Jubilees 26

The Ethiopic Bible (Ge'ez)

¹ ወበዓመት፡ ሳብዕ፡ ዘዝ፡ ሱባዔ፡ ጸውዐ፡ ይስሐቅ፡ ዔሳውሃ፡ ወልዶ፡ ዘይልህቅ፡ ወይቤሎ፡ ወልድየ፡ አነ፡ ረሣእኩ፡ ወናሁ፡ አዕይንትየ፡ ከፍአ፡ ለርእይ፡ ወኢያአምር፡ ዕለተ፡ ሞትየ።

² ወይእዜኒ፡ ንሣእ፡ ንዋየ፡ ነዓዌከ፡ ምጕንጳከ፡ ወቀስተከ፡ ወፃእ፡ ሐቅለ፡ ወነዐው፡ ሊተ፡ ወአኀዝ፡ ሊተ፡ ወልድየ፡ ወግበር፡ ሊተ፡ መብልዐ፡ ከመ፡ ዘታፈቅር፡ ነፍስየ፡ ወአምጽእ፡ ሊተ፡ ከመ፡ እብላዕ፡ ወትባርከ፡ ነፍስየ፡ ዘእንበለ፡ እሙት።

³ ወርብቃሰ፡ ትሰምዕ፡ እንዘ፡ ይነግሮ፡ ለዔሳው፡ ይስሐቅ።

⁴ ወጌሰ፡ ዔሳው፡ ገዳመ፡ ከመ፡ ያሥግር፡ ወየአኀዝ፡ ወያምጽእ፡ ለአቡሁ።

⁵ ወጸውዐት፡ ርብቃ፡ ያዕቆብሃ፡ ወልዳ፡ ወትቤሎ፡ ናሁ፡ ሰማዕክዎ፡ ለይስሐቅ፡ አቡከ፡ እንዘ፡ ይትናገር፡ ምስለ፡ ዔሳው፡ እኁከ፡ እንዘ፡ ይብል፡ አስግር፡ ሊተ፡ ወግበር፡ ሊተ፡ መብልዐ፡ ወአብእ፡ ሊተ፡ ወእብላዕ፡ ወእባርከከ፡ በቅድመ፡ እግዚአብሔር፡ ዘእንበለ፡ እሙት።

⁶ ወይእዜኒኬ፡ ስማዕ፡ ወልድየ፡ ቃልየ፡ ዘአነ፡ እኤዝዘከ፡ ሖር፡ ውስተ፡ መርዔትከ፡ ወንሣእ፡ ሊተ፡ ክልኤተ፡ መሓስአ፡ ጠሊ፡ ሠናያነ፡ ወእግበሮሙ፡ መብልዐ፡ ለአቡከ፡ ዘከመ፡ ያፈቅር፡ ወታብእ፡ ለአቡከ፡ ወይብላዕ፡ ከመ፡ ይባርክ፡ ቅድመ፡ እግዚአብሔር፡ ዘእንበለ፡ ይሙት።

⁷ ወይቤላ፡ ያዕቆብ፡ ለርብቃ፡ እሙ፡ እሞ፡ ኢይምሕክ፡ በእንተ፡ ኵሉ፡ ዘይበልዕ፡ አቡየ፡ ወያሠምሮ፡ ወባሕቱ፡ እፈርህ፡ አነ፡ እሞ፡ ከመ፡ ኢይለቡ፡ ቃልየ፡ ወኢይፍቅድ፡ ይግሥሠኒ።

⁸ ወአንቲ፡ ታአምሪ፡ ከመ፡ አነ፡ ልሙጽ፡ ወዔሳው፡ እኁየ፡ ጸጓር፡ ወእከውን፡ ቅድመ፡ አዕይንቲሁ፡ ከመ፡ ዘያስተአኪ፡ ወእገብር፡ ግብረ፡ ዘኢአዘዘኒ፡ ወይትመዐዐኒ፡ ወአመጽእ፡ ላዕሌየ፡ መርገመ፡ ወአኮ፡ በረከተ።

⁹ ወትቤሎ፡ ርብቃ፡ እሙ፡ ላዕሌየ፡ መርገምከ፡ ኦወልድየ፡ ዳእሙ፡ ስማዕ፡ ቃልየ።

¹⁰ ወሰምዐ፡ ያዕቆብ፡ ቃለ፡ ርብቃ፡ እሙ።

¹¹ ወነሥአት፡ ርብቃ፡ አልባሰ፡ ወልዳ፡ ዔሳው፡ ዘይልህቅ፡ ዘይትፈተው፡ ዘሀሎ፡ ኀቤሃ፡ ውስተ፡ ቤታ፡ ወአልበሰቶ፡ ለያዕቆብ፡ ወልዳ፡ ዘይንእስ።

¹² ወወሀበቶ፡ ተብሲለ፡ ወኅብስተ፡ ዘገብረት፡ ውስተ፡ እደ፡ ያዕቆብ፡ ወልዳ።

¹³ ወቦአ፡ ኀበ፡ አቡሁ፡ ወይቤ፡ አነ፡ ወልድከ፡ ገበርኩ፡ በከመ፡ ትቤለኒ፡ ተንሥእ፡ ወንበር፡ ወብልዕ፡ እምዘ፡ አሥገርኩ፡ አባ፡ ከመ፡ ትባርከኒ፡ ነፍስከ።

¹⁴ ወይቤሎ፡ ይስሐቅ፡ ለወልዱ፡ ምንተ፡ ከመዝ፡ ዘአፍጠንከ፡ ረኪበ፡ ወልድየ።

¹⁵ ወይቤ፡ ያዕቆብ፡ ዘአርከበኒ፡ አምላክከ፡ ቅድሜየ።

¹⁶ ወይቤሎ፡ ይስሐቅ፡ ቅረብ፡ ወእግሥሥከ፡ ወልድየ፡ እመ፡ አንተ፡ ወልድየ፡ ዔሳው፡ ወእመ፡ ኢኮነሁ።

¹⁷ ወቀርበ፡ ያዕቆብ፡ ኀበ፡ ይስሐቅ፡ አቡሁ፡ ወገሰሶ፡ ወይቤ።

¹⁸ ቃል፡ ቃለ፡ ያዕቆብ፡ ወእደው፡ እደወ፡ ዔሳው፡ ወኢያእመሮ፡ እስመ፡ ሚጠት፡ ውእቱ፡ እምሰማይ፡ ለአኅልፎ፡ መንፈሱ፡ ወኢያእመረ፡ ይስሐቅ፡ እስመ፡ እደዊሁ፡ ከመ፡ እደወ፡ ዔሳው፡ ጸጓር፡ ከመ፡ ይባርኮ።

¹⁹ ወይቤ፡ አንተሁ፡ ወልድየ፡ ዔሳው፡ ወይቤ፡ አነ፡ ወልድከ፡ ወይቤ፡ አቅርብ፡ ሊተ፡ ወእብላዕ፡ እምዘ፡ አሥግርከ፡ ወልድየ፡ ከመ፡ ትባርከ፡ ነፍስየ።

²⁰ ወአቅረበ፡ ሎቱ፡ ወበልዐ፡ ሎቱ፡ ወይነ፡ ወሰትየ።

²¹ ወይቤሎ፡ ይስሐቅ፡ አቡሁ፡ ቅረብ፡ ወሰዐመኒ፡ ወልድየ።

²² ወአጼነወ፡ ጼና፡ ወዐዛ፡ አልባሲሁ፡ ወባረኮ፡ ወይቤ፡ ናሁ፡ ጼና፡ ወልድየ፡ ከመ፡ ጼና፡ ገዳም፡ ዘባረኮ፡ እግዚአብሔር።

²³ ወየሀብከ፡ እግዚአብሔር፡ ወያብዝኅከ፡ እምጠለ፡ ሰማይ፡ ወእምጠለ፡ ምድር፡ ወብዝኀ፡ ስርናይ፡ ወቅብእ፡ ያብዝኅ፡ ለከ።

²⁴ ኩን፡ እግዚአ፡ ለአኀዊከ፡ ወይስግዱ፡ ለከ፡ ውሉደ፡ እምከ፡ ወኵሎን፡ በረከት፡ ዘባረከኒ፡ እግዚአብሔር፡ ወባረኮ፡ ለአብርሃም፡ አቡየ፡ ይኩና፡ ለከ፡ ወለዘርእከ፡ እስከ፡ ለዓለም፡ ዘይረግመከ፡ ርጉም፡ ወዘይባርከከ፡ ቡሩክ።

²⁵ ወኮነ፡ እምድኅረ፡ አኅለቀ፡ እንዘ፡ ይባርኮ፡ ይስሐቅ፡ ለወልዱ፡ ያዕቆብ፡ ወኮነ፡ እምድኅረ፡ ወፅአ፡ ወፂኦ፡ ያዕቆብ፡ እምይስሐቅ፡ አቡሁ፡ ተኀብአ።

²⁶ ወገብረ፡ ውእቱሂ፡ መብልዐ፡ ወአብአ፡ ለአቡሁ።

²⁷ ወይቤሎ፡ ይስሐቅ፡ አቡሁ፡ መኑ፡ አንተ፡ ወይቤሎ፡ አነ፡ በኵርከ፡ ዔሳው፡ ወልድከ፡ ገበርኩ፡ በከመ፡ አዘዝከኒ።

²⁸ ወተደመ፡ ይስሐቅ፡ ድማመ፡ ዐቢየ፡ ጥቀ፡ ወይቤ፡ መኑ፡ ውእቱ፡ ዝንቱ፡ ዘነዐወ፡ ወአሥገረ፡ ሊተ፡ ወአምጽአ፡ ወበለዕኩ፡ እምኵሉ፡ እንበለ፡ ትምጻእ፡ ወባረክዎ፡ ቡሩከ፡ ይኩን፡ ወኵሉ፡ ዘርኡ፡ እስከ፡ ለዓለም።

²⁹ ወኮነ፡ ሶበ፡ ሰምዐ፡ ዔሳው፡ ነገረ፡ አቡሁ፡ ይስሐቅ፡ ጸርኀ፡ በቃል፡ ዐቢይ፡ ወመራር፡ ጥቀ፡ ወይቤሎ፡ ለአቡሁ፡ ባርከኒ፡ ኪያየኒ፡ አባ።

³⁰ ወይቤሎ፡ መጽአ፡ እኁከ፡ በሕብል፡ ወነሥአ፡ በረከታቲከ።

³¹ ወይቤ፡ ኢያትረፍከኑ፡ ሊተ፡ በረከተ፡ አባ።

³² ወይቤ፡ ዔሳው፡ ለይስሐቅ፡ አቡሁ፡ አሐቲኑ፡ ክመ፡ በረከትከ፡ እንቲአከሰ፡ አባ፡ ባርከኒ፡ ኪያየኒ፡ አባ፡ ወአንሥአ፡ ዔሳው፡ ቃሎ፡ ወበክየ።

³⁴ ወበመጥባሕትከ፡ ተሐዩ፡ ወለእኁከ፡ ትትቀነይ።

³⁵ ወይትሜአከ፡ ዔሳው፡ ያዕቆብሃ፡ በእንተ፡ በረከት፡ እንተ፡ ባረኮ፡ አቡሁ፡ ወይቤ፡ በልቡ፡ ይእዜኒ፡ ይበጽሕ፡ መዋዕለ፡ ላሐ፡ አቡየ፡ ወእቀትሎ፡ ለያዕቆብ፡ እኁየ።