Jubilees 11

The Ethiopic Bible (Ge'ez)

¹ ወበሠላሳ፡ ወኃምስቱ፡ ኢዮቤልዉ፡ በሱባዔ፡ ሣልስ፡ በአሐዱ፡ ዓመቱ፡ ሎቱ፡ ነሥአ፡ ሎቱ፡ ራግው፡ ብእሲተ፡ ወስማ፡ አራ፡ ወለተ፡ ኡር፡ ወልደ፡ ኬሴድ፡ ወወለደት፡ ሎቱ፡ ወልደ፡ ወጸውዐ፡ ስሞ፡ ሴሩግ፡ በሳብዕ፡ ሱባዔሁ፡ ለዝ፡ ሱባዔ።

² ወበዝ፡ ኢዮቤልዉ፡ ወጠኑ፡ ውሉደ፡ ኖኅ፡ ይትቃተሉ፡ ለፄውዎ፡ ወለቀቲል፡ አሐዱ፡ አሐዱ፡ እኅዋሁ፡ ወለክዒወ፡ ደመ፡ ሰብእ፡ ዲበ፡ ምድር፡ ወለበሊዐ፡ ደም፡ ወለሐኒጸ፡ አህጉር፡ ጽኑዓት፡ ወጥቅም፡ ወማኅፈድ፡ ወለተልዕሎ፡ ብእሲ፡ ላዕለ፡ ሕዝብ፡ ወለሰዪመ፡ መቅድመ፡ መንግሥት።

³ ወሐነጸ፡ ኡድ፡ ወልደ፡ ኬሴድ፡ ሀገረ፡ አራሃ፡ እንተ፡ ከልዴዎን፡ ወሰመየ፡ ስማ፡ በስመ፡ ዚአሁ፡ ወበስመ፡ አቡሁ።

⁴ ወገብሩ፡ ሎሙ፡ ስብከዋተ፡ ወይሰግድ፡ አሐዱ፡ ለጣዖት፡ ዘገብረ፡ ለርእሱ፡ ስብኮ።

⁵ ወመኰንን፡ ወስቴማ፡ ይኄይል፡ ለግብረ፡ ዝንቱ፡ ኵሉ፡ ወይፌኑ፡ በእደ፡ መናፍስት፡ ለእለ፡ ተውህቡ፡ ታሕተ፡ እዴሁ፡ ለገቢረ፡ ኵሉ፡ ጌጋይ፡ ወኃጢአት፡ ወኵሉ፡ አበሳ፡ ለአማስኖ፡ ወለአሕጕሎ፡ ወለክዒወ፡ ደም፡ ዲበ፡ ምድር።

⁶ በእንተዝ፡ ተጸውዐ፡ ስሙ፡ ለሴሩክ፡ ሴሩክ፡ እስመ፡ ተመይጠ፡ ኵሉ፡ ለገቢረ፡ ኵሉ፡ ኃጢአት።

⁷ ወልህቀ፡ ወኀደረ፡ ውስተ፡ ኡር፡ ዘከላዴዎን፡ ቅሩበ፡ አበ፡ እመ፡ ብእሲቱ፡ ወኮነ፡ ያመልክ፡ ጣዖተ።

⁸ ወወለደት፡ ሎቱ፡ ናኮርሃ፡ በዓመት፡ ቀዳሚሁ፡ ለዝ፡ ሱባዔ፡ ወልህቀ፡ ወኀደረ፡ ውስተ፡ ኡር፡ ውስተ፡ ዘእለ፡ ኡር፡ ከለዳዊያን፡ ወመሀሮ፡ አቡሁ፡ ኁሣሤሆሙ፡ ለከለዳዊያን፡ ለተማርዮ፡ ወለተሰግሎ፡ በተአምረ፡ ሰማይ።

⁹ ወበሠላሳ፡ ወሰብዓቱ፡ ኢዮቤልዉ፡ በሱባዔ፡ ሳድስ፡ በአሐዱ፡ ዓመቱ፡ ሎቱ፡ ነሥአ፡ ብእሲተ፡ ወስማ፡ ኢያስካ፡ ወለተ፡ ኔስታግ፡ ዘከለዳዊያን።

¹⁰ ወወለደት፡ ሎቱ፡ ታራሃ፡ በዓመት፡ ሳብዕ፡ ለዝ፡ ሱባዔ።

¹¹ ወፈነወ፡ መኰንን፡ መስቴማ፡ ቋዓተ፡ ወአዕዋፈ፡ ከመ፡ ይብልዑ፡ ዘርአ፡ ዘይዘራእ፡ ውስተ፡ ምድር፡ ወለአማስኖ፡ ምድር።

¹² በእንተዝ፡ ጽውዐ፡ ስሞ፡ ታራ።

¹³ ወአኀዙ፡ ዓመታት፡ ይዕበሩ፡ እምቅድመ፡ ገጾሙ፡ ለአዕዋፍ፡ ወኵሎ፡ ፍሬ፡ ዕፅ፡ ይበልዑ፡ እምአእዋም፡ በኃይል፡ ዐቢይ፡ እመ፡ ክህሉ፡ አድኅኖ፡ ኅዳጠ፡ እምኵሉ፡ ፍሬ፡ ምድር፡ በመዋዕሊሆሙ።

¹⁴ ወበዝ፡ ሠላሳ፡ ወተስዓቱ፡ ኢዮቤልዉ፡ በሱባዔ፡ ካልእ፡ በቀዳሚ፡ ዓመት።

¹⁵ ወበዓመት፡ ሳብዕ፡ ለዝ፡ ሱባዔ፡ ወለደት፡ ሎቱ፡ ወልደ።

¹⁶ ወአኀዘ፡ ሕፃን፡ ያእምር፡ ስሕተተ፡ ምድር፡ ከመ፡ ኵሉ፡ ይስሕት፡ በድኅሬሆሙ፡ ለግልፎ፡ ወድኅረ፡ ርኵስ።

¹⁷ ወአኀዝ፡ ይጸሊ፡ ኀበ፡ ፈጣሬ፡ ኵሉ፡ ከመ፡ ያድኅኖ፡ እምስሕተተ፡ ውሉደ፡ ሰብእ።

¹⁸ ወበጽሐ፡ ጊዜ፡ ዘርእ፡ ለዘሪእ፡ ውስተ፡ ምድር።

¹⁹ ወደመና፡ ቋዓት፡ መጽኡ፡ ከመ፡ ይብልዑ፡ ዘርአ፡ ወአብራም፡ ይረውጽ፡ አንፃሪሆሙ፡ ዘእንበለ፡ ይንበሩ፡ ውስተ፡ ምድር፡ ወይኬልሕ፡ ላዕሌሆሙ፡ ዘእንበለ፡ ይንበሩ፡ ዲበ፡ ምድር፡ ለበሊዐ፡ ዘርእ፡ ወይብል፡ ኢትረዱ፡ ግብኡ፡ ውስተ፡ መካን፡ ኀበ፡ ወፃእክሙ፡ ወተመይጡ።

²⁰ ወገብረ፡ በይእቲ፡ ዕለት፡ ለደመና፡ ቋዓት፡ ሰብዓ፡ ወኢነበረ፡ እምኵሉ፡ ቋዓት፡ ውስተ፡ ኵሉ፡ ገራውህ፡ ኀበ፡ ሀሎ፡ አብራም፡ ህየ፡ ወኢአሐዱ።

²¹ ወይሬእይዎ፡ ኵሎሙ፡ እለ፡ ምስሌሁ፡ ውስተ፡ ኵሉ፡ ገራውህ፡ እንዘ፡ ይኬልሕ፡ ወኵሉ፡ ቋዓት፡ ተመይጡ።

²² ወመጽኡ፡ ኀቤሁ፡ በዓመት፡ ዝንቱ፡ ኵሎሙ፡ እለ፡ ይዘርኡ፡ ወሀሎ፡ የሐውር፡ ምስሌሆሙ፡ እስከ፡ አመ፡ የሐልቅ፡ ጊዜ፡ ዘርእ፡ ወዘርኡ፡ ምድሮሙ።

²³ ወበዓመት፡ አሐዱ፡ ዘሱባዔ፡ ኃምስ፡ መሀረ፡ አብራም፡ ለእለ፡ ይገብሩ፡ ንዋየ፡ አልህምት፡ ለኬነተ፡ ዕፅ፡ ወገብሩ፡ ንዋየ፡ በመልዕልተ፡ ምድር፡ በአንጻረ፡ ድጕር፡ ዕርፍ፡ ከመ፡ ያንብር፡ ላዕሌሁ፡ ዘርአ፡ ወይወርድ፡ እምውስቴቱ፡ ዘርእ፡ ውስተ፡ ከተማ፡ ዕርፍ፡ ወይትኀባእ፡ ውስተ፡ ምድር፡ ወኢይፈርሁ፡ እንከ፡ እምገጸ፡ ቋዓት።

²⁴ ወገብሩ፡ ከመዝ፡ ላዕለ፡ ኵሉ፡ ድጕረ፡ ዕርፍ፡ መልዕልተ፡ ምድር፡ ወዘርኡ፡ ወገብሩ፡ ኵሉ፡ ምድር፡ ዘከመ፡ አዘዞሙ፡ አብራም፡ ወኢይፈርሁ፡ እንከ፡ እምአዕዋፍ።