Jubilees 23

The Ethiopic Bible (Ge'ez)

¹ ወአንበረ፡ ክልኤሆን፡ አጻብዐ፡ ያዕቆብ፡ ዲበ፡ አዕይንቲሁ፡ ወባረኮ፡ ለአምላከ፡ አማልክት፡ ወከደነ፡ ገጾ፡ ወሰፍሐ፡ እገሪሁ፡ ወኖመ፡ ንዋመ፡ ዘለዓለም።

² ወበዝ፡ ኵሉ፡ ሀሎ፡ ያዕቆብ፡ ይሰክብ፡ ውስተ፡ ሕፅኑ፡ ወኢያእመረ፡ ከመ፡ ሞተ፡ አብርሃም፡ አበ፡ አቡሁ።

³ ወነቅሀ፡ ያዕቆብ፡ እምንዋሙ።

⁴ ወተንሥአ፡ እምሕፅኑ፡ ወሮጸ፡ ወነገራ፡ ለርብቃ፡ እሙ።

⁵ ወወድቀ፡ ይስሐቅ፡ ውስተ፡ ገጸ፡ አቡሁ፡ ወበከየ፡ ወሰዐሞ።

⁶ ወቃል፡ ተሰምዐ፡ በቤተ፡ አብርሃም።

⁷ ወቀበርዎ፡ ውስተ፡ በዐት፡ ካዕበት፡ ቅሩበ፡ ሳራ፡ ብእሲቱ፡ ወውሉዱ፡ ይስሐቅ፡ ወይስማዔል።

⁸ ሠለስተ፡ ኢዮቤልዉ፡ ሐይወ፡ ወአርባዕተ፡ ሱባዔ፡ ዓመተ፡ ምእተ፡ ወሰብዓ፡ ወኀምስተ፡ ዓመተ፡ ወፈጸመ፡ መዋዕለ፡ ሕይወቱ፡ ልህቀ፡ ወፍጹመ፡ መዋዕል።

⁹ እስመ፡ መዋዕለ፡ ቀደምት፡ እማንቱ፡ ለሕይወቶሙ፡ ዐሠርቱ፡ ወተስዐቱ፡ ኢዮቤልውሳት።

¹⁰ እስመ፡ አብርሃምሰ፡ ፍጹም፡ በኵሉ፡ ምግባሪሁ፡ ምስለ፡ እግዚአብሔር።

¹¹ ወኵሉ፡ ትውልድ፡ ዘይትነሣእ፡ እምይእዜ፡ ወእስከ፡ ዕለተ፡ ደይን፡ ዐባይ፡ ይረስኡ፡ ፍጡነ፡ ዘእንበለ፡ ይፈጽሙ፡ ክልኤ፡ ኢዮቤልዉ።

¹² ወበውእቱ፡ መዋዕል፡ እመ፡ ሐይወ፡ ብእሲ፡ ኢዮቤልዉ፡ ወመንፈቀ፡ ዓመታት፡ ይብሉ፡ በእንቲአሁ፡ አብዝኀ፡ ሐይወ፡ ወመብዝኅተ፡ መዋዕሊሁ፡ ሕማም፡ ወስራሕ፡ ወምንዳቤ፡ ወአልቦ፡ ሰላመ።

¹³ እስመ፡ መቅሠፍት፡ ዲበ፡ መቅሠፍት፡ ወጽልዓን፡ ዲበ፡ ጽልዓን፡ ወምንዳቤ፡ ዲበ፡ ምንዳቤ፡ ወስምዓተ፡ እኩይ፡ ዲበ፡ ስምዓተ፡ እኩይ፡ ወደዌ፡ ዲበ፡ ደዌ፡ ወኵሉ፡ ኵነኔ፡ እኩይ፡ ዘከማሁ፡ ዝንቱ፡ ምስለ፡ ዝንቱ፡ ደዌ፡ ወገበጥባጥ፡ ወአስሐትያ፡ ወበረድ፡ ወሐመዳ፡ ወነበርጻው፡ ወሰከሕካሕ፡ ወሰዖዛዝ፡ ወዐባር፡ ወሞት፡ ወመጥባሕት፡ ወፂዋዌ።

¹⁴ ወኵሉ፡ ዝንቱ፡ ይመጽእ፡ በትውልድ፡ እኪት፡ እንተ፡ ታኤብስ፡ ምድረ፡ በርኵሰ፡ ዝሙት፡ ወበግማኔ፡ ወበሰቆራር፡ ግብሮሙ።

¹⁵ አሜሃ፡ ይብሉ፡ ለቀደምት፡ መዋዕሌሆሙ፡ ብዙኅ፡ እስከ፡ ዐሠርቱ፡ ምእት፡ ዓመት፡ ወሠናይ።

¹⁶ ወበይእቲ፡ ትውልድ፡ ይከውኑ፡ ደቂቅ፡ እንዘ፡ ይዛለፉ፡ አበዊሆሙ፡ ወአዕሩጊሆሙ፡ በእንተ፡ ኀጢአት፡ ወበእንተ፡ ዐመፃ፡ ወበእንተ፡ ንባበ፡ አፉሆሙ፡ ወበእንተ፡ እከያት፡ ዐበይት፡ ዘእሙንቱ፡ ይገብሩ።

¹⁷ እስመ፡ ኵሎሙ፡ አእከዩ፡ ወኵሉ፡ አፍ፡ ይትናገር፡ አበሳ።

¹⁸ ናሁ፡ ምድር፡ ትትሐጐል፡ በእንተ፡ ኵሉ፡ ምግባሮሙ፡ ወአልቦ፡ ዘርአ፡ ወይን፡ ወአልቦ፡ ቅብአ፡ እስመ፡ ኵሉ፡ ካሕድ፡ ምግባሪሆሙ፡ ወኵሎሙ፡ ይትሐጐሉ፡ ኅቡረ፡ አራዊት፡ ወእንስሳ፡ ወአዕዋፍ።

¹⁹ ወይትባአሱ፡ እሉ፡ ምስለ፡ እሉ፡ ወራዙት፡ ምስለ፡ ሊቃናት፡ ወሊቃናት፡ ምስለ፡ ወራዙት፡ ነዳይ፡ ምስለ፡ ባዕል፡ ትሑት፡ ምስለ፡ ዐቢይ፡ ወምስኪን፡ ምስለ፡ መኰንን፡ በእንተ፡ ሕግ፡ ወበእንተ፡ ኪዳን፡ እስመ፡ ረስዑ፡ ትእዛዘ፡ ወኪዳነ፡ ወበዓለ፡ ወወርኀ፡ ወሰንበተ፡ ወኢዮቤሌው፡ ወኵሎ፡ ኵነኔ።

²⁰ ወይቀውሙ፡ በአስይፍት፡ ወበቀትል፡ ከመ፡ ይሚጥዎሙ፡ ውስተ፡ ፍኖት፡ ወኢይትመየጡ፡ እስከ፡ ይትከዐው፡ ደም፡ ብዙኅ፡ ዲበ፡ ምድር፡ እሉ፡ በእሉ።

²¹ ወእለ፡ ድኅኑ፡ በፍኖተ፡ ጽድቅ፡ ኢይትመየጡ፡ እምነ፡ እከዮሙ፡ እስመ፡ ኵሎሙ፡ ለትእግልት፡ ወውስተ፡ ብዕል፡ ይትነሥኡ፡ ከመ፡ ይንሣእ፡ አሐዱ፡ ኵሎ፡ ዘቢጹ፡ ወስመ፡ ዐቢየ፡ ይሰመዩ፡ ወአኮ፡ በህልው፡ ወአኮ፡ በጽድቅ፡ ወቅድሳተ፡ ቅዱስ፡ ያረኵሱ፡ በርኵሰ፡ ሙስና፡ ግማኔሆሙ።

²² ወይከውን፡ መቅሠፍት፡ ዐቢይ፡ ዲበ፡ ግብረ፡ ይእቲ፡ ትውልድ፡ እምኀበ፡ እግዚአብሔር፡ ወይሁቦሙ፡ ለመጥባሕት፡ ወለኵነኔ፡ ወለፂዋዌ፡ ወለሀይድ፡ ወለብልዐት።

²³ ወያነቅህ፡ ላዕሌሆሙ፡ ኃጢኣኒሆሙ፡ ለአሕዛብ፡ እለ፡ አልቦሙ፡ ላዕሌሆሙ፡ ምሕረተ፡ ወሣህለ፡ ወለገጸ፡ መኑሂ፡ ኢያደልው፡ ኢለልሂቅ፡ ወኢለወሬዛ፡ ወኢለመኑሂ፡ እስመ፡ እኩያን፡ ወኀያላን፡ ከመ፡ ይእከዩ፡ እምኵሉ፡ ውሉደ፡ ሰብእ፡ ወይገብሩ፡ ውስተ፡ እስራኤል፡ ሀከከ፡ ወዲበ፡ ያዕቆብ፡ አበሳ፡ ወይትከዐው፡ ደም፡ ብዙኅ፡ ዲበ፡ ምድር፡ ወአልቦ፡ ዘያስተጋብእ፡ ወአልቦ፡ ዘይቀብር።

²⁴ በውእቱ፡ መዋዕል፡ ይጸርኁ፡ ወይጼውዑ፡ ወይጼልዩ፡ ከመ፡ ይድኀኑ፡ እምእደ፡ ኃጥኣን፡ አሕዛብ፡ ወአልቦ፡ ዘያድኅን።

²⁵ ወይጸዐዱ፡ አርእስተ፡ ደቂቅ፡ በሲበት፡ ወያስተርኢ፡ ሕፃን፡ ወልደ፡ ሠለስቱ፡ ሱባዔ፡ ልሂቀ፡ ከመ፡ ዘምእት፡ ዓመቱ፡ ወይትሐጐል፡ ቁመቶሙ፡ በምንዳቤ፡ ወበጻዕር።

²⁶ ወበውእቶን፡ መዋዕል፡ ይእኅዙ፡ ደቂቅ፡ ይትኀሠሡ፡ ሕገገ፡ ወለኃሢሠ፡ ትእዛዝ፡ ወለተመይጦ፡ ውስተ፡ ፍኖተ፡ ጽድቅ።

²⁷ ወይእኅዛ፡ መዋዕል፡ ይብዝኃ፡ ወይልሀቃ፡ ወውሉደ፡ ሰብእ፡ ትውልድ፡ እምትውልድ፡ ወዕለት፡ እመዋዕል፡ እስከ፡ ሶበ፡ ይቀርብ፡ መዋዕሊሆሙ፡ ለዐሠርቱ፡ ምእት፡ ዓመት፡ ወለብዙኅ፡ ዓመታት፡ እምነ፡ ብዙኅ፡ መዋዕል።

²⁸ ወአልቦ፡ ልሂቀ፡ ወአልቦ፡ ዘይጸግብ፡ መዋዕለ፡ እስመ፡ ኵሎሙ፡ ሕፃናተ፡ ወደቂቀ፡ ይከውኑ።

²⁹ ወኵሎን፡ መዋዕሊሆሙ፡ በሰላም፡ ወበፍሥሓ፡ ይፌጽሙ፡ ወይሐይዉ፡ ወአልቦ፡ መነሂ፡ ሰይጣነ፡ ወአልቦ፡ መነሂ፡ እኩየ፡ ዘያማስን፡ እስመ፡ ኵሎን፡ መዋዕሊሆሙ፡ መዋዕለ፡ በረከት፡ ወፈውስ፡ ይከውና።

³⁰ አሜሃ፡ ይፌውስ፡ እግዚአብሔር፡ አግብርቲሁ፡ ወይትነሥኡ፡ ወይሬእዩ፡ ሰላመ፡ ዐቢየ፡ ወይሰድድ፡ ጸላእቶ፡ ወይሬእዩ፡ ጻድቃን፡ ወያአኵቱ፡ ወይትፌሥሑ፡ እስከ፡ ለዓለመ፡ ዓለም፡ በፍሥሓ።

³¹ ወያዐርፍ፡ አዕፅምቲሆሙ፡ ውስተ፡ ምድር።

³² ወአንተኒ፡ ሙሴ፡ ጸሐፍ፡ ዘንተ፡ ቃላተ፡ እስመ፡ ከመዝ፡ ጽሑፍ፡ ውእቱ፡ ወየዐርጉ፡ ውስተ፡ ስምዐ፡ ጽላተ፡ ሰማይ፡ ለትውልድ፡ ዘለዓለም።