Jubilees 24

The Ethiopic Bible (Ge'ez)

¹ ወኮነ፡ እምድኅረ፡ ሞተ፡ አብርሃም፡ ባረኮ፡ እግዚአብሔር፡ ለይስሐቅ፡ ወልዱ፡ ወተንሥአ፡ እምኬብሮን፡ ወሖረ፡ ወኀደረ፡ ኀበ፡ ዐዘቅተ፡ ራእይ፡ በዓመት፡ አሐዱ፡ ዘሣልስ፡ ሱባዔ፡ ዘዝ፡ ኢዩቤሌዉ፡ ሰብዐተ፡ ዓመተ።

² ወበዓመት፡ ዘሱባዔ፡ ራብዕ፡ አኀዘ፡ ዐባር፡ ውስተ፡ ምድር፡ ዘእንበለ፡ ቀዳማዊ፡ ዐባር፡ ዘኮነ፡ በመዋዕለ፡ አብርሃም።

³ ወአብሰለ፡ ያዕቆብ፡ ተብሲለ፡ ብርስን፡ ወመጽአ፡ ዔሳው፡ እምሐቅል፡ ርኁብ፡ ወይቤሎ፡ ለያዕቆብ፡ እኁሁ፡ ሀበኒ፡ እምዝ፡ ተብሲል፡ ዘስርናይ።

⁴ ወይቤ፡ ዔሳው፡ በልቡ፡ አነ፡ እመውት፡ ለምንትዝ፡ ቀዲመ፡ ተወልዶ፡ ወይቤሎ፡ ለያዕቆብ፡ ወሀብኩከ።

⁵ ወይቤሎ፡ ያዕቆብ፡ መሐል፡ ሊተ፡ ዮም፡ ወመሐላ፡ ሎቱ።

⁶ ወወሀቦ፡ ያዕቆብ፡ ለእኁሁ፡ ዔሳው፡ ኅብስተ፡ ወተብሲለ፡ ወበልዐ፡ እስከ፡ ይጸግብ፡ ወመነነ፡ ዔሳው፡ ቀዲመ፡ ተወልዶ፡ በእንተዝ፡ ተሰምየ፡ ስሙ፡ ዔሳው፡ ወኤዶም፡ በእንተ፡ ተብሲለ፡ ስርናይ፡ ዘወሀቦ፡ ያዕቆብ፡ ለቅድመ፡ ልደቱ።

⁷ ወልህቀ፡ ያዕቆብ፡ ወዔሳውሰ፡ ተትሕተ፡ እምዕበዩ።

⁸ ወኮነ፡ ዐባር፡ ዲበ፡ ምድር፡ ወመጽአ፡ ይስሐቅ፡ ይረድ፡ ግብጽ፡ በካልእ፡ ዓመት፡ ዘዝ፡ ሱባዔ፡ ወሖረ፡ ኀበ፡ ንጉሠ፡ ፍልስጥኤም፡ ጌራሮሃ፡ ኀበ፡ አቤሜሌክ።

⁹ ወአስተርአዮ፡ እግዚአብሔር፡ ወይቤሎ፡ ኢትረድ፡ ግብጽ፡ ንበር፡ ውስተ፡ ምድር፡ እንተ፡ አነ፡ እብለከ፡ ወፍልስ፡ ውስተ፡ ይእቲ፡ ምድር፡ ወእሄሉ፡ ምስሌከ፡ ወእባርከከ።

¹⁰ እስመ፡ ለከ፡ ወለዘርእከ፡ እሁብ፡ ዛተ፡ ምድረ፡ ኵላ፡ ወአቀውም፡ መሐላየ፡ ዘመሐልኩ፡ ለአብርሃም፡ አቡከ፡ ወአበዝኅ፡ ዘርአከ፡ ከመ፡ ከዋክብተ፡ ሰማይ።

¹¹ ወይትባረኩ፡ በዘርእከ፡ ኵሎሙ፡ አሕዛበ፡ ምድር፡ ህየንተ፡ ሰምዐ፡ አቡከ፡ ቃለ፡ ዚአየ፡ ወዐቀበ፡ ዑቃቤየ፡ ወትእዛዛትየ፡ ወሕገጊየ፡ ወሥርዓትየ፡ ወኪዳንየ።

¹² ወኀደረ፡ ጌራሮሃ፡ ሠለስተ፡ ሱባዔ፡ ዓመት።

¹³ ወአዘዘ፡ አቤሜሌክ፡ በእንቲአሁ፡ ወበእንተ፡ ኵሉ፡ ዘዚአሁ፡ እንዘ፡ ይብል፡ ኵሉ፡ ሰብእ፡ ዘይለክፎ፡ ወለኵሉ፡ ዘዚአሁ፡ ሞተ፡ ይሙት።

¹⁴ ወልህቀ፡ ይስሐቅ፡ በፍልስጥኤም፡ ወኮነ፡ ሎቱ፡ ጥሪት፡ ብዙኅ፡ አልህምት፡ ወአባግዕ፡ ወአግማል፡ ወአእዱግ፡ ወጥሪት፡ ብዙኅ።

¹⁵ ወዘርኡ፡ በምድረ፡ ፍልስጥኤም።

¹⁶ ወኵሎ፡ ዐዘቃተ፡ ዘከረዩ፡ ደቀ፡ አብርሃም፡ በሕይወተ፡ አብርሃም፡ ይፈንዎ፡ ፍልስጥኤም፡ እምድኅረ፡ ሞተ፡ አብርሃም፡ ወመልእዎ፡ መሬተ።

¹⁷ ወይቤሎ፡ አቤሜሌክ፡ ለይስሐቅ፡ ሖር፡ እምኀቤነ፡ እስመ፡ ዐበይከ፡ ፈድፋደ፡ እምኔነ።

¹⁸ ወተመዪጦሙ፡ ከረዩ፡ ዐዘቃተ፡ ዘማያት፡ ዘከረዩ፡ ደቀ፡ አብርሃም፡ አቡሁ።

¹⁹ ወከረዩ፡ ደቀ፡ ይስሐቅ፡ ዐዘቃተ፡ በፍራንጋ፡ ወረከቡ፡ ማየ፡ ሕያወ፡ ወተጋአዙ፡ ኖሎተ፡ ጌራሮን፡ ምስለ፡ ኖሎተ፡ ይስሐቅ፡ እንዘ፡ ይብሉ፡ ዘዚአነ፡ ዝማይ።

²⁰ ወከረዩ፡ ዐዘቅተ፡ ካልአ፡ ወተበአሱ፡ በእንቲአሁኒ፡ ወጸውዐ፡ ስሞ፡ ጸባብ፡ ወአንሥአ፡ ወከረዩ፡ ዐዘቅተ፡ ካልአ፡ ወኢተጋአዙ፡ ወጸውዐ፡ ስሞ፡ ስፉሕ፡ ወይቤ፡ ይስሐቅ፡ ይእዜ፡ አስፍሐ፡ ለነ፡ እግዚአብሔር፡ ወልህቅነ፡ ዲበ፡ ምድር።

²¹ ወዐርገ፡ እምህየ፡ ውስተ፡ ዐዘቅተ፡ መሐላ፡ በቀዳሚ፡ ዓመት፡ ዘሱባዔ፡ ቀዳሚ፡ በራብዕ፡ ወአርብዓ፡ ኢዮቤለው።

²² ወአስተርአዮ፡ እግዚአብሔር፡ በይእቲ፡ ሌሊት፡ በሠርቀ፡ ቀዳሚ፡ ወርኅ፡ ወይቤሎ፡ አነ፡ ውእቱ፡ አምላከ፡ አብርሃም፡ አቡከ፡ ኢትፍራህ፡ እስመ፡ አነ፡ ምስሌከ፡ ሀለውኩ፡ ወእባርከከ፡ ወአብዝኆ፡ አበዝኅ፡ ዘርአከ፡ ከመ፡ ኆፃ፡ ምድር፡ በእንተ፡ አብርሃም፡ ቍልዔየ።

²³ ወሐነጸ፡ ህየ፡ ምሥዋዕ፡ ዘቀዳሚ፡ ዘሐነጸ፡ አብርሃም፡ አቡሁ።

²⁴ ወከረዩ፡ ዐዘቅተ፡ ወረከቡ፡ ማየ፡ ሕያወ።

²⁵ ወደቀ፡ ይስሐቅኒ፡ ከረዩ፡ ዐዘቅተ፡ ካልአ፡ ወኢረከቡ፡ ማየ።

²⁶ ወጸውዐ፡ ስሞ፡ ለውእቱ፡ መካን፡ ዐዘቅተ፡ መሐላ፡ እስመ፡ በህየ፡ መሐለ፡ ለአቤሜሌክ፡ ወለአኮዘት፡ ካልኡ፡ ሎቱ፡ ወለፊኮል፡ ዐቃቢሁ።

²⁷ ወአእመረ፡ ይስሐቅ፡ በይእቲ፡ ዕለት፡ ከመ፡ በግፉዕ፡ መሐለ፡ ሎሙ፡ ለገቢር፡ ምስሌሆሙ፡ ሰላመ።

²⁸ ወረገሞሙ፡ ይስሐቅ፡ በይእቲ፡ ዕለት፡ ለፍልስጥኤም፡ ወይቤ፡ ርጉም፡ ፍልስጥኤም፡ ለዕለተ፡ መዓት፡ ወቍጥዓ፡ እማእከለ፡ ኵሉ፡ አሕዛብ።

²⁹ ወዘአምሠጠ፡ እምሰይፈ፡ ፀር፡ ወእምነ፡ ኬጥኤም፡ ይሠርዎሙ፡ ሕዝብ፡ ጻድቅ፡ በኵነኔ፡ እምታሕተ፡ ሰማይ፡ እስመ፡ ፀረ፡ ወጸላእተ፡ ይከውኑ፡ ለውሉድየ፡ በመዋዕሊሆሙ፡ በዲበ፡ ምድር።

³⁰ ወአልቦ፡ ተኀድጎ፡ ሎሙ፡ ተረፈ፡ ወዘይድኅን፡ አመ፡ ዕለተ፡ መዓተ፡ ኵነኔ።

³¹ እስመ፡ እመኒ፡ እስከ፡ ሰማይ፡ ዐርገ፡ እምህየ፡ ይወርድ፡ ወእመኒ፡ ጸንዐ፡ ውስተ፡ ምድር፡ እምህየ፡ ይትመላሕ፡ ወእመኒ፡ ተኀብአ፡ ማእከለ፡ አሕዛብ፡ እምህየ፡ ይሤሮ፡ ወእመኒ፡ ወረደ፡ ውስተ፡ ሲኦል፡ በህየ፡ ይበዝኅ፡ ኵነኔሁ።

³² ወእመኒ፡ ሖረ፡ ውስተ፡ ፂዋዌ፡ በእደ፡ እለ፡ የኀሥሥዋ፡ ለነፍሱ፡ በማእከለ፡ ፍኖት፡ ይቀትልዎ፡ ወአልቦ፡ አትርፎ፡ ሎቱ፡ ስመ፡ ወዘርአ፡ ውስተ፡ ኵሉ፡ ምድር።

³³ ወከመዝ፡ ተጽሕፈ፡ ወተቈርዐ፡ በእንቲአሁ፡ ውስተ፡ ጽላተ፡ ሰማይ፡ ለገቢር፡ ሎቱ፡ በዕለተ፡ ኵነኔ፡ ከመ፡ ይሠሮ፡ እምድር።