Tagsas 5

The Ethiopic Bible (Ge'ez)

¹ ይኄይስ፡ ብእሲ፡ ዘይዘለፍ፡ እምብእሲ፡ ጽኑዐ፡ ክሳድ፡ እስመ፡ ግብተ፡ ይነድድ፡ ወአልቦ፡ ፈውስ።

² ወበተወድሶቶሙ፡ ለጻድቃን፡ ይትፌሥሑ፡ አሕዛብ፡ ወበመኳንንት፡ ረሲዓን፡ ይቴክዙ፡ እደው፡ ጻድቃን።

³ በወልድ፡ ዘያፈቅር፡ ጥበበ፡ ይትፌሣሕ፡ አቡሁ፡ ወዘሰ፡ ይሬኢ፡ ዘማተ፡ ያኃጒል፡ ብዕሎ።

⁴ ንጉሥ፡ ጻድቅ፡ ያነሥእ፡ ሀገረ፡ ወብእሲሰ፡ ዓማፂ፡ ይነሥት።

⁵ ዘይሠርዕ፡ በቅድመ፡ ዓርኩ፡ መሥገርተ፡ ይወድዮን፡ ውስቴቱ፡ ለአእጋረ፡ ዚአሁ።

⁶ በጌጋየ፡ ብእሲ፡ ይበዝኅ፡ መሥገርት፡ ወዘየኃጥእ፡ ብእሲ፡ ውስተ፡ ዓቢይ፡ መሥገርት፡ ይወድቅ፡ ወጻድቅሰ፡ ውስተ፡ ዓቢይ፡ ፍሥሓ፡ ወኃሤት፡ ይሄሉ።

⁷ የአምር፡ ጻድቅ፡ ፈቲሐ፡ ለነዳይ፡ ወረሲዕሰ፡ ኢየአምር፡ ጠይቆ፡ ወለነዳይሰ፡ ኢይሄልዎ፡ ልብ፡ ወአእምሮ።

⁸ ሰብእ፡ ጸዋጋን፡ አንደዱ፡ ሀገረ፡ ወጠበብትሰ፡ ሜጡ፡ መዓተ።

⁹ ብእሲ፡ ጠቢብ፡ ይኴንን፡ አሕዛበ፡ ወብእሲሰ፡ እኩይ፡ ይትመዓፅ፡ ይስሕቅዎ፡ ወኢያኀዝኖ።

¹⁰ ሰብእ፡ ሱቱፋን፡ በደም፡ ይጸልኡ፡ ጽድቀ፡ ወራትዓንሰ፡ የኃሥሡ፡ ነፍሰ።

¹¹ ኵሎ፡ መዓቶ፡ ያወጽእ፡ ዐብድ፡ ወጠቢብሰ፡ ይዘግብ፡ ዘእምውስቴቱ።

¹² ንጉሥ፡ ዘይሰምዕ፡ ነገረ፡ ግፍዕ፡ ወኵሎሙ፡ እለ፡ ኀቤሁ፡ ዓማፅያን።

¹³ ለቃሒ፡ ወተለቃሒ፡ ክልኤሆሙ፡ ተራኪቦሙ፡ ይሔውጾሙ፡ እግዚአብሔር፡ ኅቡረ፡ ለክልኤሆሙ።

¹⁴ ንጉሥ፡ ዘበጽድቅ፡ ይፈትሕ፡ ለነዳያን፡ መንበሩ፡ በሰላም፡ ለዓለም፡ ይቀውም።

¹⁵ ዝብጠት፡ ወተግሣፅ፡ ይሁብ፡ ጥበበ፡ ወልድ፡ ዘይስሕት፡ ያስተኃፍር፡ ዘመዶ።

¹⁶ በብዝኆሙ፡ ለረሲዓን፡ ይትገበር፡ ኃጢአት፡ ብዙኅ፡ ወጻድቃንሰ፡ በድቀቶሙ፡ ለእልክቱ፡ ፈራህያነ፡ ይከውኑ።

¹⁷ መሃር፡ ወልደከ፡ ወያዓርፈከ፡ ወይሁብ፡ ሠርጐ፡ ለነፍስከ።

¹⁸ በኃጢአ፡ መምህር፡ ይበዝኁ፡ ኃጥአን፡ ወኢይሄልዎ፡ መምህር፡ ለሕዝብ፡ ኃጥእ፡ ወዘሰ፡ የዓቅብ፡ ሕገ፡ ወልድ፡ ብፁዕ።

¹⁹ በቃል፡ ኢይትመሀር፡ ገብር፡ ጸዋግ፡ ወእመኒ፡ አእመረ፡ ኢይትኤዘዝ።

²⁰ እመኒ፡ ርኢከ፡ ብእሴ፡ ጒጒዐ፡ በቃል፡ አእምር፡ ከመ፡ ቦቱ፡ ተስፋ፡ ለዐብድ፡ እምኔሁ።

²¹ ነዛህሊል፡ ብእሲ፡ እምንእሱ፡ ይከውን፡ ገብረ፡ ወድኅረ፡ ያኃዝን፡ ርእሶ።

²² ብእሲ፡ መዓትም፡ ይከሪ፡ ጋእዘ፡ ወብእሲ፡ ቊጡዕ፡ ይከሪ፡ ኃጢአተ።

²³ ትዕቢት፡ ወጽእለት፡ ቴሕት፡ ብእሴ፡ ወለትሑተ፡ ሕሊናሰ፡ ያቀርቦ፡ እግዚአብሔር፡ ለክብር።

²⁴ ዘይትካፈል፡ ምስለ፡ ሰራቂ፡ ጸልአ፡ ነፍሶ፡ ወለእመ፡ መሐለ፡ አምጽኡ፡ ሎቱ፡ ይምኅል፡ ወዘሰምዐ፡ ኢይነግር፡ በፈሪህ።

²⁵ ወበኀፊረ፡ ገጽ፡ ይትዐቀጽ፡ ወዘሰ፡ ተወከለ፡ በእግዚአብሔር፡ ይትፌሣሕ።

²⁶ ጌጋዩ፡ ለብእሲ፡ ይሁቦ፡ አበሳ፡ ወዘሰ፡ ተአመነ፡ በእግዚአብሔር፡ ይድኅን።

²⁷ ብዙኀን፡ ይትለአኩ፡ ለገጸ፡ መኳንንት፡ ወእምኀበ፡ እግዚአብሔር፡ ይከውን፡ ጽድቁ፡ ወሀብቱ፡ ለብእሲ።

²⁸ ምኑን፡ ብእሲ፡ ጻድቅ፡ በኀበ፡ ብእሲ፡ ገፋዒ፡ ወርኩስ፡ ለኃጥእ፡ ፍኖት፡ ርትዕት።