Messale 8

The Ethiopic Bible (Ge'ez)

¹ አንተሰ፡ ጥበበ፡ ስብከ፡ ከመ፡ አእምሮ፡ ታውሥእከ።

² እስመ፡ ውስተ፡ ጽንፈ፡ ነዋኃት፡ ይእቲ፡ ወማእከለ፡ ፍናው፡ ቆመት፡ ወውስተ፡ አናቅጾሙ፡ ለኃያላን፡ ትጸንሕ።

³ ወበውስተ፡ ፍነው፡ ትሴባሕ፡ ኪያክሙ፡ ሰብእ፡ አስተበቊዕ፡ ወእነግር፡ ቃለ፡ ዚኣየ፡ ለውሉደ፡ ሰብእ።

⁴ አእምሩ፡ የዋሃን፡ ተጠብቦ፡ ወዓብዳን፡ አጥርዩ፡ ልበ።

⁵ ስምዑኒ፡ እስመ፡ መፍትወ፡ አየድዕ፡ ወአወፅእ፡ እምከናፍርየ፡ ርቱዐ።

⁶ እስመ፡ ጽድቀ፡ ትሜህር፡ ጒርዔየ፡ ወርኩሳት፡ በቅድሜየ፡ ከናፍረ፡ ሐሰት።

⁷ ወጽድቅ፡ ኵሉ፡ ቃለ፡ አፉየ፡ ወአልቦ፡ እምውስቴቶሙ፡ ጠዋይ፡ ወማዕቅፍ።

⁸ ኵሉ፡ ርቱዕ፡ በቅድሜሆሙ፡ ለእለ፡ የአምሩ፡ ወርቱዕ፡ ለእለ፡ ይረክቡ፡ ልቡና።

⁹ ንሥኡ፡ ትምህርተ፡ እምብሩር፡ ወአእምሮ፡ እምቀርቅ፡ ፍቱን፡ ወተወከፉ፡ ተዓውቆ፡ እምወርቅ፡ ጽሩይ።

¹⁰ እስመ፡ ትኄይስ፡ ጥበብ፡ እምዕንቊ፡ ዘብዙኅ፡ ሤጡ፡ ወኵሉ፡ ክብር፡ ኢመጠና፡ ላቲ።

¹¹ አነ፡ ጥበብ፡ አኅደርኩ፡ ምክረ፡ ወአእምሮ፡ ወሕሊና፡ አነ፡ ጸዋዕኩ።

¹² ፈራሄ፡ እግዚአብሔር፡ ይጸልእ፡ ዓመፃ፡ ጽልአ፡ ወትዕቢተ፡ ወፍናወ፡ እኩያተ፡ ጸላእኩ።

¹³ ወዓዲ፡ ጸላእኩ፡ ጠዋያተ፡ ፍናወ፡ እኩያን፡ ሊተ፡ ምክር፡ ወእዘዝ፡ ሊተ፡ አእምሮ፡ ወሊተ፡ ጽንዕ።

¹⁴ ብየ፡ ነገሥት፡ ይነግሡ፡ ወኃያላን፡ ይጽሕፉ፡ ጽድቀ።

¹⁵ ብየ፡ ዓቢያን፡ ይከብሩ፡ ወመኳንንት፡ ይእኅዙ፡ ምድረ።

¹⁶ አነ፡ እለ፡ ያፈቅሩኒ፡ አፈቅር፡ ወእለ፡ የኀሥሡ፡ ኪያየ፡ ይረክቡ፡ ሞገሰ።

¹⁷ ክብር፡ ወብዕል፡ ኀቤየ፡ ሀሎ፡ ወጥሪት፡ ብዙኅ፡ ወጽድቅ፡ ይኄይስ፡ ኪያሃ፡ ኀሪይ፡ እምወርቅ፡ ወእምዕንቊ፡ ክቡር።

¹⁸ ወፍሬ፡ ዚአየ፡ ይኄይስ፡ እምብሩር፡ ጽሩይ።

¹⁹ ወውስተ፡ ፍናወ፡ ጽድቅ፡ አንሶሱ፡ ወማእከለ፡ አሠረ፡ ጽድቅ፡ እትመያየጥ።

²⁰ ከመ፡ እከፍሎሙ፡ ጥሪተ፡ ለእለ፡ የአምሩኒ፡ ወመዛግብቲሆሙ፡ እምላእ፡ ተድላ።

²¹ እመ፡ ነገርኩክሙ፡ እንተ፡ ጸብሐት፡ ዘይከውን፡ ወዓዲ፡ እዜከር፡ ዘእምዓለም፡ ኊልቈ።

²² እግዚአብሔር፡ ፈጠረኒ፡ ቀዳሜ፡ ኵሉ፡ ተግባሩ፡ እምቅድመ፡ ይሣርር፡ ዓለመ።

²³ ወዘእንበለ፡ ይግበር፡ ምድረ፡ ወዘእንበለ፡ ይግበር፡ ቀላያተ፡ ወዘእንበለ፡ ይፃኡ፡ አንቅዕተ፡ ማያት።

²⁴ ወዘእንበለ፡ አድባር፡ ይተከሉ፡ (ይጠዓጥዑ)፡ ወእምቅድመ፡ አውግር፡ ወለደኒ።

²⁵ ወእምቅድመ፡ ይግበር፡ በሐውርተ፡ ወአጽናፈ፡ ዘይትኅደር፡ እምሰማይ።

²⁶ አመ፡ ያስተዴሉ፡ ሰማያተ፡ ሀሎኩ፡ ወአመ፡ ያጸንዕ፡ መንበረ፡ ዚአሁ፡ ላዕለ፡ ነፋሳት።

²⁷ ወአመ፡ ጽኑዐ፡ ይገብር፡ በመልዕልተ፡ ደመናት፡ ወአመ፡ ያፀንዕ፡ አንብሮ፡ አንቅዕተ፡ ማያት።

²⁸ ወአመ፡ ያነብር፡ ወሰነ፡ ለባሕር፡ ወማያት፡ ኢይፃኡ፡ እምአፈ፡ ዚአሁ።

²⁹ ወአመ፡ ጽኑዐ፡ ይገብር፡ ወሠረታተ፡ ምድር፡ ሀሎኩ፡ ምስሌሁ፡ እንዘ፡ አስተዋድድ።

³⁰ አነ፡ ይእቲ፡ እንተ፡ እትፌሣሕ፡ እንተ፡ ጽብሐት፡ ወእትኃሠይ፡ በበገጹ፡ በኵሉ፡ ጊዜ፡ ወአመ፡ ይትፌሣሕ፡ ዓለመ፡ ፈጺሞ፡ ወፍሥሓየኒ፡ በደቂቀ፡ እጓለ፡ እመሕያው።

³¹ ወይእዜኒ፡ ወልድየ፡ ስምዓኒ፡ ብፁዓን፡ እለ፡ የዓቅቡ፡ ፍኖትየ።

³² ስምዑ፡ ጥበበ፡ ወጥበቡ፡ ወኢትትፈፀሙ፡ ብፁዕ፡ ብእሲ፡ ዘይሰምዓኒ፡ ቃልየ።

³³ ወብፁዕ፡ ዘየዓቅብ፡ ፍኖትየ፡ ወይተግህ፡ ውስተ፡ አናቅጸ፡ ዚአየ፡ እንተ፡ ጸብሐት፡ ወዘየዓቅብ፡ ራግዛተ፡ ሙባእየ።

³⁴ እስመ፡ ፍናውየ፡ ፍናወ፡ ሕይወት፡ ዘረከበኒ፡ ረከበ፡ ሕይወተ፡ ወይዴላው፡ ፈቃዱ፡ በኀበ፡ እግዚአብሔር።

³⁵ ወእለሰ፡ ይኤብሱ፡ ላዕሌየ፡ ይጌግዩ፡ ላዕለ፡ ነፍሶሙ፡ ወእለ፡ ይጸልኡኒ፡ ያፈቅሩ፡ ሞተ።