Jubilees 45

The Ethiopic Bible (Ge'ez)

¹ ወቦአ፡ እስራኤል፡ ውስተ፡ ብሔረ፡ ግብጽ፡ ውስተ፡ ምድረ፡ ጌሤም፡ አመ፡ ሠርቀ፡ ወርኅ፡ ራብዕ፡ በካልእ፡ ዓመት፡ ዘሱባዔ፡ ሣልስ፡ ዘአርብዓ፡ ወኀምስቱ፡ ኢዮቤልው።

² ወመጽአ፡ ዮሴፍ፡ ይትቀበል፡ አባሁ፡ ያዕቆብሃ፡ ውስተ፡ ምድረ፡ ጌሤም፡ ወሐቀፈ፡ ክሳደ፡ አቡሁ፡ ወበከየ።

³ ወይቤሎ፡ እስራኤል፡ ለዮሴፍ፡ እሙት፡ ይእዜሰ፡ እምዘ፡ ርኢኩከ፡ ወይእዜኒ፡ ይትባረክ፡ እግዚአብሔር፡ አምላከ፡ እስራኤል፡ ወአምላከ፡ አብርሃም፡ ወአምላከ፡ ይስሐቅ፡ ዘኢከልአ፡ ምሕረቶ፡ ወሣህሎ፡ እምገብሩ፡ ያዕቆብ።

⁴ ዐቢይ፡ ሊተ፡ ዘርኢኩ፡ ገጸከ፡ እንዘ፡ ሕያው፡ አነ፡ እስመ፡ አማን፡ ህልው፡ ራእይ፡ ዘርኢኩ፡ በቤቴል፡ ይትባረክ፡ እግዚአብሔር፡ አምላኪየ፡ ለዓለመ፡ ዓለም፡ ወቡሩክ፡ ስሙ።

⁵ ወበልዑ፡ ዮሴፍ፡ ወአኀዊሁ፡ በቅድመ፡ አቡሆሙ፡ ኅብስተ፡ ወሰትዩ፡ ወይነ፡ ወተፈሥሐ፡ ያዕቆብ፡ ፍሥሓ፡ ዐቢየ፡ ጥቀ።

⁶ ወወሀቦ፡ ዮሴፍ፡ ለአቡሁ፡ ወለአኀዊሁ፡ ሀብተ፡ ከመ፡ ይኅድሩ፡ ምድረ፡ ጌሤም፡ ወውስተ፡ ራሜሲኖ፡ ወኵሎ፡ አድያሚሃ፡ ሎሙ፡ ዘይኴንኑ፡ በቅድሜሁ፡ ለፈርዖን።

⁷ ወሴሰዮሙ፡ ዮሴፍ፡ ለአቡሁ፡ ወለአኀዊሁ፡ ወጥሪቶሙሂ፡ ኀባውዘ፡ በከመ፡ የአክሎሙ፡ ለሰብዐቱ፡ ዓመታተ፡ ዐባር።

⁸ ወሐመት፡ ምድረ፡ ግብጽ፡ እምቅድመ፡ ገጸ፡ ዐባር።

⁹ ወተፈጸመ፡ ዓመታተ፡ ዐባር።

¹⁰ እስመ፡ በሰብዓቱ፡ ዓመታተ፡ ዐባር።

¹¹ ወውእቱ፡ ዓመት፡ ቀዳሚ፡ ዘሱባዔ፡ ራብዕ፡ ዘአርብዓ፡ ወኀምስቱ፡ ኢዮቤሌው።

¹² ወነሥአ፡ ዮሴፍ፡ እምእክል፡ ዘዘርኡ፡ ኀምስቶ፡ ለንጉሥ፡ ወራብዕተ፡ እደ፡ ኀደገ፡ ሎሙ፡ ለሲሲት፡ ወለዘርእ፡ ወረሰዮ፡ ዮሴፍ፡ ሥርዐተ፡ ለምድረ፡ ግብጽ፡ እስከ፡ ዛቲ፡ ዕለት።

¹³ ወሐይወ፡ እስራኤል፡ በምድረ፡ ግብጽ፡ ዐሠርተ፡ ወሰብዓተ፡ ዓመተ።

¹⁴ ወባረኮሙ፡ እስራኤል፡ ለውሉዱ፡ ዘእንበለ፡ ይሙት፡ ወነገሮሙ፡ ኵሎ፡ ዘኮነ፡ ይረክቦሙ፡ በምድረ፡ ግብጽ፡ ወበደኃሪ፡ መዋዕል፡ ዘከመ፡ ይመጽእ፡ ላዕሌሆሙ፡ አይድዖሙ፡ ወባረኮሙ።

¹⁵ ወኖመ፡ ምስለ፡ አበዊሁ፡ ወተቀብረ፡ ውስተ፡ በአት፡ ዘካዕበት፡ በምድረ፡ ከናአን፡ ቅሩበ፡ አብርሃም፡ አቡሁ፡ ውስተ፡ መቃብር፡ ዘከረየ፡ ለርእሱ፡ ውስተ፡ በአተ፡ ካዕበት፡ በምድረ፡ ኬብሮን።

¹⁶ ወወሀቦ፡ ኵሎ፡ መጻሕፍቲሁ፡ ወመጻሕፍተ፡ አበዊሁ፡ ለሌዊ፡ ወልዱ፡ ከመ፡ ይዕቀቦን፡ ወከመ፡ የሐድሶን፡ ለውሉዱ፡ እስከ፡ ዛቲ፡ ዕለት።