Jubilees 10

The Ethiopic Bible (Ge'ez)

¹ ወበሱባዔ፡ ሣልስ፡ ዘኢዮቤልዉ፡ ዝንቱ፡ አኀዙ፡ አጋንንት፡ ርኩሳን፡ ያስሕትዎሙ፡ ለደቂቀ፡ ውሉደ፡ ኖኅ፡ ወያዕብድዎሙ፡ ወያሕጕልዎሙ።

² ወመጽኡ፡ ውሉደ፡ ኖኅ፡ ኀበ፡ ኖኅ፡ አቡሆሙ፡ ወነገርዎ፡ በእንተ፡ አጋንንት፡ እለ፡ ያስሕቱ፡ ወይጼልሉ፡ ወይቀትሉ፡ ውሉደ፡ ውሉዱ።

³ ወጸለየ፡ ቅድመ፡ እግዚአብሔር፡ አምላኩ፡ ወይቤ፡ አምላከ፡ መናፍስት፡ ዘውስተ፡ ኵሉ፡ ዘሥጋ፡ ዘገበርከ፡ ምስሌየ፡ ምሕረተ፡ ወአድኀንከኒ፡ ወውሉድየሂ፡ እምነ፡ ማየ፡ አይኅ፡ ወኢገበርከኒ፡ ከመ፡ እኅለቅ፡ ከመ፡ ገበርከ፡ ለውሉደ፡ ሐጉል፡ እስመ፡ ዐቢይ፡ ሣህልከ፡ ላዕሌየ፡ ወዐብየት፡ ምሕረትከ፡ ላዕለ፡ ነፍስየ።

⁴ ወአንተ፡ ባርከኒ፡ ኪያየ፡ ወውሉድየ፡ ንልሀቅ፡ ወንብዛኅ፡ ወንምልኣ፡ ለምድር።

⁵ ወአንተ፡ ታአምር፡ ዘከመ፡ ገብሩ፡ ትጉሃኒከ፡ አበዊሆሙ፡ ለእሉ፡ መንፈስ፡ በመዋዕልየ።

⁶ ወኢይመብሉ፡ በመንፈሰ፡ ሕያዋን፡ እስመ፡ አንተ፡ ባሕቲትከ፡ ታአምር፡ ኵነኔሆሙ፡ ወኢይትባውሑ፡ ላዕለ፡ ውሉደ፡ ጻድቃን፡ እምይእዜ፡ ወእስከ፡ ለዓለም።

⁷ ወይቤለነ፡ አምላክነ፡ ከመ፡ ንእስር፡ ኵሎ።

⁸ ወመጽአ፡ መልአከ፡ መናፍስት፡ መስቴማ፡ ወይቤ፡ እግዚአኦ፡ ፈጣሪ፡ አትርፍ፡ እምኔሆሙ፡ ቅድሜየ፡ ወይስምዑ፡ ቃልየ፡ ወይግበሩ፡ ኵሎ፡ ዘእቤሎሙ፡ እስመ፡ እመ፡ ኢተርፉ፡ ሊተ፡ እምውስቴቶሙ፡ ኢይክል፡ ገቢረ፡ ስልጣነ፡ ፈቃድየ፡ ውስተ፡ ውሉደ፡ ሰብእ።

⁹ ወይቤ፡ ይትረፉ፡ ቅድሜሁ፡ ዐሥራቶሙ፡ ወተስዓተ፡ መክፈልተ፡ ያውርድ፡ ውስተ፡ መካነ፡ ደይን።

¹⁰ ወለአሐዱ፡ እምኔነ፡ ይቤ፡ ከመ፡ ንምሀሮ፡ ለኖኅ፡ ኵሎ፡ ፈውሶሙ፡ እስመ፡ ያአምር፡ ከመ፡ አኮ፡ በርትዕ፡ ዘየሐውሩ፡ ወአኮ፡ በጽድቅ፡ ዘይትባአሱ።

¹¹ ወገበርነ፡ በከመ፡ ኵሉ፡ ቃሉ፡ ወኵሎ፡ እኩያነ፡ እለ፡ ይጸውጉ፡ አሰርነ፡ ውስተ፡ መካነ፡ ደይን፡ ወዐሥራቶሙ፡ አትረፍነ፡ ከመ፡ ይኰንኑ፡ ቅድመ፡ ሰይጣን፡ ዲበ፡ ምድር።

¹² ወፈውሰ፡ ደዌሆሙ፡ ኵሎ፡ ነገርናሁ፡ ለኖኅ፡ ምስለ፡ አስሕቶቶሙ፡ ከመ፡ ይፈውስ፡ በዕፀ፡ ምድር።

¹³ ወጸሐፈ፡ ኖኅ፡ ኵሎ፡ ዘከመ፡ መሀርናሁ፡ በመጽሐፍ፡ በኵሉ፡ ትዝምደ፡ ፈውስ፡ ወተዐፅዉ፡ መናፍስት፡ እኩያን፡ እምድኅሬሆሙ፡ ለውሉደ፡ ኖኅ።

¹⁴ ወወሀበ፡ ኵሎ፡ መጻሕፍተ፡ ዘጸሐፈ፡ ለሴም፡ ወልዱ፡ ዘይልህቅ፡ እስመ፡ ኪያሁ፡ ያፈቅር፡ ፈድፋደ፡ እምኵሉ፡ ውሉዱ።

¹⁵ ወኖመ፡ ኖኅ፡ ምስለ፡ አበዊሁ፡ ወተቀብረ፡ ውስተ፡ ሉባር፡ ደብር፡ በምድረ፡ አራራት።

¹⁶ ተስዓተ፡ ምእተ፡ ወኀምሳ፡ ዓመተ፡ ፈጸመ፡ በሕይወቱ፡ ዐሠርተ፡ ወተስዓተ፡ ኢዮቤልዉ፡ ወክልኤ፡ ሱባዔ።

¹⁷ ዘአፈድፈደ፡ ሐዪወ፡ ዲበ፡ ምድር፡ እምውሉደ፡ ሰብእ፡ በእንተ፡ ጽድቁ፡ ዘባቲ፡ ፍጹም፡ በጽድቁ፡ ዘእንበለ፡ ኤኖክ።

¹⁸ ወበሠላሳ፡ ወሠለስቱ፡ ኢዮቤልዉ፡ በዓመት፡ አሐዱ፡ በዝ፡ ካልእ፡ ሱባዔ፡ ነሥአ፡ ሎቱ፡ ፋሌክ፡ ብእሲተ፡ እንተ፡ ስማ፡ ሎምና፡ ወለተ፡ ሲናኦር፡ ወወለደት፡ ሎቱ፡ ወልደ፡ በዓመት፡ ራብዕ፡ ዘሱባዔ፡ ዝንቱ፡ ወጸውዐ፡ ስሞ፡ ራግው፡ እስመ፡ ይቤ፡ ናሁ፡ ውሉደ፡ ሰብእ፡ ኮኑ፡ እኩያነ፡ ለምክረ፡ ፁግ፡ ከመ፡ ይሕንጹ፡ ሎሙ፡ ሀገረ፡ ወማኅፈደ፡ ውስተ፡ ምድረ፡ ሰኖኦር።

¹⁹ እስመ፡ ፈለሱ፡ እምድረ፡ አራራት፡ መንገለ፡ ጽባሕ፡ ውስተ፡ ሰናኦር፡ እስመ፡ በመዋዕሊሁ፡ ሐነጽዎ፡ ለሀገር፡ ወለማኅፈድ፡ እንዘ፡ ይብሉ፡ ንዕርግ፡ ቦቱ፡ ውስተ፡ ሰማይ።

²⁰ ወአኀዙ፡ ይሕንጹ፡ ወበሱባዔ፡ ራብዕ፡ ወፈጡ፡ በእሳት፡ ወኮኖሙ፡ ግንፋል፡ ከመ፡ እብን፡ ወፅቡር፡ በዘ፡ ይመርዩ፡ ቦቱ፡ አስፋሊጦስ፡ ዘይወፅእ፡ እምነ፡ ባሕር፡ ወእምአንቅዕተ፡ ማያት፡ በምድረ፡ ሰናኦር።

²¹ ወሐነጽዎ፡ አርብዓ፡ ዓመተ፡ ወሠለስተ፡ ዓመተ፡ ሀለዉ፡ የሐንጽዎ፡ ግንፋለ፡ ፍጹመ፡ ሠለስተ፡ ወዐሠርተ፡ ውስቴቱ፡ ወሣልስተ፡ አሐቲ፡ ለኑኁ፡ ኀምሳ፡ ምእት፡ ወአርባዕቱ፡ ምእት፡ ወሠላሳ፡ ወሠላስ፡ በእመት፡ ዐርገ፡ ኑኁ።

²² ወይቤለነ፡ እግዚአብሔር፡ አምላክነ፡ ለነ፡ ናሁ፡ ሕዝብ፡ አሐዱ፡ ወወጠነ፡ ይግበር፡ ወይእዜኒ፡ ኢየሐልቅ፡ እምኔሆሙ።

²³ ወወረደ፡ እግዚአብሔር፡ ወወረድነ፡ ምስሌሁ፡ ንርአይ፡ ሀገረ፡ ወማኅፈደ፡ ዘሐነጹ፡ ውሉደ፡ ሰብእ።

²⁴ ወሦጠ፡ ኵሎ፡ ቃለ፡ ልሳናቲሆሙ፡ ወኢሰምዐ፡ እንከ፡ አሐዱ፡ ቃለ፡ ካልኡ፡ ወአንተጉ፡ እንከ፡ ሐኒጸ፡ ሀገር፡ ወማኅፈድ።

²⁵ በእንተዝ፡ ተሰምየት፡ ኵላ፡ ምድረ፡ ሰናኦር፡ ባቤል፡ እስመ፡ በህየ፡ ሦጠ፡ አምላክ፡ ኵሎ፡ ልሳናቲሆሙ፡ ለውሉደ፡ ሰብእ።

²⁶ ወፈነወ፡ እግዚአብሔር፡ ነፋሰ፡ ውስተ፡ ማኅፈደ፡ ወገፍትኦ፡ ውስተ፡ ምድር።

²⁷ በሱባዔ፡ ራብዕ፡ በአሐዱ፡ ዓመት፡ በቅድመ፡ ዚአሁ፡ ዘሠላሳ፡ ወአርባዕቱ፡ ኢዮቤልዉ፡ ተዘርዉ፡ እምድረ፡ ሰናኦር።

²⁸ ወሖሩ፡ ካም፡ ወውሉዱ፡ ውስተ፡ ምድር፡ እንተ፡ እኅዝት፡ ሎቱ፡ ዘረከበ፡ በመክፈልቱ፡ ውስተ፡ ምድረ፡ ደቡብ።

²⁹ ወርእየ፡ ከናአን፡ ምድረ፡ ሊባኖስ፡ እስከ፡ ሙሐዘ፡ ግብጽ፡ ከመ፡ ሠናይት፡ ይእቲ፡ ጥቀ።

³⁰ ወይቤሎ፡ ካም፡ አቡሁ፡ ወኵስ፡ ወመጽሬም፡ አኃዊሁ፡ እስመ፡ ኀደርከ፡ ውስተ፡ ምድር፡ እንተ፡ ኢኮነት፡ እንቲአከ፡ ወኢወፅአ፡ ለነ፡ በዕፀው፡ ኢትግበር፡ ከመዝ።

³¹ ኢትኅድር፡ ውስተ፡ ማኅደረ፡ ሴም።

³² ርጉም፡ አንተ፡ ወርጉመ፡ ትከውን፡ እምኵሎሙ፡ ውሉደ፡ ኖኅ፡ በመርገም፡ እንተ፡ ተሠራዕነ፡ በመሐላ፡ በቅድሜሁ፡ ለመኰንን፡ ቅዱስ፡ ወበቅድመ፡ ኖኅ፡ አቡነ።

³³ ወኢሰምዖሙ፡ ወኀደረ፡ ምድረ፡ ሊባኖስ፡ እምኤማት፡ እስከ፡ ምብዋአ፡ ግብጽ፡ ውእቱ፡ ወውሉዱ፡ እስከ፡ ዛቲ፡ ዕለት።

³⁴ ወበእንተዝ፡ ተሰምየት፡ ይእቲ፡ ምድር፡ ምድረ፡ ከናአን።

³⁵ ወያፌትሰ፡ ወውሉዱ፡ ሖሩ፡ መንገለ፡ ባሕር፡ ወኀደሩ፡ ውስተ፡ ምድረ፡ መክፈልቶሙ፡ ወርእየ፡ ማዳይ፡ ምድረ፡ ባሕር፡ ወኢአደመቶ፡ በቅድሜሁ፡ ወአስተብቍዐ፡ እምኀበ፡ ኤላም፡ ወአሱር፡ ወአርፋክስድ፡ እምኀበ፡ እኀወ፡ ብእሲቱ፡ ወኀደረ፡ ውስተ፡ ምድረ፡ ሜድቂን፡ ቅሩበ፡ ኀበ፡ እኅወ፡ ብእሲቱ፡ እስከ፡ ዛቲ፡ ዕለት።

³⁶ ወሰመየ፡ ምንባሪሁ፡ ወምንባረ፡ ውሉደ፡ ሜዲቂን፡ በስመ፡ ማዳይ፡ አቡሆሙ።