Tagsas 6

The Ethiopic Bible (Ge'ez)

¹ እመ፡ ቦ፡ ዘረከበ፡ ብእሲተ፡ ጽንዕተ፡ ክብርት፡ ይእቲ፡ እምዕንቊ፡ ክቡር፡ ዘብዙኅ፡ ሤጡ።

² ለእንተ፡ ከመዝ፡ ብእሲት፡ ይትአመን፡ ባቲ፡ ልበ፡ ምታ፡ እንተ፡ ከመዝ፡ ብእሲት፡ አምሠናይ፡ ምህርካ፡ ኢተሐፅዖ።

³ ትትራድኦ፡ ለምታ፡ ሠናየ፡ በሠናይ፡ ወአኮ፡ እኩየ፡ በእኩይ፡ በኵሉ፡ መዋዕለ፡ ሕይወታ።

⁴ እንዘ፡ ትባዝት፡ ፀምረ፡ ወአጌ፡ ገብረት፡ ሠናየ፡ በእደዊሃ።

⁵ ወኮነት፡ ከመ፡ ሐመር፡ እንተ፡ ትትጌበር፡ እምርኁቅ፡ ወታስተጋብእ፡ ኵሎ፡ ብዕለ፡ ወትትነሣእ፡ በሌሊት፡ ወትሁብ፡ ሲሳየ፡ ለሰብአ፡ ቤታ፡ ወግብሮን፡ ለአዋልድ።

⁶ ርእየት፡ ወፍረ፡ ወተሣየጠት፡ ወእምፍሬ፡ እደዊሃ፡ ተከለት፡ ጥሪተ።

⁷ አጽኒዓ፡ ወቀኒታ፡ ኀቌሃ፡ አውጽአት፡ እደዊሃ፡ ለግብር።

⁸ ጥዕመት፡ ከመ፡ ሠናይ፡ ውእቱ፡ ተቀንዮ፡ ለምት፡ ወኢይጠፍእ፡ ኵሎ፡ ሌሊተ፡ ማኅቶታ።

⁹ ወእሰዊሃ፡ ትሰፍሕ፡ ዲበ፡ ዘይበቊዕ፡ ወእመታ፡ ታጸንዕ፡ ለፈቲል።

¹⁰ ወእደዊሃ፡ ፈትሐት፡ ለምስኪናን፡ ወእራኃ፡ ለፍሐት፡ ለነዳያን።

¹¹ ወኢይቴክዝ፡ ምታ፡ በእንተ፡ ቤቱ፡ እመቦ፡ ወእደ፡ ጐንደየ፡ ወኵሎሙ፡ እሊአሃ፡ እሩዛን፡ እሙንቱ፡ በበክልኤ።

¹² ክዑበ፡ ከለሜዳ፡ ገብረት፡ ለምታ፡ ዘቢሦስ፡ ወሜላተ፡ ገብረት፡ ላቲ፡ አልባሰ።

¹³ ወዘያስተርኢ፡ ይከውን፡ ምታ፡ በውስተ፡ አናቅጽ፡ ሶበ፡ ይነብር፡ በውስተ፡ ማኅበር፡ ምስለ፡ ሊቃናተ፡ ምድር።

¹⁴ ሰንዱናተ፡ ገብረት፡ ወጸገወቶ፡ ለምታ፡ ወንቊበታተ፡ ለከነዓናውያን፡ አፉሃ፡ ከሠተት፡ ዘበሕግ፡ ወዓቅመ፡ ሠርዓት፡ ለልሳና።

¹⁵ ኃይለ፡ ወላህየ፡ ለብሰት፡ ወተፈሥሐት፡ በመዋዕል፡ ደኃርያት።

¹⁶ ጽፉቅ፡ በዋዕይ፡ ቤታ፡ ኅብስተ፡ ሀኬት፡ ኢበልዐት፡ ሕግ፡ ወምጽዋት፡ ውስተ፡ አፉሃ፡ ወአፉሃ፡ ፈትሐት፡ በጥበብ፡ ወበሥርዓተ፡ ሕግ።

¹⁷ ወምጽዋታ፡ አልሀቀ፡ ውሉዳ፡ ወአብዓላ፡ ወወደሳ፡ ምታ።

¹⁸ ብዙኃት፡ አዋልድ፡ አጥረያ፡ ብዕለ፡ ወብዙኃት፡ ገብራ፡ ኃይለ፡ ወአንቲሰ፡ ትፈደፍዲ፡ ወተዓደውኪ፡ ኵሎን።

¹⁹ ሕስው፡ አሥምሮ፡ ወምኑን፡ ላህይ፡ እስመ፡ ብእሲት፡ ጠባብ፡ ትትባረክ፡ ወፈራሂተ፡ እግዚአብሔር፡ ይእቲ፡ ትሴባሕ።

²⁰ ሀብዋ፡ እምፍሬ፡ ከናፍሪሃ፡ ወይትአኰት፡ በአናቅጽ፡ ምታ።