Jubilees 41

The Ethiopic Bible (Ge'ez)

¹ ወበአርብ፡ ወኀምስቱ፡ ኢዮቤልዉ፡ ወዳግም፡ ሱባዔ፡ በዓመት፡ ካልእ፡ ነሥአ፡ ይሁዳ፡ ለዔር፡ በኵሩ፡ ብእሲተ፡ እምነ፡ አዋልደ፡ አራም፡ ወስማ፡ ትዕማር።

² ወጸልአ፡ ወኢሰከበ፡ ምስሌሃ፡ እስመ፡ እምአዋልደ፡ ከናአን፡ እሙ፡ ወፈቀደ፡ ይንሣእ፡ ሎቱ፡ ብእሲተ፡ እምነገደ፡ እሙ፡ ወኢአብሖ፡ ይሁዳ፡ አቡሁ።

³ ወውእቱ፡ ዔር፡ በኵሩ፡ ለይሁዳ፡ እኩይ፡ ወቀተሎ፡ እግዚአብሔር።

⁴ ወይቤ፡ ይሁዳ፡ ለአውናን፡ እኁሁ፡ ባእ፡ ኀበ፡ ብእሲተ፡ እኁሁ፡ ወረስያ፡ ኑዕልተ፡ ወአንሥእ፡ ዘርአ፡ ለእኁከ።

⁵ ወአእመረ፡ አውናን፡ ከመ፡ ኢኮነ፡ ዘዚአሁ፡ ዘርእ፡ ክመ፡ ዘእኁሁ።

⁶ ወይቤ፡ ይሁዳ፡ ለትዕማር፡ መርዓቱ፡ ንበሪ፡ ቤተ፡ አቡኪ፡ እንዘ፡ ትመዐስቢ፡ እስከ፡ አመ፡ ይልህቅ፡ ሴሎም፡ ወልድየ፡ ወእሁበኪ፡ ሎቱ፡ ብእሲተ።

⁷ ወልህቀ፡ ወኢኀደገት፡ ቤድሱኤል፡ ብእሲተ፡ ይሁዳ፡ ሴሎምሃ፡ ወልዳ፡ ከመ፡ ያውስብ።

⁸ ወበሳድስ፡ ዓመቱ፡ ዐርገ፡ ይሁዳ፡ ይቅርጽ፡ አባግዒሁ፡ በቴምናታ።

⁹ ወአንበረት፡ አልባሰ፡ ምዕስብናሃ፡ ወለብሰት፡ ግልባቤ፡ ወተሠነየት፡ ወነበረት፡ ውስተ፡ አንቀጽ፡ እንተ፡ መንገለ፡ ፍኖተ፡ ቴምናታ።

¹⁰ ወእንዘ፡ የሐውር፡ ይሁዳ፡ ረከባ፡ ወተሐዘባ፡ ከመ፡ ዘማዊት፡ ወይቤላ፡ እባእ፡ ኀቤኪ፡ ወትቤሎ፡ ባእ፡ ወቦአ።

¹¹ ወትቤሎ፡ ሀበኒ፡ ደነስየ፡ ወይቤላ፡ አልብየ፡ ውስተ፡ እዴየ፡ ዘእንበለ፡ ሕልቀት፡ ዘአጽባዕትየ፡ ወድጕልማየ፡ ወበትርየ፡ ዘውስተ፡ እዴየ።

¹² ወትቤሎ፡ ሀበኒ፡ ኪያሆሙ፡ እስከ፡ ሶበ፡ ትፌኑ፡ ሊተ፡ ደነስየ።

¹³ ወሖረ፡ ይሁዳ፡ ውስተ፡ አባግዒሁ፡ ወይእቲኒ፡ ሖረት፡ ቤተ፡ አቡሃ።

¹⁴ ወፈነወ፡ ይሁዳ፡ መሕስአ፡ በእደ፡ ኖላዊሁ፡ አዶላማዊ፡ ወኀጥአ፡ ወተስእሎሙ፡ ለሰብአ፡ ብሔር፡ እንዘ፡ ይብል፡ አይቴ፡ ሀለወት፡ ዘማዊት፡ እንተ፡ ዝየ፡ ወይቤልዎ፡ አልቦ፡ ዝየስ፡ ዘማዊት፡ ወአልብነ፡ ኀቤነ፡ ዘማዊተ።

¹⁵ ወገብአ፡ ወአይድዖ፡ ከመ፡ ኀጥአ፡ ወይቤሎ፡ ተስእልኩ፡ ሰብአ፡ ብሔርኒ፡ ወይቤሉኒ፡ አልቦ፡ ዝየስ፡ ዘማዊተ።

¹⁶ ወእንዘ፡ አእከለት፡ ሠለስተ፡ አውራኀ፡ ተዐውቀት፡ ከመ፡ ፀንሰት፡ ይእቲ።

¹⁷ ወሖረ፡ ይሁዳ፡ ቤተ፡ አቡሃ፡ ወይቤሎሙ፡ ለአቡሃ፡ ወለአኀዊሃ፡ አውፅእዋ፡ ወያውዕይዋ፡ እስመ፡ ገብረት፡ ርኵሰ፡ በውስተ፡ እስራኤል።

¹⁸ ወኮነ፡ ሶበ፡ አውፅእዋ፡ ከመ፡ ያውዕይዋ፡ ፈነወት፡ ለሐሙሃ፡ ሕልቀተ፡ ወድጕልማ፡ ወበትረ፡ ወትቤ፡ አእምርአ፡ ዘመኑአ፡ ዝንቱአ፡ እስመአ፡ ሎቱአ፡ ፀነስኩአ።

¹⁹ ወአእመረ፡ ይሁዳ፡ ወይቤ፡ ጸድቀት፡ ትዕማር፡ እምኔየ፡ ወኢያውዕይዋ፡ እንከ።

²⁰ ወበእንተዝ፡ ኢተውህበት፡ ለሴሎም፡ ወኢደገመ፡ እንከ፡ ቀሪቦታ።

²¹ ወእምዝ፡ ፀንሰት፡ ወወለደት፡ ክልኤተ፡ ደቀ፡ ፋሬስሃ፡ ወዛራሃ፡ በዓመት፡ ሳብዕ፡ ዘዝንቱ፡ ሱባዔ፡ ዘዳግም።

²² ወእምዝ፡ ተፈጸመ፡ ሰብዐቱ፡ ዓመት፡ ዘሰምር፡ ዘይቤሎ፡ ዮሴፍ፡ ለፈርዖን።

²³ ወአእመረ፡ ይሁዳ፡ ከመ፡ እኩይ፡ ግብር፡ ዘገብረ፡ እስመ፡ ሰከበ፡ ምስለ፡ መርዓቱ፡ ወአስተሐሠመ፡ በቅድመ፡ አዕይንቲሁ፡ ወአእመረ፡ ከመ፡ አበሰ፡ ወስሕተ፡ እስመ፡ ከሠተ፡ ክድነተ፡ ወልዱ፡ ወአኀዘ፡ ይላሑ፡ ወይትመሐለል፡ ቅድመ፡ እግዚአብሔር፡ በእንተ፡ አበሳሁ።

²⁴ ወነገርናሁ፡ በሕልም፡ ከመ፡ ይሰረይ፡ ሎቱ፡ እስመ፡ ተማሕለለ፡ ጥቀ፡ ወእስመ፡ ላሐወ፡ ወኢገብረ፡ እንከ።

²⁵ ወኮነ፡ ሎቱ፡ ስርየት፡ እስመ፡ ተመይጠ፡ እምኀጢአቱ፡ ወእምኢያእምሮቱ፡ እስመ፡ ዐቢይ፡ አበሳ፡ አምላክነ።

²⁶ ወአንተኒ፡ አዝዞሙ፡ ለውሉደ፡ እስራኤል፡ ወኢይኩን፡ ርኵስ፡ በማእከሎሙ፡ እስመ፡ ኵሉ፡ ዘይሰክብ፡ ምስለ፡ መርዓቱ፡ ወምስለ፡ ሐማቱ፡ ርኵሰ፡ ገብረ፡ በእሳት፡ ያውዕዩ፡ ብእሴ፡ ዘሰከበ፡ ምስሌሃ፡ ወብእሲተኒ፡ ወየኀድግ፡ መዓተ፡ ወመቅሠፍተ፡ እምእስራኤል።

²⁷ ወለይሁዳኒ፡ ነገርናሁ፡ ከመ፡ ኢሰከቡ፡ ምስሌሃ፡ ክልኤሆሙ፡ ደቂቁ።

²⁸ እስመ፡ በየውሀተ፡ አዕይንቲሁ፡ ሖረ፡ ወኀሠሠ፡ ኵነኔ፡ እስመ፡ እምፍትሐ፡ አብርሃም፡ ዘአዘዞሙ፡ ለውሉዱ፡ ፈቀደ፡ ይሁዳ፡ ያውዕያ፡ በእሳት።