Jubilees 40

The Ethiopic Bible (Ge'ez)

¹ ወበውእቱ፡ መዋዕል፡ ሐለመ፡ ፈርዖን፡ ሕልመ፡ ክልኤተ፡ በአሐቲ፡ ሌሊት፡ በእንተ፡ ነገረ፡ ዐባር፡ ዘይከውን፡ ዲበ፡ ኵሉ፡ ምድር፡ ወነቅሀ፡ እምንዋሙ፡ ወጸውዖሙ፡ ለኵሎሙ፡ መፈክራነ፡ ሕልም፡ እለ፡ ውስተ፡ ግብጽ፡ ወረቀይት፡ ወነገሮሙ፡ ክልኤሆሙ፡ ሕልሞ፡ ወኢክህሉ፡ አእምሮ።

² ወእምዝ፡ ተዘከሮ፡ ለዮሴፍ፡ ሊቀ፡ መዘርት፡ ወነገረ፡ በእንቲአሁ፡ ለንጉሥ፡ ወአውፅእዎ፡ እምነ፡ ቤተ፡ ሞቅሕ፡ ወነገረ፡ በቅድሜሁ፡ ክልኤሆሙ፡ ሕለሚሁ።

³ ወይቤ፡ በቅድሜሁ፡ ለፈርዖን፡ ከመ፡ ክልኤሆሙ፡ ሕለሚሁ፡ አሐዱ፡ እሙንቱ።

⁴ ወይእዜኒ፡ ይሥራዕ፡ ፈርዖን፡ ውስተ፡ ኵሉ፡ ምድረ፡ ግብጽ፡ ከያደ፡ ወይዝግቡ፡ ሲሲተ፡ ለሀገር፡ ውስተ፡ ሀገር፡ በመዋዕለ፡ ዓመታት፡ ዘጽጋብ፡ ወይከውን፡ ሲሲተ፡ ለሰብዐቱ፡ ዓመታተ፡ ዐባር፡ ወኢትትሐጐል፡ ምድር፡ እምቅድመ፡ ገጸ፡ ዐባር፡ እስመ፡ ኀያል፡ ይከውን፡ ጥቀ።

⁵ ወወሀቦ፡ እግዚአብሔር፡ ለዮሴፍ፡ ሞገሰ፡ ወምሕረተ፡ በቅድመ፡ አዕይንቲሁ፡ ለፈርዖን፡ ወይቤ፡ ፈርዖን፡ ለላእካኒሁ፡ ኢንረክብ፡ ብእሴ፡ ጠቢበ፡ ወማእምረ፡ ዘከመዝ፡ ብእሲ፡ እስመ፡ መንፈሰ፡ እግዚአብሔር፡ ምስሌሁ።

⁶ ወሤሞ፡ ዳግመ፡ ውስተ፡ ኵሉ፡ መንግሥቱ፡ ወአኰነኖ፡ ውስተ፡ ኵሉ፡ ግብጽ፡ ወአጽዐኖ፡ ዲበ፡ ሰረገላሁ፡ ካዕብ፡ ዘፈርዖን።

⁷ ወአልበሶ፡ ልብሰ፡ ቢሶስ፡ ወአዕነቆ፡ ባዝግና፡ ወርቅ፡ ውስተ፡ ክሳዱ።

⁸ ወመበለ፡ ዮሴፍ፡ ውስተ፡ ኵሉ፡ ምድረ፡ ግብጽ፡ ወአፍቅርዎ፡ ኵሎሙ፡ መኳንንቲሁ፡ ለፈርዖን፡ ወኵሎሙ፡ ላእካኒሁ፡ ወኵሎሙ፡ እለ፡ ይገብሩ፡ ግብረ፡ ንጉሥ።

⁹ ወተሰናአወት፡ ምድረ፡ ግብድ፡ በቅድሜሁ፡ ለፈርዖን፡ በእንተ፡ ዮሴፍ፡ እስመ፡ እግዚአብሔር፡ ምስሌሁ፡ ወወሀቦ፡ ሞገሰ፡ ወምሕረተ፡ ላዕለ፡ ኵሎሙ፡ ዘመዱ፡ በቅድመ፡ ኵሎሙ፡ እለ፡ ያአምርዎ፡ ወለእለ፡ ይሰምዑ፡ ስምዐ፡ ምስሌሁ፡ ወረትዐት፡ መንግሥተ፡ ፈርዖን፡ ወአልቦ፡ ሰይጣነ፡ ወአልቦ፡ እኩየ።

¹⁰ ወጸውዐ፡ ንጉሥ፡ ስሞ፡ ለዮሴፍ፡ ስፋንጢፋንስ።

¹¹ ወበዕለተ፡ ቆመ፡ ዮሴፍ፡ ኀበ፡ ፈርዖን፡ ወልደ፡ ሠላሳ፡ ክረምት፡ አመ፡ ቆመ፡ ቅድመ፡ ፈርዖን።

¹² ወበውእቱ፡ ዓመት፡ ሞተ፡ ይስሐቅ፡ ወበጽሐ፡ በከመ፡ ነገረ፡ ዮሴፍ፡ በእንተ፡ ፍካሬ፡ ክልኤቱ፡ ሕልሙ፡ ዘከመ፡ ነገሮ፡ ወኮነ፡ ሰብዐቱ፡ ክረምት፡ ዘጽጋብ፡ ውስተ፡ ኵሉ፡ ምድረ፡ ግብጽ፡ ወፈርየት፡ ምድረ፡ ብዙኀ፡ አሐቲ፡ መስፈርት፡ ዐሠርተ፡ ወሰማኒተ፡ ምእተ፡ መሳፍረ።

¹³ ወአስተጋብአ፡ ዮሴፍ፡ ሲሲተ፡ ለሀገር፡ ውስተ፡ ሀገር፡ እስከ፡ መልአ፡ ሥርናይ፡ እስከ፡ ሶበ፡ ይስእኑ፡ ኆልቆቶ፡ ወሰፊረ፡ እምነ፡ ብዝኁ።