Jubilees 43

The Ethiopic Bible (Ge'ez)

¹ ወገብረ፡ በከመ፡ ይቤሎ፡ ዮሴፍ፡ ወመልአ፡ ሎሙ፡ አሕስሊሆሙ፡ ኵሎ፡ ሲሲተ፡ ወወርቆሙኒ፡ ወደየ፡ ውስተ፡ አሕስሊሆሙ፡ ወኮራ፡ ወደየ፡ ውስተ፡ ሐስለ፡ ብንያም።

² ወነግሀ፡ በጽባሕ፡ ሖሩ፡ ወኮነ፡ ሶበ፡ ወፅኡ፡ እምህየ፡ ይቤሎ፡ ዮሴፍ፡ ለብእሴ፡ ቤቱ፡ ዴግኖሙ፡ ሩጽ፡ ወተጋአዞሙ፡ እንዘ፡ ትብል፡ ህየንተ፡ ሠናይት፡ ዐሰይክሙኒ፡ እኩየ፡ ሰረቅሙኒ፡ ጽዋዐ፡ ብሩር፡ በዘይሰቲ፡ እግዚእየ፡ ወአግብኦ፡ ሊተ፡ ለእኁሆሙ፡ ዘይንእስ፡ ወፍጡነ፡ አምጽኦ፡ ዘእንበለ፡ እፃእ፡ ውስተ፡ ምኵናንየ።

³ ወሮጸ፡ ድኅሬሆሙ።

⁴ ወይቤልዎ፡ ሐሰ፡ ሎሙ፡ ለአግብርቲከ፡ ኢይገብሩ፡ ዘንተሰ፡ ነገረ፡ ወኢይሰርቁ፡ እምቤተ፡ እግዚእከ፡ ምንተኒ፡ ንዋየ።

⁵ እፎ፡ እንከ፡ ንሰርቅ፡ ምንተኒ፡ ንዋየ።

⁶ ወይቤሎሙ፡ አኮ፡ ከማሁ፡ በኀበ፡ ብእሲ፡ ዘረከብክዎ፡ ባሕቲቶ፡ እነሥእ፡ ገብረ፡ ወአንትሙሰ፡ ተአትዉ፡ በሰላም፡ ቤተክሙ።

⁷ ወእንዘ፡ ይፈትን፡ ውስተ፡ ንዋዮሙ፡ እምዘ፡ ይልህቅ፡ ቀደመ፡ ወፈጸመ፡ በኀበ፡ ዘይንእስ፡ ወተረክበ፡ ውስተ፡ ሐስለ፡ ብንያም።

⁸ ወሠጠጡ፡ አልባሲሆሙ፡ ወጸዐኑ፡ ዲበ፡ አእዱጊሆሙ፡ ወተመይጡ፡ ሀገረ፡ ወበጽሑ፡ ቤቶ፡ ለዮሴፍ፡ ወሰገዱ፡ ሎቱ፡ ኵሎሙ፡ በገጾሙ፡ ውስተ፡ ምድር።

⁹ ወይቤሎሙ፡ ዮሴፍ፡ እኩየ፡ ገበርክሙ፡ ወይቤሉ፡ ምንተ፡ ንበል፡ ወምንተ፡ ንትዋቀሥ፡ እግዚእነ፡ ረከበ፡ አበሳሆሙ፡ ለአግብርቲሁ፡ ነየነ፡ ንሕነ፡ አግብርቱ፡ ለእግዚእነ፡ ወአእዱጊነሂ።

¹⁰ ወይቤሎሙ፡ ዮሴፍ፡ እግዚአብሔር፡ አንሰ፡ እፈርህ፡ አንትሙሰ፡ ሖሩ፡ አብያቲክሙ፡ ወእኁክሙ፡ ከመ፡ ይኩን፡ ቅኑየ፡ እስመ፡ እኩየ፡ ገበርክሙ፡ ኢታአምሩኑ፡ ከመ፡ ያስተአድም፡ ብእሲ፡ ጽዋዖ፡ በከመ፡ አነ፡ በዝ፡ ጽዋዕ፡ ወኪያሁ፡ ሰረቅሙኒ።

¹¹ ወይቤ፡ ይሁዳ፡ ላዕሌየ፡ እግዚኦ፡ እትናገር፡ ገብርከ፡ ቃለ፡ ውስተ፡ እዝነ፡ እግዚእየ።

¹² ወይከውን፡ እምከመ፡ ሖርነ፡ ኀበ፡ ገብርከ፡ አቡነ፡ ወእምከመ፡ ኢሀሎ፡ ምስሌነ፡ ወሬዛ፡ ይመውት፡ ወንቀጽዕ፡ አባነ፡ በሐዘን፡ እስከ፡ ለመዊት።

¹³ ወእገብር፡ አነ፡ ባሕቱ፡ ገብርከ፡ ህየንቴሁ፡ ለሕፃን፡ ገብረ፡ ለእግዚእየ።

¹⁴ ወርእየ፡ ዮሴፍ፡ ከመ፡ ልበ፡ ኵሎሙ፡ ዕሩይ፡ ብእሲ፡ ምስለ፡ ካልኡ፡ ለሠናይ፡ ወስእነ፡ ተዐግሦ፡ ወነገሮሙ፡ ከመ፡ ውእቱ፡ ዮሴፍ።

¹⁵ ወተናገረ፡ ምስሌሆሙ፡ በከመ፡ ልሳነ፡ ዕብራይስጥ።

¹⁶ ወይቤሎሙ፡ ኢትብክዩ፡ ላዕሌየ፡ አፍጥኑ፡ ወአምጽእዎ፡ ለአቡየ፡ ኀቤየ፡ ወእርአዮ፡ ዘእንበለ፡ እሙት፡ ወአዕይንቲሁኒ፡ ለእኁየ፡ ብንያም፡ እንዘ፡ ይሬእያ።

¹⁷ እስመ፡ ናሁ፡ ዝንቱ፡ ካልእ፡ ዓም፡ ዘዐባር፡ ወዓዲ፡ ኀምስቱ፡ ዓመት፡ ሀሎ፡ ወአልቦ፡ ማእረረ፡ ወአልቦ፡ ፍሬ፡ ዕፅ፡ ወአልቦ፡ ሐሪሰ።

¹⁸ ፍጡነ፡ ረዱ፡ አንትሙ፡ ወአብያቲክሙ፡ ወኢትትሐጐሉ፡ በዐባር፡ ወኢትተክዙ፡ በእንተ፡ ጥሪትክሙ፡ እስመ፡ ለሠሪዕ፡ አቅደመ፡ ፈንዎትየ፡ እግዚአብሔር፡ ቅድሜክሙ፡ ከመ፡ ይሕየዉ፡ ሕዝብ፡ ብዙኃን።

¹⁹ ወዜንውዎ፡ ለአቡየ፡ ከመ፡ ዓዲ፡ ሕያው፡ አነ፡ ወአንትሙኒ፡ ናሁ፡ ትሬእዩ፡ ከመ፡ ሠርዐኒ፡ እግዚአብሔር፡ ከመ፡ እንተ፡ አቡሁ፡ ለፈርዖን፡ ወከመ፡ እመብል፡ ውስተ፡ ቤቱ፡ ወዲበ፡ ኵሉ፡ ምድረ፡ ግብጽ።

²⁰ ወዜንውዎ፡ ለአቡየ፡ ኵሎ፡ ክብርየ፡ ወኵሎ፡ ዘመጠነ፡ ወሀበኒ፡ እግዚአብሔር፡ ብዕለ፡ ወክብረ።

²¹ ወወሀቦሙ፡ በቃለ፡ አፈ፡ ፈርዖን፡ ሰረገላተ፡ ወሥንቀ፡ ለፍኖት፡ ወወሀቦሙ፡ ለኵሎሙ፡ አልባሰ፡ ሕብር፡ ወብሩረ።

²² ወለአቡሆሙኒ፡ ፈነወ፡ አልባሰ፡ ወብሩረ፡ ወዐሠርተ፡ አእዱገ፡ ዘይወስዱ፡ ስርናየ፡ ወፈነዎሙ።

²³ ወዐርጉ፡ ወዜነዉ፡ ለአቡሆሙ።

²⁴ ወኢአምነ፡ አቡሆሙ፡ እስመ፡ ደንገፀ፡ በኅሊናሁ።