Jubilees 42

The Ethiopic Bible (Ge'ez)

¹ ወበቀዳሚ፡ ዓመት፡ ዘሱባዔ፡ ሣልስ፡ ዘአርብዓ፡ ወኀምስቱ፡ ኢዮቤልው፡ አኀዘ፡ ዐባር፡ ይምጻእ፡ ውስተ፡ ምድር፡ ወአበየ፡ ዝናም፡ ተውህቦ፡ ለምድር፡ እስመ፡ አልቦ፡ ምንተኒ፡ ዘይወርድ።

² ወዐብረት፡ ምድር።

³ ወመጽኡ፡ ግብጽ፡ ኀበ፡ ዮሴፍ፡ ከመ፡ የሀቦሙ፡ ሲሲተ፡ ወከሠተ፡ መዛግብተ፡ ኀበ፡ ሀሎ፡ ሥርናይ፡ ዘቀዳሚ፡ ዓመት፡ ወሤጠ፡ ለአሕዛበ፡ ምድር፡ በወርቅ።

⁴ ወሰምዐ፡ ያዕቆብ፡ ከመ፡ ቦቱ፡ ሲሲተ፡ ውስተ፡ ግብጽ፡ ወፈነወ፡ ዐሠርተ፡ ደቆ፡ ከመ፡ ይንሥኡ፡ ሎቱ፡ ሲሲተ፡ በግብጽ፡ ወብንያምሃሰ፡ ኢፈነወ።

⁵ ወአእመሮ፡ ዮሴፍ፡ ወእሙንቱሰ፡ ኢያእመርዎ።

⁶ ወእምዝ፡ ፈትሖሙ፡ ወአቀመ፡ ስምዖንሃ፡ ባሕቲቶ፡ ወተስዐተ፡ አኀዊሁ፡ ፈነወ።

⁷ ወመልአ፡ አሕስሊሆሙ፡ ሥርናየ፡ ወወርቆሙሂ፡ ወደየ፡ ሎሙ፡ ውስተ፡ አሕስሊሆሙ፡ ወኢያእመሩ።

⁸ ወአዘዞሙ፡ ከመ፡ ያምጽኡ፡ እኅዋሆሙ፡ ዘይንእስ፡ እስመ፡ ነገርዎ፡ ከመ፡ ሀሎ፡ አቡሆሙ፡ ሕያው፡ ወእኁሆሙ፡ ዘይንእስ።

⁹ ወዐርጉ፡ እምድረ፡ ግብጽ፡ ወበጽሑ፡ ምድረ፡ ከናአን፡ ወነገሩ፡ ለአቡሆሙ፡ ኵሎ፡ ዘከመ፡ ረከቦሙ፡ ወእፎ፡ ተናገረ፡ ምስሌሆሙ፡ መኰንነ፡ ብሔር፡ ዐጸብጺበ፡ ወአኀዞ፡ ለስምዖን፡ እስከ፡ ሶበ፡ ያመጽእዎ፡ ለብንያም።

¹⁰ ወይቤ፡ ያዕቆብ፡ አምከንክሙኒኬ፡ ወዮሴፍኒ፡ ኢሀሎ፡ ወስምዖንሂ፡ ኢሀሎ፡ ወብንያምሃኒ፡ ትነሥእዎ፡ ላዕሌየኬ፡ ኮነ፡ እከይክሙ።

¹¹ ወይቤ፡ ኢየሐውር፡ ወልድየ፡ ምስሌክሙ፡ እመቦ፡ ከመ፡ ደወየ።

¹² እስመ፡ ርእየ፡ ከመ፡ ገብአ፡ ወርቆሙ፡ ኵሉ፡ በዕቈሪሁ፡ ወበዝ፡ ፈርሀ፡ ፈንዎቶ።

¹³ ወዐባርኒ፡ በዝኀ፡ ወኀየለ፡ በምድረ፡ ከናአን፡ ወበኵሉ፡ ምድር፡ ዘእንበለ፡ ምድረ፡ ግብጽ።

¹⁴ ወተሴሰይዎ፡ ሰብአ፡ ግብጽ፡ በቀዳሚ፡ ዓመት፡ ዘዐባር።

¹⁵ ወሶበ፡ ርእየ፡ እስራኤል፡ ከመ፡ ኀየለ፡ ጥቀ፡ ዐባር፡ ውስተ፡ ምድር፡ ወአልቦ፡ ድኂነ፡ ወይቤ፡ ለውሉዱ፡ ሖሩ፡ ግብኡ፡ ወንሥኡ፡ ለነ፡ ሲሲተ፡ ኢንሙት።

¹⁶ ወይቤሉ፡ ኢነሐውር፡ እመ፡ ኢመጽአ፡ እኁነ፡ ዘይንእስ፡ ምስሌነ፡ ኢነሐውር።

¹⁷ ወርእየ፡ እስራኤል፡ ከመ፡ እመ፡ ኢፈነዎ፡ ምስሌሆሙ፡ ይትሐጐሉ፡ ኵሎሙ፡ እምቅድመ፡ ዐባር።

¹⁸ ወይቤ፡ ሮቤል፡ ሀበንዮ፡ ውስተ፡ እዴየ፡ ወለእመ፡ ኢያግባእክዎ፡ ለከ፡ ቅትል፡ ክልኤተ፡ ውሉድየ፡ ህየንተ፡ ነፍሰ፡ ዚአሁ።

¹⁹ ወቀርበ፡ ይሁዳ፡ ወይቤ፡ ፈንዎ፡ ምስሌነ፡ ወለእመ፡ ኢያግባእክዎ፡ ለከ፡ እቡሰ፡ እኩን፡ በቅድሜከ፡ ኵሎ፡ መዋዕለ፡ ሕይወትየ።

²⁰ ወፈነዎ፡ ምስሌሆሙ፡ በካልእ፡ ዓመት፡ ዘዝ፡ ሱባዔ፡ በሠርቀ፡ ወርኅ፡ ወበጽሑ፡ ብሔረ፡ ግብጽ፡ ምስለ፡ ኵሎሙ፡ እለ፡ የሐውሩ፡ ወአምኃሆሙ፡ ውስተ፡ እደዊሆሙ፡ ማየ፡ ልብን፡ ወከርካዕ፡ ወጤሬቤንቶስ፡ ወጸቃውዐ፡ መዓር።

²¹ ወበጽሑ፡ ወቆሙ፡ ቅድመ፡ ዮሴፍ፡ ወርእየ፡ ብንያምሃ፡ እኅዋሁ፡ ወአእመሮ፡ ወይቤሎሙ፡ ዝኑ፡ እኁክሙ፡ ዘይንእስ፡ ወይቤልዎ፡ ውእቱ።

²² ወፈነዎ፡ ውስተ፡ ቤቱ፡ ወስምዖንሃኒ፡ አውጽአ፡ ሎሙ።

²³ ወበልዑ፡ በቅድሜሁ፡ ወወሀቦሙ፡ ክፍለ፡ ለኵሎሙ፡ ወበዝኀ፡ መክፈልተ፡ ብንያም፡ እመክፈልተ፡ ኵሎሙ፡ ትስብዕተ።

²⁴ ወበልዑ፡ ወሰትዩ፡ ወተንሥኡ፡ ወኀደሩ፡ ኀበ፡ አእዱጊሆሙ።

²⁵ ወኀለየ፡ ዮሴፍ፡ ኅሊና፡ በዘ፡ ያአምር፡ ኅሊናሆሙ፡ እመቦ፡ ኅሊና፡ ሰላም፡ በበይናቲሆሙ።