Jubilees 27

The Ethiopic Bible (Ge'ez)

¹ ወተናግራ፡ ለርብቃ፡ በሕልም፡ ነገሮ፡ ለዔሳው፡ ወልዳ፡ ዘይልህቅ።

² ናሁ፡ ዔሳው፡ እኁከ፡ ይትቄየመከ፡ ከመ፡ ይቅትልከ።

³ ወይእዜኒ፡ ወልድየ፡ ስማዕ፡ ቃልየ፡ ተንሥእ፡ ወጕየይ፡ ኀበ፡ ላባ፡ እኁየ፡ ከራንሃ፡ ወንበር፡ ምስሌሁ፡ ኀዳጠ፡ መዋዕለ፡ እስከ፡ ይትመየጥ፡ መዐተ፡ እኁከ፡ ወየኀድግ፡ መዐቶ፡ እምኔከ፡ ወይረስዕ፡ ኵሎ፡ ዘመጠነ፡ ረሰይኮ፡ ወፈነውየ፡ እትቄበለከ፡ እምህየ።

⁴ ወይቤ፡ ያዕቆብ፡ ኢይፈርህ፡ እመ፡ ፈቀደ፡ ይቅትለኒ፡ እቀትሎ።

⁵ ወትቤሎ፡ ከመ፡ ኢይምክን፡ እምክልኤቱ፡ ውሉድየ፡ በአሐቲ፡ ዕለት።

⁶ ወይቤላ፡ ያዕቆብ፡ ለርብቃ፡ እሙ፡ ናሁ፡ ታአምሪ፡ ከመ፡ ረስአ፡ አቡየ፡ ወእሬኢ፡ እስመ፡ ከብዳ፡ አዕይንቲሁ፡ ወእመኒ፡ ኀደግዎ፡ እኩይ፡ ውእቱ፡ በቅድመ፡ አዕይንቲሁ፡ እስመ፡ አኀድጎ፡ ወአሐውር፡ እምኔክሙ።

⁷ ወትቤሎ፡ ርብቃ፡ ለያዕቆብ፡ አነ፡ እበውእ፡ ወእነግሮ፡ ወይፌንወከ።

⁸ ወቦአት፡ ርብቃ፡ ወትቤሎ፡ ለይስሐቅ፡ ግእዝኩ፡ ሕይወትየ፡ እምክልኤሆን፡ አዋልደ፡ ኬጥ፡ እለ፡ ነሥአ፡ ዔሳው፡ ሎቱ፡ አንስትያ።

⁹ ወጸውዐ፡ ይስሐቅ፡ ያዕቆብሃ፡ ወልዶ፡ ወባረኮ፡ ወገሠጾ፡ ወይቤሎ።

¹⁰ ኢትንሣእ፡ ለከ፡ ብእሲተ፡ እምኵሉ፡ አዋልደ፡ ከናአን፡ ተንሥእ፡ ሖር፡ መስጴጦምያ፡ ቤቶ፡ ለባቱኤል፡ አቡሃ፡ ለእምከ፡ ወንሣእ፡ ለከ፡ እምህየ፡ ብእሲተ፡ እምአዋልደ፡ ላባ፡ እኁሃ፡ ለእምከ።

¹¹ ወአምላከ፡ ሰዳይ፡ ይባርከ፡ ያልህቀ፡ ወያብዝኅከ፡ ወኩን፡ መክብበ፡ አሕዛብ፡ ወየሀብከ፡ በረከታቲሁ፡ ለአቡየ፡ አብርሃም፡ ለከ፡ ወለዘርእከ፡ እምድኅሬከ፡ ከመ፡ ትረስ፡ ምድረ፡ ፍልሰትከ፡ ወኵላ፡ ምድረ፡ እንተ፡ ወሀቦ፡ እግዚአብሔር፡ ለአብርሃም፡ ሖር፡ ወልድየ፡ በሰላም።

¹² ወፈነዎ፡ ይስሐቅ፡ ለያዕቆብ፡ ወሖረ፡ መስጴጦምያ፡ ኀበ፡ ላባ፡ ኀበ፡ ወልደ፡ ባቱኤል፡ ሶርያዊ፡ እኁሃ፡ ለርብቃ፡ እሙ፡ ለያዕቆብ።

¹³ ወኮነ፡ እምድኅረ፡ ተንሥአ፡ ያዕቆብ፡ ለሐዊረ፡ መስጴጦምያ፡ ወሐዘነ፡ መንፈሳ፡ ለርብቃ፡ ድኅረ፡ ወልዳ፡ ወትበኪ።

¹⁴ ወይቤላ፡ ይስሐቅ፡ ለርብቃ፡ እኅትየ፡ ኢትብኪዪ፡ በእንተ፡ ወልድየ፡ እስመ፡ በሰላም፡ የሐውር፡ ወበሰላም፡ ይትመየጥ።

¹⁵ አምላክ፡ ልዑል፡ የዐቅቦ፡ እምኵሉ፡ እኩይ፡ ወይሄሉ፡ ምስሌሁ።

¹⁶ እስመ፡ እጤይቅ፡ ከመ፡ ይሤራሕ፡ ፍናዊሁ፡ በኵሉ፡ ኀበ፡ ሖረ፡ እስከ፡ አመ፡ ይገብእ፡ በሰላም፡ ኀቤነ፡ ወንሬእዮ፡ በሰላም።

¹⁷ ኢትፍርሂ፡ በእንቲአሁ፡ እኅትየ፡ እስመ፡ ራትዕ፡ በፍኖቱ፡ ውእቱ፡ ወፍጹም፡ ውእቱ፡ ብእሲ፡ ምእመን፡ ውእቱ፡ ወኢይትገደፍ፡ ኢትብክዪ።

¹⁸ ወይናዝዛ፡ ይስሐቅ፡ ለርብቃ፡ በእንተ፡ ያዕቆብ፡ ወልዳ፡ ወባረኮ።

¹⁹ ወወፅአ፡ ያዕቆብ፡ እምዐዘቅተ፡ መሐላ፡ ከመ፡ ይሖር፡ ካራንሃ፡ በዓመት፡ ቀዳሚ፡ ዘሱባዔ፡ ካልእ፡ ዘአርብዓ፡ ወአርባዕቱ፡ ኢዮቤሌዉ፡ ወበጽሐ፡ ወስተ፡ ሉዛ፡ እንተ፡ ውስተ፡ ደብር፡ እንተ፡ ይእቲ፡ ቤቴል፡ በሠርቀ፡ ወርኅ፡ ዘቀዳሚ፡ ዘዝ፡ ሱባዔ፡ ወበጽሐ፡ መካነ፡ መሲዮ፡ ወተግሕሠ፡ እምፍኖተ፡ ዐረቢሃ፡ ለመንገድ፡ በዛቲ፡ ሌሊት፡ ወኖመ፡ ህየ፡ እስመ፡ ዐረበ፡ ፀሐይ።

²⁰ ወነሥአ፡ እምአእባነ፡ ውእቱ፡ መካን፡ ወአንበሮ፡ ታሕተ፡ ውእቱ፡ ዕፅ፡ ወውእቱ፡ ባሕቲቱ፡ የሐውር።

²¹ ወሐለመ፡ በይእቲ፡ ሌሊት፡ ወናሁ፡ መዓርግ፡ ትክልት፡ ውስተ፡ ምድር፡ ወርእሳ፡ ትለክፍ፡ ውስተ፡ ሰማይ።

²² ወተናገረ፡ ምስለ፡ ያዕቆብ፡ ወይቤ፡ አነ፡ ውእቱ፡ አምላከ፡ አብርሃም፡ አቡከ፡ ወአምላከ፡ ይስሐቅ፡ ምድር፡ እንተ፡ ዲቤሃ፡ ትነውም፡ አንተ፡ ለከ፡ እሁባ፡ ወለዘርእከ፡ እምድኅሬከ።

²³ ወይከውን፡ ዘርእከ፡ ከመ፡ ኆጻ፡ ምድር፡ ወትበዝኅ፡ ውስተ፡ ባሕር፡ ወጽባሕ፡ ወሰሜን፡ ወደቡብ።

²⁴ ወነየ፡ አነ፡ እሄሉ፡ ምስሌከ፡ ወአዐቅበከ፡ በኵለሄ፡ ወእደ፡ ሖርከ፡ ወአገብአከ፡ ውስተ፡ ዛምድር፡ በሰላም፡ እስመ፡ ኢየኀድገከ፡ እስከ፡ ሶበ፡ እገብር፡ ኵሎ፡ ዘእቤለከ።

²⁵ ወኖመ፡ ያዕቆብ፡ ንዋመ፡ ወይቤ፡ አማን፡ ቤቱ፡ ለእግዚአብሔር፡ ዝመካን፡ ወአነ፡ ኢያእመርኩ፡ ወፈርሀ፡ ወይቤ፡ ግሩም፡ ዝንቱ፡ መካን፡ ዘኢኮነ፡ ምንተኒ፡ ዘእንበለ፡ ቤተ፡ እግዚአብሔር፡ ወዛቲ፡ አንቀጸ፡ ሰማይ።

²⁶ ወገዪሶ፡ ያዕቆብ፡ ነግሀ፡ ነሥአ፡ እብነ፡ ዘአንበረ፡ ዲበ፡ ርእሱ፡ ወአቀሞ፡ ሐውልተ፡ ለትእምርት፡ ወከዐወ፡ ቅብአ፡ ዲበ፡ ርእሱ፡ ወሰመየ፡ ስሞ፡ ለውእቱ፡ መካን፡ ቤቴል፡ ወቀዲሙሰ፡ ባሕቱ፡ ሉዛ፡ ስመ፡ ብሔሩ።

²⁷ ወጸለየ፡ ያዕቆብ፡ ጸሎተ፡ ለእግዚአብሔር፡ እንዘ፡ ይብል፡ እመ፡ ሀሎ፡ እግዚአብሔር፡ ምስሌየ፡ ወዐቀበኒ፡ በዛቲ፡ ፍኖት፡ እንተ፡ ባቲ፡ አሐውር፡ አነ፡ ወወሀበኒ፡ ኅብስተ፡ እብላዕ፡ ወልብሰ፡ እልብስ፡ ወእትመየጥ፡ ቤተ፡ አቡየ፡ በሰላም፡ ወይከውነኒ፡ እግዚአብሔር፡ አምላክ።