Messale 5

The Ethiopic Bible (Ge'ez)

¹ ወልድየ፡ ጥበበ፡ ዚአየ፡ ነጽር፡ ወንባበ፡ ዚአየ፡ ያጽምእ፡ ዕዝንከ፡ ከመ፡ ትዕቀብከ፡ በሕሊና፡ ሠናይት።

² ወአእምር፡ እምከናፍርየ፡ ዘእኤዝዘከ።

³ ኢትነፅር፡ ብእሲተ፡ እኪተ፡ እስመ፡ መዓር፡ ይውኅዝ፡ እምከናፍረ፡ ብእሲት፡ ዘማ፡ እንተ፡ ለጊዜሁ፡ ያመዓርዕሮ፡ ለጒርዔከ።

⁴ ወእምድኅሬሁሰ፡ ዘይመርር፡ እምሐሞት፡ ትረክብ፡ ወስሑል፡ ፈድፋደ፡ እመጥባሕት፡ ዘክልኤ፡ አፉሁ።

⁵ ወኀበ፡ ዕበድ፡ እገሪሃ፡ ያወርዱ፡ ወሑረታ፡ ያበውእ፡ ውስተ፡ ሞት፡ ወሲኦል።

⁶ ወአሠራ፡ ኢይትሐወስ፡ እመካነ፡ ኃጢአት፡ ወውስተ፡ ፍናወ፡ ሕይወት፡ ኢይቀርብ፡ ወእቡስ፡ መንኰራኵራ፡ ወአኮ፡ ዘይትዐወቅ።

⁷ ወይእዜኒ፡ ወልድየ፡ ስምዐኒ፡ ወምኑነ፡ ኢትረሲ፡ ንባበ፡ ዚአየ።

⁸ ርኁቀ፡ ረሲ፡ እምኔሃ፡ ፍኖተከ፡ ወኢትቅረብ፡ ኀበ፡ ኆኅተ፡ ቤታ።

⁹ ከመ፡ ኢትወስክ፡ ለባዕድ፡ ሕይወተከ፡ መንብረተከ፡ ለእለ፡ ዘእንበለ፡ ምሕረት።

¹⁰ ከመ፡ ኢይጽገቡ፡ ነኪራን፡ ኃይለከ፡ ወፃማ፡ ዚአከ፡ ቤተ፡ ባዕድ፡ ኢይባእ።

¹¹ ወትኔስሕ፡ ድኅረ፡ አመ፡ ደክመ፡ ሥጋ፡ ነፍስከ።

¹² ወትብል፡ እፎ፡ ጸላእኩ፡ ትምህርተ፡ እምንእስየ፡ ወእምተግሣፅ፡ ተግኅሠ፡ ዕዝንየ።

¹³ ወኢሰማዕኩ፡ ቃለ፡ ዘይሜህሩኒ፡ ወይጌሥፁኒ፡ ወኢያፅማእኩ፡ በእዝንየ።

¹⁴ ዘእንበለ፡ ንስቲት፡ ኮንኩ፡ ውስተ፡ ኵሉ፡ እኩይ።

¹⁵ ማእከለ፡ ማኅበር፡ ወእንግልጋ፡ ስተይ፡ ማየ፡ እምቀሱትከ፡ ወእምነቅዐ፡ ዐዘቅትከ፡ ወየኀዛ፡ ማያት፡ እምዐዘቅትከ፡ ወውስተ፡ መራኅብቲከ፡ ይሑራ፡ ማያቲከ።

¹⁶ ወትኩን፡ ለከ፡ ለባሕቲትከ፡ ወአልቦ፡ ነኪር፡ ዘይነሥአከ፡ ወዓዘቅት፡ ማይከ፡ ትኩን፡ ለከ።

¹⁷ ወተፈሣሕ፡ ምስለ፡ ብእሲተ፡ ንእስከ።

¹⁸ በፍቅረ፡ ኃየል፡ ወዕዋል፡ ተፋቀር፡ ምስለ፡ ብእሲትከ።

¹⁹ ሞገሰ፡ ፍቅራ፡ ያረውየከ፡ እንቲአከ፡ ትኩንከ፡ ለከ፡ ወተሀሉ፡ ምስሌከ፡ በኵሉ፡ ጊዜ።

²⁰ በዛቲ፡ ፍቅር፡ እንዘ፡ ትትፋቀር፡ ብዙኀ፡ ትከውን፡ ወኵለንታከ፡ ኢየሀሉ፡ ኀበ፡ ነኪርት።

²¹ ወኢታውትር፡ እዴከ፡ ኀበ፡ እንተ፡ ኢኮነት፡ እንቲአከ።

²² እስመ፡ ቅድመ፡ አዕይንተ፡ እግዚአብሔር፡ ውእቱ፡ ፍናወ፡ ብእሲ፡ ወውስተ፡ ኵሉ፡ መንኰራኵሪሁ፡ ያስተሐይጽ።

²³ ኃጢአት፡ ያሤግር፡ ብእሴ፡ ወበኀብለ፡ ኃጢአት፡ ኵሉ፡ ይትሐሰል።

²⁴ ዝንቱ፡ ይመውት፡ ምስለ፡ ዓብዳን፡ ወእምብዝኀ፡ ዕበዱ፡ ተገድፈ፡ ሕይወቱ፡ ወተኀጒለ፡ ብእንተ፡ ዕበዱ።