Jubilees 16

The Ethiopic Bible (Ge'ez)

¹ ወበሠርቀ፡ ወርኅ፡ ራብዕ፡ አስተርአይናሁ፡ ለአብርሃም፡ በኀበ፡ ድርስ፡ ዘማምሪም፡ ወተናገርነ፡ ምስሌሁ፡ ወንሕነ፡ አይዳዕናሁ፡ ከመ፡ ይትወሀቦ፡ ወልድ፡ እምሳራ፡ ብእሲቱ።

² ወሰሐቀት፡ ሳራ፡ እስመ፡ ሰምዐት፡ ከመ፡ ተናገርነ፡ ዘንተ፡ ቃለ፡ ምስለ፡ አብርሃም።

³ ወነገርናሃ፡ ስሞ፡ ለወልዳ፡ በከመ፡ ሥሩዕ፡ ወጽሑፍ፡ ውስተ፡ ጽላተ፡ ሰማይ፡ ይስሐቅ።

⁴ ወአመ፡ ገባእነ፡ ኀቤሃ፡ በጊዜ፡ ሰዓት፡ ወይእቲኒ፡ ፀንሰት፡ ወልደ።

⁵ ወበዝ፡ ወርኅ፡ ገብረ፡ እግዚአብሔር፡ ኵነኔሆሙ፡ ለሰዶም፡ ወለገሞራ፡ ወሶቦኤም፡ ወለኵሉ፡ አድያመ፡ ዮርዳኖስ፡ ወአውዓዮሙ፡ በእሳት፡ ወበተይ፡ ወአጥፍኦሙ፡ እስከ፡ ዛቲ፡ ዕለት።

⁶ ወከማሁ፡ ይገብር፡ እግዚአብሔር፡ ኵነኔ፡ በመካናት፡ በውእደ፡ ይገብሩ፡ በከመ፡ ይኵሶሙ፡ ለሰዶም፡ ከመ፡ ኵነኔሃ፡ ለሰዶም።

⁷ ወለሎጥ፡ ናድኅኖ፡ እስመ፡ ተዘከሮ፡ እግዚአብሔር፡ ለአብርሃም፡ ወአውፅኦ፡ እማእከለ፡ ግፍታኤ።

⁸ ወገብረ፡ ውእቱኒ፡ ወአዋልዲሁኒ፡ ኀጢአተ፡ በዲበ፡ ምድር፡ ዘኢኮነ፡ ዲበ፡ ምድር፡ እመዋዕለ፡ አዳም፡ እስከ፡ አሜሁ፡ እስመ፡ ሰከበ፡ ብእሲ፡ ምስለ፡ ወለቱ።

⁹ ወናሁ፡ ተአዘዘ፡ ወተቈርፀ፡ ላዕለ፡ ኵሉ፡ ዘርኡ፡ ውስተ፡ ጽላተ፡ ሰማይ፡ ከመ፡ ያእትቶሙ፡ ወከመ፡ ይሠርዎሙ፡ ወከመ፡ ይግበር፡ ኵነኔሆሙ፡ በከመ፡ ኵነኔ፡ ሰዶም፡ ወከመ፡ ኢያትርፍ፡ ሎቱ፡ ኵሎ፡ ዘርአ፡ ውስተ፡ ምድር፡ ዘሰብእ፡ በዕለተ፡ ደይን።

¹⁰ ወአዝንቱ፡ ወርኅ፡ ግዕዘ፡ አብርሃም፡ እምነ፡ ኬብሮን፡ ወሖረ፡ ወኀደረ፡ ማእከለ፡ ቃዴስ፡ ወሱር፡ ውስተ፡ አድባረ፡ ጌራሮን።

¹¹ ወበመንፈቀ፡ ወርኅ፡ ኃምስ፡ ግዕዘ፡ እምህየ፡ ወኀደረ፡ ኀበ፡ ዐዘቅተ፡ መሐላ።

¹² ወበመንፈቀ፡ ወርኅ፡ ሳድስ፡ ሐወጸ፡ እግዚአብሔር፡ ለሳራ፡ ወገብረ፡ ላቲ፡ በከመ፡ ይቤ።

¹³ ወፀንሰት፡ ወወለደት፡ ወልደ፡ በወርኅ፡ ሣልስ፡ ወበመንፈቀ፡ ወርኅ፡ በመዋዕል፡ ዘይቤሎ፡ እግዚአብሔር፡ ለአብርሃም፡ በበዓለ፡ ቀዳሚ፡ ማእረር፡ ተወልደ፡ ይስሐቅ።

¹⁴ ወከሰቦ፡ አብርሃም፡ ወልደ፡ መዋዕል፡ ሰሙን፡ ውእቱ፡ ቀዳሚ፡ ተከስበ፡ በከመ፡ ኪዳን፡ እንተ፡ ተሠርዐት፡ ለዓለም።

¹⁵ ወበዓመት፡ ሳድስ፡ ዘሱባዔ፡ ራብዕ፡ መጻእነ፡ ኀበ፡ አብርሃም፡ ኀበ፡ ዐዘቅተ፡ መሐላ፡ ወአስተርአይናሁ፡ በከመ፡ ንቤላ፡ ለሳራ፡ ከመ፡ ንግባእ፡ ኀቤሃ፡ ወይእቲሂ፡ ፀንሰት፡ ወልደ።

¹⁶ ወተመየጥነ፡ በወርኅ፡ ሳብዕ፡ ወረከብናሃ፡ ለሳራ፡ ፅንስተ፡ ቅድሜነ፡ ወባረክናሃ፡ ወዜነውናሃ፡ ኵሎ፡ ዘተአዘዘ፡ ሎቱ፡ ከመ፡ ኢይመውት፡ ዓዲ፡ እስከ፡ ይወልድ፡ ስድስተ፡ ውሉደ፡ ወይሬኢ፡ ዘእንበለ፡ ይሙት።

¹⁷ ወኵሉ፡ ዘርአ፡ ውሉዱ፡ አሕዛበ፡ ይከውኑ፡ ወምስለ፡ አሕዛብ፡ ይትኌለቁ።

¹⁸ እስመ፡ ለመክፈልተ፡ ልዑል፡ ይከውን፡ ወውስተ፡ ዘይመልክ፡ አምላክ፡ ወረደ፡ ኵሉ፡ ዘርኡ፡ ከመ፡ ይኩን፡ ለእግዚአብሔር፡ ሕዝበ፡ ትርሲት፡ እምኵሉ፡ ሕዝብ፡ ወከመ፡ ይኩን፡ መንግሥተ፡ ወክህነተ፡ ወሕዝበ፡ ቅዱሰ።

¹⁹ ወሖርነ፡ ፍኖተነ፡ ወዜነውናሃ፡ ለሳራ፡ ኵሎ፡ ዘነገርናሁ፡ ወተፈሥሑ፡ ክልኤሆሙ፡ ፍሥሐ፡ ዐቢየ፡ ጥቀ።

²⁰ ወሐነጸ፡ ህየ፡ ምሥዋዐ፡ ለእግዚአብሔር፡ ዘባልሖ፡ ወለዘያስተፈሥሖ፡ በምድረ፡ ፍልሰቱ።

²¹ ወሐነጸ፡ ምጽላላተ፡ ሎቱ፡ ወለአግብርቲሁ፡ በዛቲ፡ በዓል፡ ወውእቱ፡ መቅድመ፡ ገብረ፡ በዓለ፡ መጸላት፡ በዲበ፡ ምድር።

²² ወበዝ፡ ሰቡዕ፡ መዋዕል፡ ሀሎ፡ ይቄርብ፡ ኵሎ፡ ዕለተ፡ በበ፡ ዕለት፡ ውስተ፡ ምሥዋዕ፡ ጽንሐሐ፡ ለእግዚአብሔር፡ አልህምተ፡ ክልኤተ፡ ወአብሐኰ፡ ክልኤተ፡ አባግዐ፡ ሰብዓተ፡ መሐስአ፡ ጠሊ፡ አሐደ፡ በእንተ፡ ኃጢአት፡ ከመ፡ ያስተስሪ፡ ቦቱ፡ በእንቲአሁ፡ ወበእንተ፡ ዘርኡ።

²³ ወለመሥዋዕተ፡ መድኃኒት፡ አብሐኰ፡ ሰብዓተ፡ ወመሐስአ፡ ሰብዓተ፡ ወአባግዐ፡ ሰብዓተ፡ ወደቤላተ፡ ሰብዓተ፡ ወመሥዋዕቶሙሂ፡ ወሞጻሕቶሙሂ፡ ላዕለ፡ ኵሉ፡ ሥብሖሙ፡ የዐጥን።

²⁴ ወበጽባሕ፡ ወሰርክሂ፡ የዐጥን፡ አፈወ፡ ስኂን፡ ወቅንአተ፡ ወማየ፡ ልብን፡ ወናርዶስ፡ ወከርቤ፡ ወሰንብልተ፡ ወቍስጠ፡ ሰብዓቲሆሙ፡ ዘንተ፡ ኵሎ፡ ይቄርብ፡ ወጉአ፡ ዕሩየ፡ ተዐርዮ፡ ድሙረ፡ ንጹሐ።

²⁵ ወገብረ፡ ዘንተ፡ በዓለ፡ ሰቡዐ፡ መዋዕለ፡ እንዘ፡ ይትፌሠሕ፡ በኵሉ፡ ልቡ፡ ወበኵሉ፡ ነፍሱ፡ ውእቱ፡ ወኵሎሙ፡ እለ፡ ቤቱ፡ ወአልቦ፡ መነሂ፡ ነኪረ፡ ምስሌሁ፡ ወኵሉ፡ ዘኢኮነ፡ ክሱበ።

²⁶ ወባረኮ፡ ለፈጣሪሁ፡ ዘፈጠሮ፡ በትዝምዱ፡ እስመ፡ ለሥምረቱ፡ ፈጠሮ፡ እስመ፡ አእመረ፡ ወጠየቀ፡ ከመ፡ እምኔሁ፡ ይከውን፡ ተክለ፡ ጽድቅ፡ ለትውልድ፡ ዘለዓለም፡ ወእምኔሁ፡ ዘርእ፡ ቅዱስ፡ ከመ፡ ይኩን፡ ከማሁ፡ ለዘ፡ ገብረ፡ ኵሎ።

²⁷ ወባረከ፡ ወተፈሥሐ፡ ወጸውዐ፡ ስማ፡ ለዛቲ፡ በዓል፡ በዓለ፡ እግዚአብሔር፡ ፍሥሓ፡ ስጥወተ፡ ለአምላክ፡ ልዑል።

²⁸ ወባረክናሁ፡ ለዓለም፡ ወኵሎ፡ ዘርአ፡ ዘእምድኅሬሁ፡ በኵሉ፡ ትውልደ፡ ምድር፡ እስወ፡ ገብረ፡ ዘንተ፡ በዓለ፡ በጊዜሃ፡ በከመ፡ ስምዐ፡ ጽላተ፡ ሰማይ።

²⁹ በእንተዝ፡ ተሠርዐ፡ ውስተ፡ ጽላተ፡ ሰማይ፡ ላዕለ፡ እስራኤል፡ ከመ፡ ይኩኑ፡ ገባርያነ፡ በዓለ፡ መጸለት፡ ሰቡዐ፡ መዋዕለ፡ በፍሥሓ፡ በወርኅ፡ ሳብዕ፡ ዘይትወከፍ፡ በቅድመ፡ እግዚአብሔር፡ ሕገ፡ ዘለዓለም፡ በትውልዶሙ፡ በኵሉ፡ ዓመት፡ ወዓመታት።

³⁰ ወአልቦ፡ ለዝንቱ፡ ወሰነ፡ መዋዕል፡ እስመ፡ ለዓለም፡ ውእቱ፡ ሥሩዕ፡ ላዕለ፡ እስራኤል፡ ከመ፡ ይግበርዋ፡ ወይንበሩ፡ ወስተ፡ ምጽላል፡ ወከመ፡ ያንብሩ፡ አክሊላተ፡ ዲበ፡ ርእሶሙ፡ ወከመ፡ ይንሥኡ፡ ዐጽቀ፡ ቈጽል፡ ወኲሐ፡ እሙሐዝ።

³¹ ወነሥአ፡ አብርሃም፡ ልበ፡ ፀበርት፡ ወፍሬ፡ ዕፅ፡ ሠናይ፡ ወበኵሉ፡ ዕለት፡ እምዕለት፡ ሀሎ፡ እንዘ፡ የአውድ፡ ምሥዋዐ፡ በአዕፁቅ፡ ስብዕ፡ ለዕለት፡ በጽባሕ፡ ይጼብሕ፡ ወይገኒ፡ ለአምላኩ፡ ኵሎ፡ ዘበፍሥሓ።