Jubilees 12

The Ethiopic Bible (Ge'ez)

¹ ወኮነ፡ በሱባዔ፡ ሳድስ፡ ዓመቱ፡ ሎቱ፡ ይቤ፡ አብራም፡ ለታራ፡ አቡሁ፡ እንዘ፡ ይብል፡ አባ፡ ወይቤ፡ ነየ፡ አነ፡ ወልድየ።

² ወይቤ፡ ምንተ፡ ረድኤተ፡ ወተድላ፡ ለነ፡ እምእሉ፡ ጣዖት፡ ዘአንተ፡ ታመልክ፡ ወትሰግድ፡ ቅድሜሆሙ።

³ እስመ፡ አልቦ፡ ላዕሌሆሙ፡ ምንተኒ፡ መንፈሰ፡ እስመ፡ ስግመት፡ እሙንቱ፡ ወስሕተተ፡ ልብ፡ እሙንቱ፡ ኢታምልክዎሙ።

⁴ አምልኩ፡ አምላከ፡ ሰማይ፡ ዘያወርድ፡ ዝናመ።

⁵ ለምንት፡ አንትሙ፡ ታመልኩ፡ እለ፡ አልቦሙ፡ መንፈሰ፡ ላዕሌሆሙ፡ እስመ፡ ግብረ፡ እደው፡ እሙንቱ፡ ወዲበ፡ መታክፍቲክሙ፡ አንትሙ፡ ትጸውርዎሙ፡ ወአልቦ፡ እምኔሆሙ፡ ለክሙ፡ ረጽኤተ፡ ዘእንበለ፡ ኀሳር፡ ዐቢይ፡ ለእለ፡ ይገብርዎሙ፡ ወስሕተተ፡ ልብ፡ ለእለ፡ ያመልክዎሙ፡ ኢታምልክዎሙ።

⁶ ወይቤሎ፡ አነሂ፡ አአምር፡ ወልድየ፡ ምንተ፡ እሬሲ፡ ለሕዝብ፡ እለ፡ አዘዙኒ፡ እትለአክ፡ ቅድሜሆሙ።

⁷ ወእመ፡ ነገርክዎሙ፡ ጽድቀ፡ ይቀትሉኒ፡ እስመ፡ ተለወት፡ ነፍሶሙ፡ ኀቤሆሙ፡ ከመ፡ ያምልክዎሙ፡ ወይሰብሕዎሙ።

⁸ ወነገረ፡ ዘንተ፡ ነገረ፡ ለክልኤ፡ አኃዊሁ፡ ወተምዕዑ፡ ላዕሌሁ፡ ወአርመመ።

⁹ ወበአርብዓ፡ ኢዮቤልዉ፡ በሱባዔ፡ ካልእ፡ በሳብዕ፡ ዓመቱ፡ ሎቱ፡ ነሥአ፡ ሎቱ፡ አብራም፡ ብእሲተ፡ ወስማ፡ ሶራ፡ ወለተ፡ አቡሁ፡ ወኮነቶ፡ ሎቱ፡ ብእሲተ።

¹⁰ ወአራን፡ እኁሁ፡ ነሥአ፡ ሎቱ፡ በዓመት፡ ሣልስ፡ ዘሱባዔ፡ ሣልስ፡ ወወለደት፡ ሎቱ፡ ወልደ፡ በዓመት፡ ሳብዕ፡ ዘሱባዔ፡ ዝንቱ፡ ወጸውዐ፡ ስሞ፡ ሎጥ።

¹¹ ወናኮርኒ፡ እኁሁ፡ ነሥአ፡ ሎቱ፡ ብእሲተ።

¹² ወበዓመት፡ ዘስሳ፡ ዘሕይወተ፡ አብራም፡ ውእቱ፡ ሱባዔ፡ ራብዕ።

¹³ ወተንሥኡ፡ ሌሊተ፡ ወፈቀዱ፡ ያድኅኑ፡ አማልክቲሆሙ፡ እማእከለ፡ እሳት።

¹⁴ ወሰረረ፡ አራን፡ ከመ፡ ያድኅኖሙ፡ ወነደደ፡ እሳት፡ ላዕሌሁ፡ ወውዕየ፡ በእሳት፡ ወሞተ፡ በኤኑር፡ ዘከላዴዎን፡ በቅድመ፡ ታራ፡ አቡሁ፡ ወቀበርዎ፡ በኤኑር፡ ዘከላዴዎን።

¹⁵ ወወፅአ፡ ታራ፡ እምነ፡ ኡር፡ ዘከለዳዊያን፡ ውእቱ፡ ወውሉዱ፡ ከመ፡ ይምጽኡ፡ ውስተ፡ ምድረ፡ ሊባኖስ፡ ወውስተ፡ ምድረ፡ ከናአን፡ ወኀደረ፡ ውስተ፡ ካራን።

¹⁶ ወበሳድስ፡ ሱባዔ፡ በዓመት፡ ኃምሱ፡ ሎቱ፡ ነበረ፡ አብራም፡ በሌሊት፡ በሠርቀ፡ ወርኅ፡ ሳብዕ፡ ከመ፡ ያበይን፡ ከዋክብተ፡ እምሰርክ፡ እስከ፡ ነግህ፡ ከመ፡ ይርአይ፡ ምንተ፡ ግብረ፡ ዓመት፡ በዝናማት፡ ወሀሎ፡ ውእቱ፡ ባሕቲቱ፡ ይነብር፡ ወያቤይን።

¹⁷ ወመጽአ፡ ውስተ፡ ልቡ፡ ቃል፡ ወይቤ፡ ኵሉ፡ ተአምረ፡ ከዋክብት፡ ወተአምሪሃ፡ ለወርኅ፡ ወለፀሐይ፡ ኵሉ፡ በእደ፡ እግዚአብሔር።

¹⁸ ለእመ፡ ፈቀደ፡ ያዘንም፡ ነግህ፡ ወሰርክ፡ ወእመ፡ ፈቀደ፡ ኢያወርድ፡ ወኵሉ፡ ውስተ፡ እዴሁ።

¹⁹ ወጸለየ፡ በዛቲ፡ ሌሊት፡ ወይቤ፡ አምላኪየ፡ አምላኪየ፡ አምላክ፡ ልዑል፡ አንተ፡ ባሕቲትከ፡ ሊተ፡ አምላክ፡ ወአንተ፡ ኵሎ፡ ፈጠርከ፡ ወግብረ፡ እደዊከ፡ ኵሉ፡ ኮነ፡ ወሀለወ፡ ወኪያከ፡ ወመለኮትከ፡ ኀረይኩ።

²⁰ አድኅነኒ፡ እምእደ፡ መናፍስት፡ እኩያን፡ እለ፡ ይሴለጡ፡ ውስተ፡ ኅሊና፡ ልበ፡ ሰብእ፡ ወኢያስሕቱኑ፡ እምድኅሬከ፡ አምላኪየ፡ ወትረስየኒ፡ ኪያየ፡ ወዘርእየ፡ አንተ፡ ለዓለም።

²¹ ወይቤ፡ እመ፡ እገብእሁ፡ ውስተ፡ ኡር፡ ዘከለዳዊያን፡ እለ፡ እሙንቱ፡ የኀሥሡ፡ ገጽየ፡ ከመ፡ እግባእ፡ ኀቤሆሙ፡ ወሚመ፡ እንበር፡ ዝየ፡ በዝ፡ መካን፡ ፍኖተ፡ ርቱዐ፡ ቅድሜከ፡ ኪያሃ፡ ሰርሕ፡ በእደ፡ ገብርከ፡ ይግበር፡ ወኢይሖር፡ በስሕተተ፡ ልብየ፡ አምላኪየ።

²² ወውእቱ፡ ሶበ፡ ፈጸመ፡ ተናግሮ፡ ወጸዕዮ።

²³ ወእባርከከ፡ ወአዐቢ፡ ስመከ፡ ወትከውን፡ ቡሩከ፡ ውስተ፡ ምድር።

²⁴ ወእከውነከ፡ ለከ፡ ወለወልድከ፡ ወለወልደ፡ ወልድከ፡ ወለኵሉ፡ ዘርእከ፡ አምላከ፡ ኢትፍራህ፡ እምይእዜ፡ ወእስከ፡ ኵሉ፡ ትዝምደ፡ ምድር፡ አነ፡ አምላክከ።

²⁵ ወይቤለኒ፡ እግዚአብሔር፡ አምላክ፡ ፍታሕ፡ አፉሁ፡ ወእዘኒሁ፡ ይስማዕ፡ ወይንብብ፡ በልሳኑ፡ በልሳን፡ እንተ፡ ታስተርኢ፡ እስመ፡ አዕረፈ፡ እምአፈ፡ ኵሉ፡ ውሉደ፡ ሰብእ፡ እምዕለተ፡ ድቀት።

²⁶ ወፈታሕኩ፡ አፉሁ፡ ወእዘኒሁ፡ ወከናፍሪሁ፡ ወአኀዝኩ፡ እትናገር፡ ምስሌሁ፡ ዕብራይስጥ፡ በልሳነ፡ ፍጥረት።

²⁷ ወነሥአ፡ መጻሕፍተ፡ አበዊሁ፡ ወጽሑፋት፡ እማንቱ፡ ዕብራይስጥ፡ ወደገሞን፡ ወአኀዘ፡ ይትመሀሮን፡ እምአሜሃ፡ ወአነ፡ አየድዖ፡ ኵሎ፡ ዘይሰአኖ።

²⁸ በዓመት፡ ሳብዕ፡ ዘሱባዔ፡ ሳድስ፡ ወተናገረ፡ ምስለ፡ አቡሁ፡ ወአይድዖ፡ ከመ፡ የሐውር፡ ውእቱ፡ እምካራን፡ ለሐዊረ፡ ምድረ፡ ከናአን፡ ይርአያ፡ ወይግባእ፡ ኀቤሁ።

²⁹ ወይቤሎ፡ ታራ፡ አቡሁ፡ ሖር፡ በሰላም፡ አምላከ፡ ዓለም፡ ያርትዕ፡ ፍኖተከ፡ ወእግዚአብሔር፡ ምስሌከ፡ ወይትማኅፀንከ፡ እምኩሉ፡ እኩይ።

³⁰ ወእመ፡ ርኢከ፡ ምድረ፡ አዳም፡ ለአዕይንቲከ፡ ለኀዲር፡ ውስቴታ፡ ነዓ፡ ወንሥአኒ፡ ኀቤከ፡ ወንሥኦ፡ ለሎጥ፡ ምስሌከ፡ ወልደ፡ አራን፡ እኁከ፡ ለከ፡ ለወልድ፡ እግዚአብሔር፡ ምስሌከ።

³¹ ወናኮርሃ፡ እኅዋከ፡ ኅድግ፡ ኀቤየ፡ እስከ፡ ትገብእ፡ በሰላም፡ ወነሐውር፡ ኵልነ፡ ኅቡረ፡ ምስሌከ።