Messale 20

The Ethiopic Bible (Ge'ez)

¹ እኩይ፡ ወይን፡ ለጸአሊ፡ ወለሰካሪ፡ ወኵሉ፡ ዘያስተፋንዎ፡ ለጽዋዕ፡ ኢኮነ፡ ጠቢበ፡ ወኵሉ፡ ዐብድ፡ ዘከመዝ፡ ይዴመር።

² ኢየሐፅፅ፡ መዓተ፡ ንጉሥ፡ እመዓተ፡ አንበሳ፡ ወዘየሀውኮሰ፡ ይኤብስ፡ ላዕለ፡ ነፍሱ።

³ ክብሩ፡ ለብእሲ፡ ተከልኦ፡ እምጽእለት፡ ወኵሉ፡ ዐብድ፡ ዘከመዝ፡ ይጸመር።

⁴ እንዘ፡ ይዘነጒግዎ፡ ሀካይ፡ ኢየኃፍር፡ ይስእል፡ በማእረር፡ ወአልቦ፡ ዘይሁቦ፡ ከማሁ፡ ዘይትሌቃሕ፡ ሥርናየ፡ እንዘ፡ ቦውስተ፡ ክምሩ።

⁵ ማይ፡ ዕሙቅ፡ ውስተ፡ ልበ፡ ብእሲ፡ መምክር፡ ወብእሲ፡ ጠቢብ፡ ይዘልሖ።

⁶ ዓቢይ፡ ወክቡር፡ ብእሲ፡ ወሐሪ፡ ወለብእሲ፡ ምእመን፡ በሥራሕ፡ ተረክቦቱ።

⁷ ዘየሐውር፡ ንጹሐ፡ ውስተ፡ ሕገ፡ እግዚአብሔር፡ ብፁዓነ፡ ይሬስዮሙ፡ ለውሉዱ።

⁸ ወሶበ፡ ጻድቅ፡ ንጉሥ፡ ይነብር፡ ዲበ፡ መንበሩ፡ ቅድመ፡ አዕይንቲሁ፡ ኢይትቃወሞ፡ ምንትኒ፡ እኩይ።

⁹ መኑ፡ ዘይትሜካሕ፡ ልብ፡ ንጹሕ፡ ዘቦ፡ ወመኑ፡ ያስተርኢ፡ ንጹሐ፡ ከዊኖ፡ እምኃጢአት።

¹⁰ ዘየሐሚ፡ አባሁ፡ ወእሞ፡ ይጠፍእ፡ ብርሃኑ፡ ወበእንተ፡ አዕይንቲሁ፡ ይኔጽር፡ ጽልመተ።

¹¹ መክፈልተ፡ ዘይጔጒእ፡ አቅዲሞ፡ በደኃሪቱ፡ ኢይትባረክ።

¹² ኢትበል፡ እትቤቀሎሙ፡ ለጸላእትየ፡ አላ፡ ተሰፈዎ፡ ለእግዚአብሔር፡ ከመ፡ ይርዳእከ።

¹³ መዳልው፡ ዓቢይ፡ ወንኡስ፡ ወመሣፍርት፡ ክልኤቱ፡ ርኩሳን፡ በኀበ፡ እግዚአብሔር፡ ኵሎሙ፡ ወዘይገብሮሙ፡ በምግባሪሁ፡ ይትዓቀፍ።

¹⁴ ለወሬዛ፡ ጻድቅ፡ ርቱዕ፡ ፍኖቱ።

¹⁵ ዕዝን፡ ዘይሰምዕ፡ ወዓይን፡ ዘይሬኢ፡ ግብረ፡ እግዚአብሔር፡ ኵሎሙ።

¹⁶ ኢታፍቅር፡ ሐምየ፡ ከመ፡ ኢትትአተት፡ ወኢትኑም፡ ከመ፡ ኢትንዲ፡ ክሥት፡ አዕይንቲከ፡ ወጽግብ፡ ኅብስተ።

¹⁷ ምኑናን፡ በኀበ፡ እግዚአብሔር፡ ክልኤቱ፡ መዳልው፡ መዳልው፡ ሰራቂ፡ አኮ፡ ሠናይ፡ በቅድሜሁ።

¹⁸ እምኀበ፡ እግዚአብሔር፡ ይረትዕ፡ አሠሩ፡ ለብእሲ፡ ወመዋቲሰ፡ እፎ፡ የአምር፡ ፍናዊሁ።

¹⁹ መሥገርቱ፡ ለብእሲ፡ ጒጉዕ፡ ዘእምዚአሁ፡ ይቄድሶ፡ እስመ፡ እምድኅረ፡ በፅዐ፡ ንስሐ፡ ይከውኖ።

²⁰ መሥኤሆሙ፡ ለረሲዓን፡ ንጉሥ፡ ጠቢብ፡ ወይወዲ፡ ሎሙ፡ መንኰራኵረ።

²¹ ብርሃነ፡ እግዚአብሔር፡ እስትንፋሰ፡ ብእሲ።

²² ዘከመ፡ ማኅቶት፡ ይፈትን፡ መዛግብተ፡ ከማሁ፡ ጠቢብ፡ ንጉሥ፡ ይፈትን፡ መዛግብተ፡ ከርሥ።

²³ ምጽዋተ፡ ወጽድቀ፡ ይዕቀብ፡ ንጉሥ፡ ወይሜግቡ፡ በጽድቅ፡ መንበሮ።

²⁴ ሠርጐሆሙ፡ ለወራዙት፡ ጥበብ፡ ወክብሮሙ፡ ለልሂቃን፡ ሲበት።

²⁵ ምማቴ፡ ወግኅሠት፡ ይዳደቆሙ፡ ለእኩያን፡ ወዝብጠት፡ ውስተ፡ መዛግብተ፡ ከርሥ።