Messale 4

The Ethiopic Bible (Ge'ez)

¹ ስምዑ፡ ውሉድየ፡ ተግሣፀ፡ አብ፡ ይኩን፡ ብዙኀ፡ መዋዕለ፡ ሕይወትክሙ።

² ወአምጽኡ፡ በአእምሮ፡ ሕሊና፡ እስመ፡ ሠናየ፡ ጸጋ፡ እጼግወክሙ፡ ወሕገገ፡ ዚአየ፡ ኢትኅድጉ።

³ እስመ፡ ኮንኩ፡ አነሂ፡ ወልደ፡ ሰማዔ፡ አብ፡ ወእትፈቀር፡ በገጸ፡ እምየ።

⁴ እንዘ፡ ይሜህሩኒ፡ ወይብሉኒ፡ ይባእ፡ ቃለ፡ ዚአነ፡ ውስተ፡ ልብከ፡ ዕቀብ፡ ትእዛዛቲነ።

⁵ ወኢትርሳዕ፡ ወኢትትሀየይ፡ ንባበ፡ አፉነ፡ ወኢትኅድጋ።

⁶ ወአጥሪ፡ አእምሮ፡ ወትትዌከፈከ፡ አፍቅራ።

⁷ ወተዓቅበከ፡ ዑዳ፡ ወታሌዕለከ።

⁸ ስማዕ፡ ወልድየ፡ ወተወከፍ፡ ንባበ፡ ዚአየ፡ ከመ፡ ይብዝኀ፡ ዓመታተ፡ ሕይወትከ፡ ወከመ፡ ይኩን፡ ፍናወ፡ ሕይወትከ፡ ብዙኀ።

⁹ እስመ፡ ፍኖተ፡ ጥበብ፡ አሜህረከ፡ ወአፀንዓከ፡ ዲበ፡ መንኰራኵ፡ ርቱዕ።

¹⁰ እመሂ፡ ተሐውር፡ ኢይትዐፀው፡ አሠርከ፡ ወእመሂ፡ ሮፅከ፡ ኢትደክም፡ ወተወክፎ፡ ቃለ፡ ዚአየ፡ ኢትኅድግ።

¹¹ ዕቀባ፡ ለርእስከ፡ ወኢትኀድጋ፡ ለሕይወትከ።

¹² ፍኖተ፡ ረሲዓን፡ ኢትኪድ፡ ወኢትቅናእ፡ በፍናወ፡ ኃጥአን፡ ወመካነ፡ እንተ፡ ኀበ፡ ግእዙ፡ ኢትሑር፡ ህየ፡ ተገኀሥ፡ እምኔሆሙ፡ ወተመየጥ።

¹³ እስመ፡ ኢይነውሙ፡ እመ፡ ኢገብሩ፡ አኩየ፡ ተመሥጠ፡ ንዋም፡ እምአዕይንቲሆሙ።

¹⁴ ወኢይነውሙ፡ እመ፡ ኢደወዩ፡ እለ፡ ይበልዑ፡ ወብልዐ፡ ኃጢአት፡ ወበወይነ፡ ዓመፃ፡ ይሰክሩ።

¹⁵ ወፍኖተ፡ ጻድቃንሰ፡ ከመ፡ ብርሃን፡ ይበርህ፡ የሐውሩ፡ ወያበርሁ፡ እስከ፡ ሶበ፡ ታረትዕ፡ ዕለት።

¹⁶ ወፍኖተ፡ ኃጥንሰ፡ ጽልመት፡ ወኢየአምሩ፡ ከመ፡ ይትዓቀፉ።

¹⁷ ወልድየ፡ ንባበ፡ ዚአየ፡ ነፅር፡ ወቃለ፡ ዚአየ፡ ያጽምእ፡ ዕዝንከ፡ ከመ፡ ኢይንጽፋ፡ ዓዘቃቲከ።

¹⁸ ዕቀቦን፡ ውስተ፡ ልበከ፡ እስመ፡ ሕይወት፡ ውእቶን፡ ለእለ፡ ይረክብዎን፡ ወለኵሉ፡ ዘሥጋ።

¹⁹ ወበኵሉ፡ ተዓቅቦ፡ ዕቀብ፡ ልበከ፡ እምዝንቱ፡ ፍኖት፡ እስመ፡ ውእቱ፡ ነቅዐ፡ ሕይወት።

²⁰ ወእርኅቅ፡ እምኔከ፡ አፈ፡ እኩየ፡ ወከናፍረ፡ ዓመፃ፡ አንኅአርኅቆ፡ እምኔከ።

²¹ ወዕይንቲከኒ፡ ርቱዐ፡ ይርአያ፡ ወቀራንብቲከ፡ ይቅጽባ፡ ጽድቀ።

²² ርቱዐ፡ መንኰራኵረ፡ ግበር፡ ለእገሪከ፡ ወፍናዊከ፡ አርትዕ።

²³ ወኢትትገኀሥ፡ ኢ፡ ለየማን፡ ወኢ፡ ለጸጋም፡ አግኅሥ፡ እገሪከ፡ እምፎኖት፡ እኪት፡ እስመ፡ ፍናወ፡ ዘየማን፡ ያፈቅር፡ እግዚአብሔር።

²⁴ ጣዋያት፡ እማንቱ፡ እለ፡ በጸጋም፡ ወውእቱ፡ ርቱዐ፡ መንኰራኵረ፡ ይገብር፡ ለእገሪከ፡ ወሑረትከኒ፡ በሰላም፡ ያሤኒ።