Jubilees 25

The Ethiopic Bible (Ge'ez)

¹ ወበካልእ፡ ዓመት፡ ዘዝ፡ ሱባዔ፡ ዘበዝ፡ ኢዮቤሌው፡ ጸውዐት፡ ርብቃ፡ ያዕቆብሃ፡ ወልዳ፡ ወተናገረቶ፡ እንዘ፡ ትብል፡ ወልድየ፡ ኢትንሣእ፡ ለከ፡ ብእሲተ፡ እምነ፡ አዋልደ፡ ከናአን፡ ከመ፡ ዔሳው፡ እኁከ፡ ዘነሥአ፡ ሎቱ፡ ክልኤተ፡ አንስቲያ፡ እምዘርአ፡ ከናአን፡ ወአምረርዋ፡ ለነፍስየ፡ በኵሉ፡ ምግባሮሙ፡ ርኵስ፡ እስመ፡ ኵሉ፡ ምግባሮሙ፡ ዝሙት፡ ወምርዓት፡ ወአልቦ፡ ምንተኒ፡ ጽድቀ፡ ምስሌሆሙ፡ እስመ፡ እኵይ፡ ውእቱ።

² ወአነ፡ ወልድየ፡ አፈቅረከ፡ ጥቀ፡ ፈድፋደ፡ ወልብየ፡ ወምሕረትየ፡ ይባርከከ፡ በኵሉ፡ ጊዜ፡ ዕለት፡ ወዑቃቤ፡ ለያልይ።

³ ወይእዜኒ፡ ወልድየ፡ ስማዕ፡ ቃልየ፡ ወግበር፡ ፈቃዳ፡ ለእምከ፡ ወኢትንሣእ፡ ለከ፡ ብእሲተ፡ እምአዋልደ፡ ዝምድር፡ ዘእንበለ፡ እምቤተ፡ አቡየ፡ ወዘእንበለ፡ እምዘመደ፡ አቡየ፡ ትንሣእ፡ ለከ፡ ብእሲተ፡ እምነ፡ ቤተ፡ አቡየ፡ ወይባርከከ፡ አምላክ፡ ልዑል፡ ወይከውን፡ ትውልድከ፡ ትውልደ፡ ጽድቅ፡ ወዘርእከ፡ ቅዱስ።

⁴ ወእምዝ፡ ተናገረ፡ ያዕቆብ፡ ምስለ፡ ርብቃ፡ እሙ፡ ወይቤላ፡ ናሁ፡ አነ፡ እሞ፡ ወልደ፡ ተስዐቱ፡ ሱባዔ፡ ዓመት፡ ወምንተኒ፡ አንስተ፡ ኢየአምር፡ ወኢገሰስኩ፡ ወኢፈኀርኩ፡ ወኢይኄሊሂ፡ እንሣእ፡ ብእሲተ፡ እምኵሉ፡ ዘርአ፡ አዋልደ፡ ከናአን፡ ሊተ።

⁵ እስመ፡ እዜከር፡ አነ፡ እሙ፡ ነገረ፡ አብርሃም፡ አቡነ፡ ምንተ፡ አዘዘኒ፡ ከመ፡ ኢይንሣእ፡ ብእሲተ፡ እምኵሉ፡ ዘርአ፡ ቤተ፡ ከናአን፡ እስመ፡ እምዘርአ፡ ቤተ፡ አቡየ፡ እነሥእ፡ ሊተ፡ ብእሲተ፡ ወእምትዝምድየ።

⁶ ሰማዕኩ፡ እሙ፡ ቀዲሙ፡ ከመ፡ ተወልዳ፡ አዋልድ፡ ለላባ፡ እኁኪ፡ ወላዕሌሆን፡ አንበርኩ፡ ልብየ፡ ከመ፡ እንሣእ፡ እምኔሆን፡ ብእሲተ።

⁷ ወበእንተዝ፡ አነ፡ ተዐቀብኩ፡ በመንፈስየ፡ ከመ፡ ኢየአብስ፡ ወኢይማስን፡ በኵሉ፡ ፍናው፡ ኵሎ፡ መዋዕለ፡ ሕይወትየ፡ እስመ፡ በእንተ፡ ምርዓት፡ ወዝሙት፡ አብዝኀ፡ አብ፡ አብርሃም፡ አዝዞትየ።

⁸ ምስለ፡ ኵሉ፡ ዘአዘዘኒ፡ ዘንተ፡ ዕሥራ፡ ወክልኤተ፡ ዓመተ፡ እኁየ፡ ይትጋአዘኒ፡ ወያበዝኅ፡ እንዘ፡ ይትናገረኒ፡ ወይብል፡ ንሣእ፡ እኁየ፡ ብእሲተ፡ አሐተ፡ እኅቶን፡ ለአንስቲያየ፡ ክልኤቲ፡ ወአነኒ፡ ኢይፈቅድ፡ እግበር፡ ከመ፡ ገብረ።

⁹ እምሕል፡ አነ፡ እሙ፡ ቅድሜኪ፡ ኵሎ፡ መዋዕለ፡ ሕይወትየ፡ ከመ፡ ኢይንሣእ፡ ሊተ፡ ብእሲተ፡ እምኵሉ፡ ዘርአ፡ አዋልደ፡ ከናአን፡ ወኢየአኪ፡ ገቢረ፡ በከመ፡ ገብረ፡ እኁየ።

¹⁰ ኢትፍርሂ፡ እሙ፡ ተአመኒ፡ ከመ፡ እገብር፡ ፈቃደኪ፡ ወበርቱዕ፡ አሐውር፡ ወኢያማስን፡ ፍናውየ፡ ለዓለም።

¹¹ ወእምዝ፡ አንሥአት፡ ገጻ፡ ውስተ፡ ሰማይ፡ ወጸፍሐት፡ አጸብዐ፡ እደዊሃ፡ ወከሠተት፡ አፉሃ፡ ወባረከቶ፡ ለአምላክ፡ ልዑል፡ ዘፈጠረ፡ ሰማየ፡ ወምድረ፡ ወወሀበት፡ ሎቱ፡ አኰቴተ፡ ወስባሔ።

¹² ወትቤ፡ ይትባረክ፡ እግዚአብሔር፡ አምላክ፡ ወይትባረክ፡ ስሙ፡ ለዓለመ፡ ዓለም።

¹³ ባርኮ፡ እግዚኦ፡ ወአንብር፡ ውስተ፡ አፉየ፡ በረከተ፡ ጽድቅ፡ ከመ፡ እባርኮ።

¹⁴ ወውእቱ፡ ጊዜ፡ ወረደ፡ መንፈሰ፡ ጽድቅ፡ ውስተ፡ አፉሃ፡ ወአንበረት፡ ውስተ፡ ርእሰ፡ ያዕቆብ፡ ክልኤሆን፡ እደዊሃ፡ ወትቤ።

¹⁵ ቡሩክ፡ አንተ፡ እግዚኦ፡ ጻድቅ፡ አምላኮሙ፡ ለዓለማት፡ ወኪያከ፡ ይባርክ፡ እምኵሉ፡ ትውልደ፡ ሰብእ፡ የሀብከ፡ ወልድየ፡ ፍኖተ፡ ጽድቅ፡ ወለዘርእከ፡ ይክሥት፡ ጽድቀ።

¹⁶ ወያብዝኅ፡ ውሉደከ፡ በሕይወትከ፡ ወይቁሙ፡ ለኆልቍ፡ ለአውራኀ፡ ዓመት፡ ወውሉዶሙ፡ ይብዝኁ፡ ወይዕበዩ፡ እምነ፡ ከዋክብተ፡ ሰማይ፡ ወእምነ፡ ኆፃ፡ ባሕር፡ ይብዛኅ፡ ኆልቆሙ።

¹⁷ የሀቦሙ፡ ዛተ፡ ምድረ፡ ሥምርተ፡ በከመ፡ ነበበ፡ የሀባ፡ ለአብርሃም፡ ወለዘርኡ፡ እምድኅሬሁ፡ በኵሉ፡ መዋዕል፡ ወየአኀዝዋ፡ እኂዘ፡ ዘለዓለም።

¹⁸ ወእርአይ፡ ለከ፡ ወልድየ፡ ውሉደ፡ ቡሩከ፡ በሕይወትየ፡ ወዘርአ፡ ቡሩክ፡ ወቅዱሰ፡ ይኩን፡ ኵሉ፡ ዘርእከ።

¹⁹ ወበከመ፡ አዕረፍከ፡ መንፈሰ፡ እምከ፡ በሕይመታ፡ ሕምሣ፡ ለወላዲትከ፡ ከመዝ፡ ትባርከ፡ ምሕረትየ፡ ወአጥባትየ፡ ኪያከ፡ ይባርክ፡ ወአፉየ፡ ወልሳንየ፡ ኪያከ፡ ያአኵቱ፡ ብዛኅ።

²⁰ ወለሀቅ፡ ወተከዐው፡ ውስተ፡ ምድር፡ ወዘርእከ፡ ይኩን፡ ፍጹመ፡ ውስተ፡ ኵሉ፡ ዓለም፡ በፍሥሓ፡ ሰማይ፡ ወምድር።

²¹ ስምከ፡ ወዘርእከ፡ እስከ፡ ኵሉ፡ ዓለማት፡ ይቁም።

²² ዘይባርከከ፡ ቡሩክ፡ ወኵሉ፡ ሥጋ፡ እንተ፡ ትረግመከ፡ በሐሰት፡ ትኩን፡ ርግምተ።

²³ ወሰዐመቶ፡ ወትቤሎ፡ ያፍቅር፡ ብከ፡ እግዚአ፡ ዓለም፡ በከመ፡ ልበ፡ እምከ፡ ወምሕረታ፡ ይትሐሠይ፡ ብከ፡ ወይባርከከ፡ ወአርመመት፡ እንከ፡ እምባርኮ።