Jubilees 13

The Ethiopic Bible (Ge'ez)

¹ ወሖረ፡ አብራም፡ እምካራን፡ ወነሥአ፡ ሶራይሃ፡ ብእሲቶ።

² ወርእየ፡ ወናሁ፡ ምድር፡ አዳም፡ ጥቀ፡ እምብዋአ፡ ኤማት፡ እስከ፡ ኀበ፡ ድርስ፡ ነዋኅ።

³ ወይቤሎ፡ እግዚአብሔር፡ ለከ፡ ወለዘርእከ፡ እሁብ፡ ዛተ፡ ምድረ።

⁴ ወሐነጸ፡ በህየ፡ ምሥዋዐ፡ ወአዕረገ፡ ዲቤሁ፡ ጽንሐሐ፡ ለእግዚአብሔር፡ ዘአስተርአዮ።

⁵ ወአንሥአ፡ እምህየ፡ ውስተ፡ ደብረ፡ ቤቴል፡ ዘመንገለ፡ ባሕር፡ ወአጌ፡ መንገለ፡ ጽባሕ፡ ወተከለ፡ ደብተራሁ፡ ህየ።

⁶ ወርእየ፡ ወናሁ፡ ምድር፡ ጽፍሕት፡ ወኄርት፡ ጥቀ፡ ወኵሉ፡ ይሠርፅ፡ ላዕሌሃ፡ አውያን፡ ወበለስ፡ ወሮማን፡ ዕፅ፡ ባላን፡ ወድርስ፡ ወጤሬቤንቶስ፡ ወዕፀወ፡ ዘይት፡ ወቄድሮስ፡ ወቄጲሪሶስ፡ ወሊባኖስ፡ ወኵሉ፡ ዕፀወ፡ ገዳም፡ ወማይ፡ ዲበ፡ አድባር።

⁷ ወባረኮ፡ ለእግዚአብሔር፡ ዘአውፅኦ፡ እምነ፡ ኡር፡ ዘከለዳዊያን፡ ወአምጽኦ፡ ውስተዝ፡ ደብር።

⁸ ወኮነ፡ በአሐዱ፡ ዓመት፡ በሱባዔ፡ ሳብዕ፡ በሠርቀ፡ ወርኅ፡ በዘ፡ ቀዳሚ፡ ሐነጸ፡ ምሥዋዐ፡ በዝ፡ ደብር፡ ወጸውዖ፡ በስመ፡ እግዚአብሔር፡ አንተ፡ አምላኪየ፡ አምላከ፡ ዘለዓለም።

⁹ ወአዕረገ፡ ዲበ፡ ምሥዋዕ፡ ጽንሐሐ፡ ለእግዚአብሔር፡ ከመ፡ የሀሉ፡ ምስሌሁ፡ ወኢይኅድጎ፡ ኵሎ፡ መዋዕለ፡ ሕይወቱ።

¹⁰ ወአንሥአ፡ እምህየ፡ ወሖረ፡ መንገለ፡ ደቡብ፡ ወበጽሐ፡ እስከ፡ ኬብሮን፡ ወኬብሮን፡ አሜሃ፡ ተሐንጸት፡ ወነበረ፡ ህየ፡ ዓመተ፡ ክልኤተ፡ ወሖረ፡ ውስተ፡ ምድረ፡ ደቡብ፡ እስከ፡ ቦአ፡ ሎጥ።

¹¹ ወሖረ፡ አብራም፡ ግብጽ፡ በሣልስ፡ ዓመት፡ ዘሱባዔ፡ ወኀደረ፡ ውስተ፡ ግብጽ፡ ኀምስተ፡ ዓመተ፡ ዘእንበለ፡ ትትሀየድ፡ ብእሲቱ።

¹² ወጠናይስ፡ ዘግብጽ፡ አሜሃ፡ ተሐብጸት፡ በሰብዓቱ፡ ክረምት፡ እምድኅረ፡ ኬብሮን።

¹³ ወኮነ፡ አመ፡ ሄዶ፡ ፈርዖን፡ ሶራይ፡ ብእሲቶ፡ ለአብራም፡ ቀሠፈ፡ እግዚአብሔር፡ ፈርዖንሃ፡ ወቤቶ፡ በመቅሠፍት፡ ዐቢይ፡ በእንተ፡ ሶራይ፡ ብእሲቱ፡ ለአብራም።

¹⁴ ወአብራም፡ ክቡር፡ በጥሪት፡ ጥቀ፡ በአባግዕ፡ ወበአልህምት፡ ወበአእዱግ፡ ወበአፍራስ፡ ወበአግማል፡ ወበአግብርት፡ ወበአእማት፡ ወበብሩር፡ ወበወርቅ፡ ፈድፋደ።

¹⁵ ወአግብአ፡ ፈርዖን፡ ሶራይሃ፡ ብእሲተ፡ አብራም፡ ወአፍለሶ፡ እምድረ፡ ግብጽ፡ ወሖረ፡ ውስተ፡ መካን፡ ኀበ፡ ተከለ፡ ደብተራሁ፡ እንተ፡ ቀዲሙ፡ ውስተ፡ መካነ፡ ምሥዋዐ፡ አጌ፡ እምጽባሐ፡ ቤቴል፡ ወባሕር፡ ወባሪኮ፡ ለእግዚአብሔር፡ አምላኩ፡ ዘሜጦ፡ በሰላም።

¹⁶ ወኮነ፡ በዝ፡ አርብዓ፡ ወአሐዱ፡ ኢዮቤልዎን፡ በሣልስ፡ ዓም፡ ዘሱባዔ፡ ቀዳሚ፡ ገብአ፡ ውስተ፡ ዝመካን፡ ወአዕረገ፡ በዲቤሁ፡ ጽንሐሐ፡ ወጸውዐ፡ በስመ፡ እግዚአብሔር፡ አምላክ፡ ልዑል፡ አምላኪየ፡ ለዓለመ፡ ዓለም።

¹⁷ ወበራብዕ፡ ዓመት፡ ዘዝ፡ ሱባዔ፡ ተፈልጠ፡ ሎጥ፡ እምኔሁ፡ ወኀደረ፡ ሎጥ፡ ውስተ፡ ሰዶም፡ ወሰብአ፡ ሰዶም፡ ኃጥኣን፡ ጥቀ።

¹⁸ ወአከዮ፡ በልቡ፡ እስመ፡ ተፈልጠ፡ ወልደ፡ እኁሁ፡ እምኔሁ፡ እስመ፡ አልቦ፡ ውሉደ።

¹⁹ በውእቱ፡ ዓመት፡ አመ፡ ተፄወወ፡ ሎጥ።

²⁰ እስመ፡ ኵላ፡ ምድረ፡ እንተ፡ ትሬኢ፡ ለከ፡ ወለዘርእከ፡ እመሁባ፡ እስከ፡ ለዓለም።

²¹ ተንሥእ፡ ወአንሶሱ፡ ውስተ፡ ኑኃ፡ ወርሕባ፡ ወርኢ፡ ኵሎ፡ እስመ፡ ለዘርእከ፡ እሁባ።

²² ወበዝ፡ ዓመት፡ መጽአ፡ ከደለጎሞር፡ ንጉሠ፡ ኤላም፡ አመርፋል፡ ንጉሠ፡ ሲናአር፡ ወአሪአክ፡ ንጉሠ፡ ሴለሳር፡ ወቴርጋል፡ ንጉሠ፡ አሕዛብ፡ ወቀተልዎ፡ ለንጉሠ፡ ጎሞር፡ ወጐየ፡ ንጉሠ፡ ሰዶም።

²³ ወፄወዉ፡ ሰዶምሃ፡ ወአዳማሃ፡ ወሴቦኤም፡ ወፄወውዎ፡ ለሎጥኒ፡ ወልደ፡ እኁሁ፡ ለአብራም፡ ሰኵሎ፡ ጥሪቶ፡ ወሖረ፡ እስከ፡ ዳን።

²⁴ ወመጽአ፡ ዘድኅነ፡ ወነገሮ፡ ለአብራም፡ ከመ፡ ተፄወወ፡ ወልደ፡ እኁሁ።

²⁵ ወአስተረሰየ፡ ልደ፡ ቤቱ፡ [ወሖረ፡ አብራም፡ ወቀተሎ፡ ለከደለጎሞር፡ ወየመይጠ፡ ወዐሠረ፡ ዐሥራተ፡ እምኵሉ፡ ወወሀቦ፡ ለመልከ፡ ጼዴቅ።

²⁶ ወአልቦ፡ ለዝ፡ ሕግ፡ ወሰነ፡ መዋዕል፡ እስመ፡ ትውልድ፡ ዘለዓለም፡ ሠርዖ፡ ከመ፡ የሀቡ፡ ዓሥራተ፡ እምኵሉ፡ ለእግዚአብሔር፡ እምዘርእ፡ ወእምወይን፡ ወእምቅብእ፡ ወእምአልህምት፡ ወእምአባግዕ።

²⁷ ወውእቱ፡ ወሀበ፡ ለካህናቲሁ፡ ለበሊዕ፡ ወለሰቲይ፡ በፍሥሓ፡ በቅድሜሁ።

²⁸ ወበጽሐ፡ ኀቤሁ፡ ንጉሠ፡ ሰዶም፡ ወሰገደ፡ ቅድሜሁ፡ ወይቤ፡ እግዚእነ፡ አብራም፡ ጸግወነ፡ ነፍሰ፡ እለ፡ ባለሕከ፡ ወምህርካሁሰ፡ ይኩንከ።

²⁹ ወይቤሎ፡ አብራም፡ ሎቱ፡ አነሥእ፡ እደዊየ፡ ኀበ፡ አምላክ፡ ልዑል፡ እምፈትል፡ እስከ፡ ቶታነ፡ አሣእን፡ እመ፡ እነሥእ፡ እምኵሉ፡ ዘዚአከ፡ ከመ፡ ኢትኩን፡ በሃሌ፡ አነ፡ አብዐልክዎ፡ ለአብራም።