Jubilees 14

The Ethiopic Bible (Ge'ez)

¹ ወእምድኅረ፡ ዝነገር፡ በራብዕ፡ ዓመት፡ ዘዝ፡ ሱባዔ፡ በሠርቀ፡ ሣልስ፡ ወርኅ፡ ኮነ፡ ቃለ፡ እግዚአብሔር፡ ኀበ፡ አብራም፡ በሕልም፡ እንዘ፡ ይብል፡ ኢትፍራህ፡ አብራም፡ አነ፡ ውእቱ፡ ቃውምከ፡ ወዐስብከ፡ ይፈደፍድ፡ ጥቀ።

² ወይቤ፡ እግዚኦ፡ እግዚኦ፡ ምንተ፡ ትሁበኒ፡ ወአንሰ፡ አሐውር፡ ዘእንበለ፡ ውሉድ፡ ወወልደ፡ ማሴቅ፡ አመትየ፡ ውእቱ፡ ደማስቆስ፡ ኤሌኤዜር፡ ውእቱ፡ ይወርሰኒ፡ ወሊተ፡ ኢወሀብከኒ፡ ዘርአ፡ ሀበኒ፡ ዘርአ።

³ ወይቤሎ፡ ኢይወርሰከዝ፡ ዘእንበለ፡ ዘይወፅእ፡ እምከርሥከ፡ ውእቱ፡ ይወርሰከ።

⁴ ወአውፅኦ፡ አፍአ፡ ወይቤሎ፡ ነጽር፡ ውስተ፡ ሰማይ፡ ወኆልቍ፡ ከዋክብተ፡ እመ፡ ትክል፡ ኆልቆቶሙ።

⁵ ወነጸረ፡ ሰማየ፡ ወርእየ፡ ከዋክብተ፡ ወይቤሎ፡ ከመዝ፡ ይከውን፡ ዘርእከ።

⁶ ወአምኖ፡ ለእግዚአብሔር፡ ወተኆለቆ፡ ጽድቀ።

⁷ ወይቤሎ፡ አነ፡ እግዚአብሔር፡ ዘአውፃእኩከ፡ እምነ፡ ኡር፡ ዘከለዳዊያን፡ ከመ፡ አሀብከ፡ ምድረ፡ ከነናዊያን፡ ለእኂዝ፡ ለዓለም፡ ወለከዊነ፡ ለከ፡ አምላከ፡ ወለዘርእከ፡ እምድኅሬከ።

⁸ ወይቤ፡ እግዚኦ፡ እግዚኦ፡ በምንት፡ አአምር፡ ከመ፡ እወርስ።

⁹ ወይቤሎ፡ ንሣእ፡ ሊተ፡ ጠዕዋ፡ ዘሠለስቱ፡ ዓመት፡ ወጠሌ፡ ዘሠለስቱ፡ ዓመት፡ ወበግዐ፡ ዘሠለስቱ፡ ዓመት፡ ወመንጤተ፡ ወርግበ።

¹⁰ ወነሥአ፡ ዘንተ፡ ኵሎ፡ በመንፈቀ፡ ወርኅ፡ ወውእቱ፡ ይነብር፡ ኀበ፡ ድራይ፡ ዘማምሪ፡ እንተ፡ ይእቲ፡ ቅሩበ፡ ኬብሮን።

¹¹ ወሐነጸ፡ ምሥዋዐ፡ ህየ፡ ወዘብሐ፡ ዘንተ፡ ኵሎ፡ ወከዐወ፡ ደሞሙ፡ ውስተ፡ ምሥዋዕ፡ ወነፈቆሙ፡ እማእከል፡ ወአንበሮሙ፡ አንጸራቲሆሙ፡ በበ፡ ገጾሙ፡ ወአዕዋፍሰ፡ ኢነተፈ።

¹² ወይወርዱ፡ አዕዋፍ፡ ዲበ፡ ስፍሕ፡ ወይከልኦሙ፡ አብራም፡ ወኢየኀድግ፡ አዕዋፍ፡ ይልክፍዎን።

¹³ ወኮነ፡ ሶበ፡ ዕርበተ፡ ፀሐይ፡ ድንጋፄ፡ ወድቀ፡ ላዕለ፡ አብራም፡ ወናሁ፡ ግርማ፡ ዐቢይ፡ ጽልመት፡ ወድቀ፡ ላዕሌሁ፡ ወተብህለ፡ ለአብራም፡ አእምሮ፡ አእምር፡ ከመ፡ ፈላሴ፡ ይከውን፡ ዘርእከ፡ ውስተ፡ ምድረ፡ ነኪር፡ ወይቀንይዎሙ፡ ወያሐምምዎሙ፡ አርባዕተ፡ ምእተ፡ ዓመተ።

¹⁴ ወለሕዝብኒ፡ እለ፡ ይትቀነዩ፡ አነ፡ እፈትሕ፡ ሎሙ።

¹⁵ ወአንተ፡ ተሐውር፡ ኀበ፡ አበዊከ፡ በሰላም፡ ወትትቀበር፡ በርስእ፡ ሠናይ።

¹⁶ ወበትውልድ፡ ራብዕ፡ ይትመየጡ፡ ዝየ፡ እስመ፡ ኢተፈጸመ፡ ኃጢአቶሙ፡ ለአሞሬዎን፡ እስከ፡ ይእዜ።

¹⁷ ወነቅህ፡ እምንዋም፡ ወተንሥአ፡ ወፀሐይ፡ ዐረበ፡ ወነድ፡ ኮነ፡ ወናሁ፡ እቶን፡ ይጠይስ፡ ወነበልባለ፡ እሳት፡ ኀለፈ፡ ማእከለ፡ ስፋሔ።

¹⁸ ወበይእቲ፡ ዕለት፡ ተካየደ፡ ኪዳነ፡ እግዚአብሔር፡ ምስለ፡ አብራም፡ እንዘ፡ ይብል፡ ለዘርእከ፡ እሁብ፡ ዛተ፡ ምድረ፡ እምፈለገ፡ ግብጽ፡ እስከ፡ ፈለገ፡ ዐቢይ፡ ፈለገ፡ ኤውፍራጢስ፡ ለቄኔውስ፡ ወለቄኔዜውስ፡ ወለቅድሞኔውስ፡ ወለፌሬዜውስ፡ ወለረፌእያን፡ ወለፈከሬውስ፡ ወለኤዌውስ።

¹⁹ ወኀለፈ፡ ወአዕረገ።

²⁰ ወበዛቲ፡ ሌሊት፡ ተካየድነ፡ ኪዳነ፡ ምስለ፡ አብራም፡ በከመ፡ ኪዳን፡ ዘተካየድነ፡ በዛቲ፡ ወርኅ፡ ምስለ፡ ኖኅ።

²¹ ወተፈሥሐ፡ አብራም፡ ወአይድዐ፡ ዘንተ፡ ኵሎ፡ ለሰራይ፡ ብእሲቱ።

²² ወአምከረቶ፡ ሰራይ፡ ለአብራም፡ ምታ፡ ወትቤሎ፡ ባእ፡ ኀበ፡ አጋር፡ ልእክትየ፡ ግብጻዊት፡ እመቦ፡ ከመ፡ አሐንጽ፡ ለከ፡ እምኔሃ፡ ዘርአ።

²³ ወስምዐ፡ አብራም፡ ቃለ፡ ሰራይ፡ ብእሲቱ፡ ወይቤላ፡ ግበሪ።

²⁴ ወቦአ፡ ኀቤሃ፡ ወፀንሰት፡ ወወለደት፡ ወልደ።