Jubilees 44

The Ethiopic Bible (Ge'ez)

¹ ወተንሥአ፡ እስራኤል፡ እምካራን፡ እምቤቱ፡ በሠርቀ፡ ሣልስ፡ ወርኅ፡ ወሖረ፡ እንተ፡ ፍኖተ፡ ዐዘቅተ፡ መሐላ፡ ወሦዐ፡ መሥዋዕተ፡ ለአምላከ፡ አቡሁ፡ ይስሐቅ፡ አመ፡ ሰቡዑ፡ ለዝ፡ ወርኅ።

² ወተዘከረ፡ ያዕቆብ፡ ሕልመ፡ ዘርእየ፡ በቤቴል፡ ወፈርሀ፡ ወሪደ፡ ውስተ፡ ግብጽ።

³ ወእንዘ፡ ይኄሊ፡ ይልአክ፡ ለዮሴፍ፡ ከመ፡ ይምጻእ፡ ኀቤሁ፡ ወኢይረድ፡ ውእቱ።

⁴ ወገብረ፡ በዓለ፡ ማእረር፡ ቀዳሜ፡ ፍሬ፡ ስርናይ፡ እምስርናይ፡ ብሉይ፡ እስመ፡ አልቦ፡ ውስተ፡ ኵሉ፡ ምድረ፡ ከናአን፡ ምልአ፡ እድ፡ ምንተሂ፡ ዘርአ፡ ውስተ፡ ምድር፡ እስመ፡ ዐባር፡ ውእቱ፡ ኮነ፡ ለኵሉ፡ አራዊት፡ ወለእንስሳ፡ ወለአዕዋፍ፡ ወለሰብእኒ።

⁵ ወአመ፡ ዐሡሩ፡ ወሰዱሱ፡ አስተርአዮ፡ እግዚአብሔር፡ ወይቤሎ፡ ያዕቆብ፡ ያዕቆብ፡ ወይቤ፡ ነየ፡ አነ።

⁶ አነ፡ እወርድ፡ ምስሌከ፡ ወአነ፡ እወስደከ፡ ወበዛቲ፡ ምድር፡ ትትቀበር፡ ወዮሴፍ፡ ያነብር፡ እዴሁ፡ ዲበ፡ አዕይንቲከ፡ ኢትፍራህ፡ ረድ፡ ውስተ፡ ግብጽ።

⁷ ወተንሥኡ፡ ውሉዱ፡ ወውሉደ፡ ውሉዱ፡ ወአጽዐኑ፡ አባሆሙ፡ ወንዋዮሙ፡ ዲበ፡ ሰረገላት።

⁸ ወተንሥአ፡ እስራኤል፡ እምዐዘቅተ፡ መሐላ፡ አመ፡ ዐሡር፡ ወሰዱስ፡ ዕለት፡ ዘዝ፡ ወርኅ፡ ሣልስ፡ ወሖረ፡ ብሔረ፡ ግብጽ።

⁹ ወፈነወ፡ እስራኤል፡ ቅድሜሁ፡ ኀበ፡ ዮሴፍ፡ ወልዶ፡ ይሁዳሃ፡ ከመ፡ ያስተሐይጽ፡ ምድረ፡ ጌሤም፡ እስመ፡ ህየ፡ ይቤሎሙ፡ ዮሴፍ፡ ለአኀዊሁ፡ ይምጽኡ፡ ከመ፡ ይኅድሩ፡ ህየ፡ ከመ፡ ይኩኑ፡ ቅሩባነ፡ ዚአሁ።

¹⁰ ወይእቲኒ፡ ሠናይት፡ በምድረ፡ ግብጽ፡ ወቅርብት፡ ኀቤሁ፡ ለኵሉ፡ ወለእለሂ፡ እንስሳ።

¹¹ ወዝ፡ አስማቲሆሙ፡ ለውሉደ፡ ያዕቆብ፡ እለ፡ ሖሩ፡ ውስተ፡ ግብጽ፡ ምስለ፡ ያዕቆብ፡ አቡሆሙ።

¹² ሮቤል፡ በኵሩ፡ ለእስራኤል፡ ወዝ፡ አስማቲሆሙ፡ ለውሉዱ፡ ኤኖክ፡ ወፋሉስ፡ ወኤስሮም፡ ወከራሚ፡ ኀምስቱ።

¹³ ስምዖን፡ ወውሉዱ፡ ወዝ፡ አስማቲሆሙ፡ ለውሉዱ፡ ኢያሙኤል፡ ወኢያሚን፡ ወአዎት፡ ወኢያኪም፡ ወሳአር፡ ወሳውል፡ ወልዳ፡ ለፍኒሰወት፡ ሰብዓቱ።

¹⁴ ሌዊ፡ ወውሉዱ፡ ወዝ፡ አስማቲሆሙ፡ ለውሉዱ፡ ጌድሶን፡ ወቃዓድ፡ ወሚራሪ፡ አርባዕቱ።

¹⁵ ይሁዳ፡ ወውሉዱ፡ ወዝ፡ አስማቲሆሙ፡ ለውሉዱ፡ ሴሎም፡ ወፋሬስ፡ ወዛራ፡ አርባዕቱ።

¹⁶ ይሳኮር፡ ወውሉዱ፡ ወዝ፡ አስማቲሆሙ፡ ለውሉዱ፡ ቶላ፡ ወፉአ፡ ወኢያሱብ፡ ወሳምሮም፡ ኀምስቱ።

¹⁷ ዛብሎን፡ ወውሉዱ፡ ወዝ፡ አስማቲሆሙ፡ ለውሉዱ፡ ሳአር፡ ወኤሎን፡ ወኢያሊኤል፡ አርባዕቱ።

¹⁸ ወእሉ፡ ውሉደ፡ ያዕቆብ፡ ወውሉዶሙ፡ እለ፡ ወለደት፡ ልያ፡ ለያዕቆብ፡ በመስጴጦምያ፡ ስድስቱ፡ ወአሐቲ፡ ዲና፡ እኅቶሙ።

¹⁹ ወውሉደ፡ ዘለፋ፡ ለአኪታ፡ ለልያ፡ ብእሲተ፡ ያዕቆብ፡ ዘወለደት፡ ለያዕቆብ፡ ጋድሃ፡ ወአሴርሃ።

²⁰ ወዝ፡ አስማተ፡ ውሉዶሙ፡ እለ፡ ቦኡ፡ ምስሌሁ፡ ውስተ፡ ግብጽ፡ ውሉደ፡ ጋድ፡ ሴፍዮን፡ ወአጋቲ፡ ወሱኒ፡ ወአሲቦን፡ [ወዔዲስ]፡ ወአሪሊ፡ ወአሩዲ፡ ሰማኒቱ።

²¹ ወውሉደ፡ አሴር፡ ኢዮምና፡ ወይሱአ፡ [ወይኡኤል]፡ ወቤርያ፡ ወሳራ፡ እኅቶሙ፡ አሐቲ፡ ኀምስቱ።

²² ኵሉ፡ ነፍስ፡ ዐሠርቱ፡ ወአርባዕቱ፡ ወኮነ፡ ኵሉ፡ ዘልያ፡ አርባዓ፡ ወአርባዕቱ።

²³ ወውሉደ፡ ራሔል፡ ዘብእሲተ፡ ያዕቆብ፡ ዮሴፍ፡ ወብንያም።

²⁴ ወተወልዱ፡ ለዮሴፍ፡ በግብጽ፡ ዘእንበለ፡ ይባእ፡ አቡሁ፡ ውስተ፡ ግብጽ፡ ዘወለደት፡ ሎቱ፡ አስኔት፡ ወለተ፡ ፉጢራዕ፡ ሣውዕ፡ ዘኢሊዮጳሊስ፡ ምነሴሃ፡ ወኤፍሬምሃ።

²⁵ ወውሉደ፡ ብንያም፡ ባላ፡ ወባኮር፡ ወአስቢል፡ ጉአድ፡ ወንኤማን፡ ወአብዮድ፡ ወራኤ፡ ወሰናኒም፡ ወአፊም፡ ወጋአም፡ ዐሠርቱ፡ ወአሐዱ።

²⁶ ወኮነ፡ ኵሉ፡ ነፍስ፡ ዘራሔል፡ ዐሠርቱ፡ ወአርባዕቱ።

²⁷ ወውሉደ፡ ባላ፡ ለአኪታ፡ ለራሔል፡ ብእሲቱ፡ ለያዕቆብ፡ ዘወለደት፡ ለያዕቆብ፡ ዳንሃ፡ ወንፍታሌም።

²⁸ ወዝ፡ አስማተ፡ ውሉዶሙ፡ እለ፡ ቦኡ፡ ምስሌሆሙ፡ ውስተ፡ ግብጽ፡ ውሉደ፡ ዳን፡ ኩሲም፡ ወሳሞን፡ ወአሱዲ፡ ወኢያከ፡ ወሰሎሞን፡ ስድስቱ።

²⁹ ወሞቱ፡ በግብጽ፡ በዓመተ፡ ቦኡ፡ ወተረፎ፡ ለዳን፡ ኩሲም፡ ባሕቲቱ።

³⁰ ወዝ፡ አስማቲሆሙ፡ ለውሉደ፡ ንፍታሌም፡ ኢያሲኤል፡ ወጋሂኒ፡ ወአሰአር፡ ወሰሉም፡ ወኤው።

³¹ ወሞተ፡ ኤው፡ በግብጽ፡ ዘተወልደ፡ እምድኅረ፡ ዓመተ፡ ዐባር።

³² ወኮኑ፡ ኵሎሙ፡ ዘራሔል፡ ዕሥራ፡ ወስድስቱ።

³³ ወኵሉ፡ መንፈስ፡ ዘያዕቆብ፡ ዘቦአ፡ ውስተ፡ ግብጽ፡ ሰብዓ፡ መንፈስ።

³⁴ ወበምድረ፡ ከናአን፡ ሞትዎ፡ ለይሁዳ፡ ክልኤቱ፡ ደቁ፡ ኤር፡ ወኣውናን፡ ወአልቦሙ፡ ውሉደ፡ ወቀበርዎሙ፡ ደቂቀ፡ እስራኤል፡ ለእለ፡ ተሐጕሉ፡ ወተሠይሙ፡ ውስተ፡ ሰብዓ፡ ሕዝብ።