Jubilees 17

The Ethiopic Bible (Ge'ez)

¹ ወበአሐዱ፡ ዓመት፡ ዘሱባዔ፡ ኃምስ፡ ኀደገ፡ ጥበ፡ ይስሐቅ፡ በዝንቱ፡ ኢዮቤልዉ፡ ወገብረ፡ አብርሃም፡ ግዝአ፡ ዐቢየ፡ በወርኅ፡ ሣልስ፡ በዕለተ፡ ኀድገ፡ ጥበ፡ ወልዱ፡ ደስሐቅ።

² ወይስማዔል፡ ወልዳ፡ ለአጋር፡ ግብጻዊት፡ በቅድመ፡ ገጹ፡ ለአብርሃም፡ አቡሁ፡ በመካኑ፡ ወተፈሥሐ፡ አብርሃም፡ ወባረኮ፡ ለእግዚአብሔር፡ እስመ፡ ርእየ፡ ሎቱ፡ ውሉዶ፡ ወኢሞተ፡ ዘእንበለ፡ ውሉድ።

³ ወተዘከረ፡ ቃሎ፡ ዘተናገሮ፡ በዕለተ፡ ተፈልጠ፡ ሎጥ፡ እምኔሁ።

⁴ ወርእየቶ፡ ለይስማዔል፡ ሳራ፡ እንዘ፡ ይትዋነይ፡ ወይዘፍን፡ ወአብርሃምኒ፡ እንዘ፡ ይትፌሣሕ፡ ፍሥሓ፡ ዐቢየ፡ ወቀንአት፡ ለይስማዔል።

⁵ ወማሕዝን፡ ቃሉ፡ በቅድመ፡ አዕይንተ፡ አብርሃም፡ በእንተ፡ አመቱ፡ ወበእንተ፡ ወልዱ፡ ከመ፡ ይስድዶሙ፡ እምኀቤሁ።

⁶ ወይቤሎ፡ እግዚአብሔር፡ ለአብርሃም፡ ኢይኩን፡ ሐዘን፡ በቅድመ፡ አዕይንቲከ፡ በእንተ፡ ሕፃን፡ ወበእንተ፡ ወለት፡ ኵሎ፡ ዘትቤለከ፡ ሳራ፡ ስማዕ፡ ንባባ፡ ወግበር፡ እስመ፡ በይስሐቅ፡ ይጼዋዕ፡ ለከ፡ ስም፡ ወዘርእ።

⁷ ወበእንተ፡ ወልዳስ፡ ለዛ፡ ወለት፡ ውስተ፡ ዐቢይ፡ ሕዝብ፡ እሬስዮ፡ እስመ፡ እምዘርእከ፡ ውእቱ።

⁸ ወጌሠ፡ አብርሃም፡ በነግህ፡ ወነሥአ፡ ሐባውዘ፡ ወዝቀ፡ ማይ፡ ወአስከማ፡ ለአጋር፡ ወለሕፃን፡ ወፈነዋ።

⁹ ወሖረት፡ ወታንጌጊ፡ በገዳመ፡ ቤርሳቦ፡ ወተፈጸመ፡ ማይ፡ እምዝቅ፡ ወጸምአ፡ ሕፃን፡ ወስእነ፡ ሐዊረ፡ ወወድቀ።

¹⁰ ወነሥአቶ፡ እሙ፡ ወሐዊራ፡ ገደፈቶ፡ ታሕተ፡ አሐቲ፡ ኤልያስ፡ ወሖረት፡ ወነበረት፡ አንጻሮ፡ መጠነ፡ አሐቲ፡ ምንዳፍ፡ እስመ፡ ትቤ፡ ኢይርአይ፡ ሞቶ፡ ለሕፃንየ፡ ወነቢራ፡ በከየት።

¹¹ ወይቤላ፡ መልአክ፡ አምላክ፡ አሐዱ፡ እምቅዱሳን፡ ምንተ፡ ትበክዪ፡ አንቲ፡ አጋር፡ ተንሢአኪ፡ ንሥእዮ፡ ለሕፃን፡ ወአኀዝዮ፡ በእዴኪ፡ እስመ፡ ሰምዐ፡ እግዚአብሔር፡ ቃለኪ፡ ወርእዮ፡ ለሕፃን።

¹² ወከሠተት፡ አዕይንቲሃ፡ ወርእየት፡ ዐዘቅተ፡ ማይ፡ ወሖረት፡ ወመልአት፡ ዝቃ፡ ማየ፡ ወአስተየት፡ ሕፃና።

¹³ ወልህቀ፡ ሕፃን፡ ወኮነ፡ ነዳፌ፡ ወሀሎ፡ እግዚአብሔር፡ ምስሌሁ፡ ወነሥአት፡ ሎሙ፡ እሙ፡ ብእሲተ፡ እምአዋልደ፡ ግብጽ።

¹⁴ ወወለደት፡ ሎቱ፡ ወልደ፡ ወጸውዐ፡ ስሞ፡ ናቤዎት፡ እስመ፡ ትቤ፡ ቅሩብ፡ እግዚአብሔር፡ ሊተ፡ ሶበ፡ ጸዋዕክዎ።

¹⁵ ወኮነ፡ በሱባዔ፡ ሳብዕ፡ በቀዳሚ፡ ዓመት፡ በወርኅ፡ ቀዳሚ፡ በዝ፡ ኢዮቤልዉ፡ አመ፡ ዐሡሩ፡ ወሰኑዩ፡ ለዝ፡ ወርኅ፡ ኮነ፡ ቃላት፡ በሰማያት፡ በእንተ፡ አብርሃም።

¹⁶ ወመጽአ፡ መኰንን፡ መስቴማ፡ ወይቤ፡ ቅድሜሁ፡ ለአምላክ፡ ናሁ፡ አብርሃም፡ ያፈቅሮ፡ ለይስሐቅ፡ ወልዱ፡ ወያስተአድሞ፡ ኪያሁ፡ እምኵሉ።

¹⁷ ወእግዚአብሔር፡ ያአምር፡ ከመ፡ መሃይምን፡ አብርሃም፡ በኵሉ፡ ምንዳቤ፡ ዘይቤሎ፡ እስመ፡ አመክሮ፡ በምድሩ፡ ወበዐባር፡ ወአመከሮ፡ በብዕለ፡ ነገሥት።

¹⁸ ወበኵሉ፡ በዘአመከሮ፡ ተረክበ፡ ምእመነ፡ ወኢተአንተለ፡ ነፍሱ፡ ወኢጐንደየ፡ ገቢሮቶ፡ እስመ፡ ምእመን፡ ወመፍቀሬ፡ እግዚአብሔር።