሁ፡ ይጸግብ።

²² ሞት፡ ወሕይወት፡ ውስተ፡ እደ፡ ልሳን፡ ወእለሰ፡ ያጸንዕዋ፡ ይበልዑ፡ ፍሬሃ።

²³ ዘረከበ፡ ብእሲተ፡ ኄርተ፡ ረከበ፡ ሞገሰ፡ ወነሥአ፡ እምኀበ፡ እግዚአብሔር፡ ውኅዋኄ።

²⁴ ዘያወፅአ፡ ብእሲተ፡ ኄርተ፡ አውፅአ፡ ሠናያተ፡ ወዘያነብርሰ፡ ብእሲተ፡ ዘማዊተ፡ ዐብድ፡ ወረሲዕ፡ ውእቱ።