Messale 19

The Ethiopic Bible (Ge'ez)

¹ ዕበዱ፡ ለብእሲ፡ ያጠፍእ፡ ፍናዊሁ፡ ወለእግዚአብሔር፡ ያስተጋፍዖ፡ በልቡ።

² ባዕል፡ ይዌስክ፡ አዕርክተ፡ ብዙኀነ፡ ወነዳይሰ፡ ኪያሁኒ፡ ዘቦ፡ የኃጥእ።

³ ሰማዕተ፡ ሐሰት፡ ርኩስ፡ ውእቱ፡ ወዘየኃሥሥ፡ በግፍዕ፡ ኢያመስጥ።

⁴ ወብዙኃን፡ ይትለአኩ፡ በቅድመ፡ ነገሥት፡ ወባሕቱ፡ ጽድቁ፡ ወሀብቱ፡ ለብእሲ፡ እምኀበ፡ እግዚአብሔር።

⁵ ወኵሉ፡ እኩይ፡ ይከውን፡ ዝንጓጔ፡ ብእሲ፡ ኵሉ፡ ዘአኃወ፡ ነዳያነ፡ ይጸልእ፡ እምታአኅኃሁ፡ ርኁቅ፡ ውእቱ።

⁶ ሕሊና፡ ሠናይት፡ ለእለ፡ አጥረይዋ፡ ትቀርብ፡ ወብእሲ፡ ጠቢብ፡ ይረክባ።

⁷ ዘብዙኅ፡ እከዩ፡ ይፌጽም፡ እከየ፡ ወዘያስዖዝዝ፡ ነገረ፡ ኢይድኅን።

⁸ ዘአጥረያ፡ ለጥበብ፡ ያፈቅር፡ ነፍሶ፡ ወዘያፈቅር፡ አእምሮ፡ ይረክብ፡ ኄረ።

⁹ ሰማዕተ፡ ኀሰት፡ ኢይድኅን፡ እምኵነኔ፡ ወዘያስተውዕያ፡ ለእከይ፡ ይተኃጐል፡ ባቲ።

¹⁰ ኢይደልዎ፡ ለዐብድ፡ ተድላ፡ ወለእመ፡ ገብረ፡ ኵነኔ፡ ዘምስለ፡ ጽእለት፡ ትኄየል።

¹¹ ወሐሪ፡ ብእሲ፡ ይትዔገሥ፡ ወትምክሕተ፡ ምሕረቱ፡ ይትቃወሞሙ፡ ለኃጥአን።

¹² መዓተ፡ ንጉሥ፡ ከመ፡ ጣሕረ፡ አንበሳ፡ ወከመ፡ ጠል፡ ዘይወርድ፡ ዲበ፡ ሣዕር፡ ከማሁ፡ ውእቱ፡ ውኅዋኄሁ።

¹³ ኃፍረት፡ ለአብ፡ ዐብድ፡ ወልድ፡ ወኢኮነ፡ ንጹሐ፡ ጸሎት፡ ምስለ፡ ዐስበ፡ ከልአት።

¹⁴ አብያተ፡ ወንዋየ፡ ይከፍሉ፡ አበው፡ ለውሉዶሙ፡ ወባሕቱ፡ በኀበ፡ እግዚአብሔር፡ ትትዋደዶ፡ ብእሲት፡ ለብእሲሃ።

¹⁵ ምምዓ፡ ይእኅዞ፡ ለብእሲ፡ ፅኑስ፡ ወነፍስ፡ ዘኢይትቀነይ፡ ይርኅብ።

¹⁶ ዘየዓቅብ፡ ተግሣፀ፡ ወትእዛዘ፡ ይትመኀፀን፡ ነፍሶ፡ ወዘያሰትትሰ፡ ፍናዊሁ፡ ይትኃጐል።

¹⁷ ይሌቅሖ፡ ለእግዚአብሔር፡ ዘይምሕር፡ ነዳየ፡ ወበከመ፡ ሀብቱ፡ ይፈድዮ።

¹⁸ ዝብጥ፡ ወልደከ፡ ከመ፡ ይኩንከ፡ ለተስፋ፡ ወለተጽእሎሰ፡ ኢታልዕል፡ እዴከ።

¹⁹ ብእሲ፡ እኩይ፡ ብዙኀ፡ ያኃጒል፡ ወእመሰ፡ ዓቢይ፡ ሕቡል፡ ነፍሶሂ፡ ይዌስክ።

²⁰ ስማዕ፡ ወልድየ፡ ተግሣፀ፡ አቡከ፡ ከመ፡ ትኩን፡ ጠቢበ፡ በደኃሪትከ።

²¹ ብዙኅ፡ ሕሊና፡ ውስተ፡ ልበ፡ ብእሲ፡ መምክር፡ ወምክሩሰ፡ ለእግዚአብሔር፡ ይሄሉ፡ ለዓለም።

²² ፍሬሁ፡ ለብእሲ፡ ምጽዋት፡ ይኄይስ፡ ነዳይ፡ ጻድቅ፡ እምባዕል፡ ሐሳዊ።

²³ ፈሪሀ፡ እግዚአብሔር፡ ሕይወተ፡ ብእሲ፡ ዘኢይፈርህሰ፡ የኃድር፡ ውስተ፡ መካን፡ ኀበ፡ ኢያስተርኢ፡ አእምሮ።

²⁴ የኀብእ፡ ሀካይ፡ እዴሁ፡ ውስተ፡ ኅፅኑ፡ ወኀበ፡ አፉሁ፡ ኢያቀርብ።

²⁵ ሕቡል፡ እንዘ፡ ይትቀሠፍ፡ ዐብድ፡ ጠቢበ፡ ይከውን፡ ወእመሰ፡ ዘለፍኮ፡ ለብእሲ፡ ጠቢብ፡ ይሔሊ፡ አእምሮ።

²⁶ ዘያኀሥር፡ አባሁ፡ ወእሞ፡ ይትከላእ፡ ወይትኀፈር፡ ወምኑነ፡ ይከውን።

²⁷ ወልድ፡ ዘይትከላእ፡ እምዓቂበ፡ ትምህርተ፡ አብ፡ ይትሜሀር፡ ቃለ፡ እኩየ።

²⁸ ዘይትሄበይ፡ ዐብደ፡ ወልደ፡ ያጼእል፡ ፍትሐ፡ ወለአፈረሲዐን፡ ይውኅጦ፡ እኩይ፡ ኵነኔ።

²⁹ ወይጸንሕ፡ ሎሙ፡ መቅሠፍት፡ ለእኩያን፡ ወኵነኔ፡ ከማሁ፡ ለዐብዳን።