Tagsas 4

The Ethiopic Bible (Ge'ez)

¹ ይጐይይ፡ ረሢዕ፡ እንዘ፡ አልቦ፡ ዘይዴግኖ፡ ወጻድቅሰ፡ ከመ፡ አንበሳ፡ ውኩል።

² በኃጢአተ፡ ረሲዐን፡ መቅሠፍት፡ ይትነሣእ፡ ወብእሲ፡ ጥዩቅ፡ ያጠፍኦ።

³ ጽኑዕ፡ በኃጢአት፡ ይትዔገል፡ ነዳየ፡ ከመ፡ ዝንመ፡ ሞገድ፡ ኢይበቊዕ፡ ከማሁ፡ እለ፡ የኀድጉ፡ ሕገ፡ ወይዌድስዋ፡ ለኃጢአት።

⁴ እለሰ፡ ያፈቅሩ፡ ሕገ፡ ይጠቅሙ፡ ለርእሶሙ፡ ቅጽረ፡ ወሰብእ፡ እኩያን፡ ኢይሌብዉ፡ ፍትሐ።

⁵ ወእለሰ፡ የኀሥሥዎ፡ ለእግዚአብሔር፡ ይሴብዉ፡ በኵሉ፡ ጊዜ።

⁶ ይኄይስ፡ ነዳየ፡ ዘየሐውር፡ በጽድቅ፡ እምባዕል፡ ሐሳዊ።

⁷ ዘየዓቅብ፡ ሕገ፡ ወልድ፡ ማእምር፡ ወዘሰ፡ ይሬእያ፡ ለዘማይዛወጋ፡ ለሙስና፡ ወያጼእል፡ አባሁ።

⁸ ዘያበዝኅ፡ ብዕሎ፡ በርዴ፡ ወበትዕግልት፡ ለዘይምሕር፡ ነዳየ፡ ያስተጋብእ።

⁹ ዘይመይጥ፡ ዕዝኖ፡ ከመ፡ ኢይስማዕ፡ ሕገ፡ ውእቱኒ፡ መነነ፡ ጸሎቶ።

¹⁰ ዘያስሕቶሙ፡ ለዕውራን፡ በፍኖት፡ እኪት፡ ውስተ፡ ሙስና፡ ይወድቅ፡ ወዓማፅያንሰ፡ የኃልፉ፡ እንተ፡ ሠናይ፡ ወኢይበውኡ፡ ውስቴታ።

¹¹ ጠቢብ፡ ለርእሱ፡ ብእሲ፡ ባዕል፡ ነዳይ፡ ማእምር፡ ያቅሌልዮ።

¹² በረድኤተ፡ ጻድቃን፡ ይከውን፡ ብዙኅ፡ ስብሐት፡ ወበፍናወ፡ ረሲዓን፡ ይትኀጐሉ፡ ሰብእ።

¹³ ዘይከድን፡ አበሳሁ፡ ኢይረትዕ፡ ፍናዊሁ፡ ወዘሰ፡ ይነግር፡ ወይዘልፍ፡ ገሃደ፡ ይትፈቀር።

¹⁴ ብፁዕ፡ ብእሲ፡ ዘይደነግፅ፡ በኵሉ፡ ጊዜ፡ በእንተ፡ ጽድቅ፡ ወጽኑዐ፡ ልብሰ፡ ይወድቅ፡ ውስተ፡ እኩይ።

¹⁵ አንበሳ፡ ርኁብ፡ ወተኵላ፡ ጽሙእ፡ ከማሁ፡ መኰንን፡ ረሲዕ፡ ላዕለ፡ ነዳይ፡ ዘይትዔገል፡ እንዘ፡ ነዳይ፡ ውእቱ፡ ሕዝበ፡ ጽኑሰ፡ ይከውን።

¹⁶ ንጉሥ፡ ነዳየ፡ አእምሮ፡ ጸባሕተ፡ ዓቢየ፡ ተዓሃሌ፡ ይከውን፡ ወዘሰ፡ ይጸልእ፡ ዓመፃ፡ ብዙኀ፡ መዋዕለ፡ የሐዩ።

¹⁷ ብእሲ፡ ዓማፂ፡ ዘይበውእ፡ በደመ፡ ሰብእ፡ ሶበ፡ ይወርድ፡ ውስተ፡ ግብ፡ ኢይእኅዝዎ፡ ብእሲ፡ ዘይትሔበይ፡ ርሱሐ፡ በቀትል፡ ሥሩር፡ ውእቱ፡ ወአኮ፡ ጽኑዕ።

¹⁸ መሐር፡ ወልደከ፡ ወያፈቅረከ፡ ወይሁብ፡ ሠርጐ፡ ለነፍስከ፡ ወኢይሰምዕ፡ ዘንተ፡ ሕገ፡ ሕዝብ፡ ዓማፂ።

¹⁹ ዘየሐውር፡ በጽድቅ፡ ርዱእ፡ ጠዋየሰ፡ ፍኖተ፡ ዘየሐውር፡ ይጸመር።

²⁰ ዘይትጌበር፡ ገራህቶ፡ ያበዝኅ፡ እክለ፡ ወዘሰ፡ ያበዝኀ፡ ጽርዓተ፡ ይዴግን፡ ንዴተ።

²¹ ብእሲ፡ ኄር፡ ብዙኀ፡ ይትአኰት፡ ወእኩይሰ፡ ኢይነጽሕ።

²² ኃፊረ፡ ገጽ፡ በፍትሕ፡ አኮ፡ ሠናይ፡ ወዘኢየኃፍር፡ ገጸ፡ ጻድቃን፡ አኮ፡ ኄር፡ ዘከመዝ፡ በፍተ፡ ኅብስት፡ ያገብእ፡ ሰብአ፡ ወይጌጊ።

²³ ይጔጒፅ፡ ይብዓል፡ ብእሲ፡ ሐማሚ፡ ወኢየአምር፡ ከመ፡ ብእሲ፡ መኀሪ፡ ይመልኮ።

²⁴ ዘይዘልፍ፡ ፍኖቶ፡ ለሰብእ፡ ይረክብ፡ ክብረ፡ ፈድፋደ፡ እምነ፡ ዘበልሳኑ፡ ያደሉ።

²⁵ ዘይትዔገል፡ አባሁ፡ ወእሞ፡ ወይብል፡ ኢ፡ አበስኩ፡ ዝንቱ፡ ውእቱ፡ ሱታፌሁ፡ ለብእሲ፡ ረሲዕ።

²⁶ ስሱዕ፡ ብእሲ፡ ከነቶ፡ ይፈትሕ፡ ወዘሰ፡ ተወከለ፡ በእግዚአብሔር፡ በአስተሐምሞ፡ ይሄሉ።

²⁷ ወዘይትአመን፡ በትፍሥሕተ፡ ልቡ፡ ዘከመዝ፡ ዓብድ፡ ውእቱ፡ ወዘየሐውርሰ፡ በጥበብ፡ ይድኅን።

²⁸ ዘይሁብ፡ ለነዳይ፡ ጽኑስ፡ ኢይፄነስ፡ ወዘሰ፡ ይመይጥ፡ ዓይኖሙ፡ ውስተ፡ ዓቢይ፡ ተጽናስ፡ ይሄሉ።

²⁹ ውስተ፡ መካነ፡ ረሲዓን፡ ይግዕሩ፡ ጻድቃን፡ ወበኃጒለ፡ ዚአሆሙ፡ ይበዝኁ፡ ጻድቃን።