Jubilees 15

The Ethiopic Bible (Ge'ez)

¹ ወበዓመት፡ ኃምስ፡ ዘሱባዔ፡ ዘራብዑ፡ ለኢዮቤልውን፡ ዝንቱ፡ በወርኅ፡ ሣልስ፡ በመንፈቀ፡ ወርኅ፡ ገብረ፡ አብራም፡ በዓለ፡ ቀዳሜ፡ ማእረረ፡ ዘዘርአ፡ ሥርናይ።

² ወአዕረገ፡ መሥዋዕተ፡ ሐዲስ፡ ዲበ፡ ምሥዋዕ፡ ቀዳሜ፡ እክል፡ ለእግዚአብሔር።

³ ወአስተርአዮ፡ እግዚአብሔር፡ ወይቤሎ፡ እግዚአብሔር፡ ለአብራም፡ አነ፡ አምላከ፡ ሰዳይ፡ ወአሥምር፡ በቅድሜየ፡ ወኩን፡ ፍጹመ።

⁴ ወእሁብ፡ ኪዳንየ፡ ማእከሌየ፡ ወማእከሌከ፡ ወአልህቀከ፡ ጥቀ።

⁵ ወወድቀ፡ አብራም፡ በገጹ፡ ወተናገሮ፡ እግዚአብሔር፡ ወይቤ።

⁶ ናሁ፡ ሥርዓትየ፡ ምስሌከ፡ ወእሬስየከ፡ አበ፡ ለብዙኃን፡ አሕዛብ።

⁷ ወኢይጼዋዕ፡ እንከ፡ ስምከ፡ አብራም፡ ወይኩን፡ ስምከ፡ እምይእዜ፡ ወእስከ፡ ለዓለም፡ አብርሃም፡ እስመ፡ አበ፡ ብዙኃን፡ አሕዛብ፡ ሤምኩከ።

⁸ ወአዐብየከ፡ ጥቀ።

⁹ ወእሁብ፡ ኪዳንየ፡ ማእከሌየ፡ ወማእከሌከ፡ ወማእከለ፡ ዘርእከ፡ እምድኅሬከ፡ በትዝምዶሙ፡ ወለሥርዓት፡ ዘለዓለም፡ ከመ፡ እኩንከ፡ አምላከ፡ ወለዘርእከ፡ እምድኅሬከ።

¹⁰ [ወእሁብ፡ ለከ፡ ወለዘርእከ፡ እምድኅሬከ]፡ ምድረ፡ ኀበ፡ ፈለስከ፡ ምድረ፡ ከናአን፡ ዘትኴንን፡ ለዓለም፡ ወእከውኖሙ፡ አምላከ።

¹¹ ወይቤሎ፡ እግዚአብሔር፡ ለአብርሃም፡ ወአንተኒ፡ ኪዳንየ፡ ዕቀብ፡ አንተ፡ ወዘርእከ፡ እምድኅሬከ፡ ተከሰቡ፡ ኵሎ፡ ሮስክሙ፡ ወተከሰቡ፡ ቍልፈተክሙ፡ ወይከውን፡ ትእምርተ፡ ሥርዓትየ፡ ዘለዓለም፡ ማእከሌየ፡ ወማእከሌክሙ።

¹² ወለወልድ፡ አመ፡ ሳምንት፡ ዕለት፡ ትከስብዎ፡ ኵሎ፡ ሮሰ፡ በትዝምድክሙ፡ ወልደ፡ ቤት።

¹³ ክስበተ፡ ይትከሰብ፡ ልደ፡ ቤትከ፡ ወዘበወርቅ፡ ተሣየጥከ፡ ይትከሰቡ።

¹⁴ ወዘኢኮነ፡ ክሱበ፡ ሮስ፡ ዘኢተከስበ፡ ሥጋ፡ ቍልፈቱ፡ በዕለተ፡ ሳምንት፡ ትሤሮ፡ ይእቲ፡ ነፍስ፡ እምዘመዳ፡ እስመ፡ ኪዳንየ፡ ነሠተ።

¹⁵ ወይቤሎ፡ እግዚአብሔር፡ ለአብርሃም፡ ሶራ፡ ብእሲትከ፡ ኢትጸዋዕ፡ እንከ፡ ስማ፡ ሶራ፡ እስመ፡ ሳራ፡ ስማ።

¹⁶ ወእባርካ፡ ወእሁበከ፡ እምኔሃ፡ ወልደ፡ ወእባርኮ፡ ወይከውን፡ ሕዝበ፡ ወነገሥተ፡ አሕዛብ፡ እምኔሁ፡ ይከውኑ።

¹⁷ ወወድቀ፡ አብርሃም፡ በገጹ፡ ወተፈሥሐ፡ ወይቤ፡ በልቡ፡ እመ፡ ለዘ፡ ምእትኑ፡ ዓመቱ፡ ይትወለድ፡ ወልድ፡ ወሳራሂ፡ እንተ፡ ተስዓ፡ ዓመታ፡ ትወልድ።

¹⁸ ወይቤሎ፡ አብርሃም፡ ለእግዚአብሔር፡ መፍትው፡ ይሕየው፡ ይስማዔል፡ ቅድሜከ።

¹⁹ ወይቤ፡ እግዚአብሔር፡ ኦሆ።

²⁰ ወበእንተ፡ ይስማዔልሂ፡ ሰማዕኩከ፡ ወናሁ፡ እባርኮ፡ ወአልህቆ፡ ወአበዝኆ፡ ጥቀ።

²¹ ወኪዳንየ፡ አቀውም፡ ምስለ፡ ይስሐቅ፡ ዘትውልድ፡ ለከ፡ ሳራ፡ በዝ፡ መዋዕል፡ በዓመት፡ ካልእ።

²² ወፈጺሞ፡ እንዘ፡ ይትናገር፡ ምስሌሁ፡ ወዐርገ፡ እግዚአብሔር፡ እመልዕልተ፡ አብርሃም።

²³ ወገብረ፡ አብርሃም፡ በከመ፡ ይቤሎ፡ እግዚአብሔር፡ ወነሥአ፡ ይስማዔልሃ፡ ወልዶ፡ ወኵሎ፡ ልደ፡ ቤቱ፡ ወዘሂ፡ በወርቅ፡ ተሣየጠ፡ ኵሎ፡ ሮሰ፡ ዘውስተ፡ ቤቱ፡ ወከሰበ፡ ሥጋ፡ ምክሳቦሙ።

²⁴ ወበጊዜ፡ ዛቲ፡ ዕለት፡ ተከስበ፡ አብርሃም፡ [ወልደ፡ ቤቱ]፡ ወሰብአ፡ ቤቱ፡ ወኵሎሙ፡ እለ፡ በወርቅ፡ ተሣየጠ፡ ወእምውሉደ፡ ነኪራንኒ፡ ተከስቡ፡ ምስሌሁ።

²⁵ ወዝሕግ፡ ለኵሉ፡ ትውልድ፡ ዘለዓለም፡ ወአልቦ፡ ክስበተ፡ መዋዕል።

²⁶ ወኵሉ፡ ዘትውልደ፡ ዘኢተከስበ፡ ሥጋ፡ ነፍስቱ፡ እስከ፡ ሰሙን፡ ዕለት፡ ኢኮነ፡ እምውሉደ፡ ሥርዓት፡ ዘትካየደ፡ እግዚአብሔር፡ ለአብርሃም፡ እስመ፡ እምነ፡ ውሉደ፡ ሙስና።

²⁷ እስመ፡ ኵሎሙ፡ መላእክተ፡ ገጽ።

²⁸ ወአንተኒ፡ አዝዝ፡ ለውሉደ፡ እስራኤል፡ ወይዕቀቡ፡ ትእምርተዝ፡ ኪዳን፡ ለትውልዶሙ፡ ለሥርዓት፡ ዘለዓለም፡ ወኢይሠረው፡ እምነ፡ ምድር።

²⁹ እስመ፡ ትእዛዝ፡ ተሠርዐ፡ ለኪዳን፡ ከመ፡ ይዕቀብዎ፡ ለዓለም።

³⁰ እስመ፡ ይስማዔልሃ፡ ወውሉዶ፡ ወአኃዊሁ፡ ወዔሳውሃ፡ ኢያቅረቦ፡ ኀቤሁ፡ እግዚአብሔር፡ ወኢኀረየ፡ ቦሙ፡ እስመ፡ እምውሉደ፡ አብርሃም፡ እሙንቱ፡ እስመ፡ አእመሮሙ፡ ወእስራኤልሃ፡ ኀረየ፡ ይኩንዎ፡ ሕዝበ።

³¹ ወቀደሶ፡ ወአስተጋብአ፡ እምኵሉ፡ ውሉደ፡ ሰብእ።

³² ወዲበ፡ እስራኤልሰ፡ ኢያስለጠ፡ ወኢመነሂ፡ መልአከ፡ ወመንፈሰ።

³³ ወይእዜኒ፡ አነ፡ እዜንወከ፡ ከመ፡ በዛቲ፡ ሥርዓት፡ ይሔስዉ፡ ውሉደ፡ እስራኤል፡ ወኢይከስቡ፡ ውሉዶሙ፡ በከመ፡ ኵሉ፡ ዝሕግ፡ እስመ፡ እምሥጋ፡ ክስበቶሙ፡ ይከውኑ፡ መትርፋነ፡ ውስተ፡ ክስበተ፡ ውሉዶሙ፡ ወኵሎሙ፡ ውሉደ፡ ቤልአር፡ የኀድጉ፡ ውሉዶሙ፡ ዘእንበለ፡ ክስበት፡ በከመ፡ ተወልዱ።

³⁴ ወትከውን፡ መዓት፡ ላዕለ፡ ውሉደ፡ እስራኤል፡ ዐባይ፡ እምኀበ፡ እግዚአብሔር፡ እስመ፡ ኀደጉ፡ ኪዳኖ፡ ወእምቃሉ፡ ተግኅሡ፡ ወወሐኩ፡ ወፀረፉ፡ በከመ፡ ኢገብሩ፡ ሥርዓቶ፡ ለዝ፡ ትእምርተ።