Jubilees 46

The Ethiopic Bible (Ge'ez)

¹ ወኮነ፡ እምድኅረ፡ ሞተ፡ ያዕቆብ፡ በዝኁ፡ ውሉደ፡ እስራኤል፡ በምድረ፡ ግብጽ፡ ወኮኑ፡ ሕዝበ፡ ብዙኀ፡ ወኮኑ፡ ኵሎሙ፡ ዕሩያነ፡ በልቦሙ፡ ከመ፡ ያፍቅር፡ እኅው፡ እኅዋሁ፡ ወከመ፡ ይትራዳእ፡ ብእሲ፡ ምስለ፡ እኁሁ፡ ወበዝኁ፡ ወፈድፋዱ፡ ጥቀ።

² ወአልቦ፡ ሰይጣነ፡ ወአልቦ፡ ምንተኒ፡ እኩየ፡ ኵሎ፡ መዋዕለ፡ ሕይወቱ፡ ለዮሴፍ፡ እለ፡ ሐይወ፡ እምድኅረ፡ አቡሁ፡ ያዕቆብ።

³ ወሞተ፡ ዮሴፍ፡ ወልደ፡ ምእት፡ ወዐሠርቱ፡ ዓመት፡ ወዐሠርተ፡ ወሰብዐተ፡ ዓመተ፡ ነበረ፡ ምድረ፡ ከናአን፡ ወዐሠርተ፡ ዓመተ፡ ነበረ፡ እንዘ፡ ይትቀነይ።

⁴ ወሞተ፡ ወኵሎሙ፡ አኀዊሁ፡ ወኵላ፡ ይእቲ፡ ትውልድ።

⁵ ወአዘዞሙ፡ ለውሉደ፡ እስራኤል፡ ዘእንበለ፡ ይሙት፡ ከመ፡ ይሰዱ፡ አዕጽምቲሁ፡ በመዋዕል፡ አመ፡ ይወፅኡ፡ እምድረ፡ ግብጽ።

⁶ ወአምሐሎሙ፡ በእንተ፡ አዕጽምቲሁ፡ እስመ፡ አእመረ፡ ከመ፡ ኢይደግሙ፡ ግብጽ፡ አውፅኦቶ፡ ወቀቢሮቶ፡ በዕለት፡ በምድረ፡ ከናአን።

⁷ ወስእነ፡ በዊአ፡ እስመ፡ ነግሠ፡ ካልእ፡ ሐዲስ፡ ንጉሥ፡ ለግብጽ፡ ወኀየለ፡ እምኔሁ፡ ወገብአ፡ ምድረ፡ ከናአን፡ ወተዐጽወ፡ አናቅጸ፡ ግብጽ፡ ወአልቦ፡ ዘይወፅእ፡ ወአልቦ፡ ዘይበውእ፡ ውስተ፡ ግብጽ።

⁸ ወሞተ፡ ዮሴፍ፡ በዘ፡ አርብዓ፡ ወስድስቱ፡ ኢዮቤልዉ፡ በሱባዔ፡ ሳድስ፡ በካልእ፡ ዓመቱ፡ ወቀበርዎ፡ ውስተ፡ ምድረ፡ ግብጽ፡ ወሞቱ፡ ኵሎሙ፡ አኀዊሁ፡ እምድኅሬሁ።

⁹ ወወፅአ፡ ንጉሠ፡ ግብጽ፡ ከመ፡ ይትቃተል፡ ምስለ፡ ንጉሠ፡ ከናአን፡ በዘ፡ አርብዓ፡ ወሰብዐቱ፡ ኢዮቤልዉ፡ በዳግም፡ ሱባዔ፡ በካልእ፡ ዓመቱ።

¹⁰ ወገብኡ፡ ብዙኃን፡ ውስተ፡ ግብጽ፡ ወኅዳጣን፡ ተርፉ፡ እምኔሆሙ፡ ውስተ፡ ደብረ፡ ኬብሮን፡ ወተረፈ፡ አብራም፡ አቡከ፡ ምስሌሆሙ።

¹¹ ወሞአ፡ ንጉሠ፡ ከናአን፡ ለንጉሠ፡ ግብጽ፡ ወዐጸወ፡ አናቅጸ፡ ግብጽ።

¹² ወኀለየ፡ ኅሊና፡ እኩየ፡ ላዕለ፡ ውሉደ፡ እስራኤል፡ ከመ፡ ያሕምሞሙ፡ ወይቤሎሙ፡ ለሰብአ፡ ግብጽ።

¹³ ናሁ፡ ሕዝበ፡ ውሉደ፡ እስራኤል፡ ልህቁ፡ ወበዝኁ፡ እምኔነ፡ ንዑ፡ ንጠበብ፡ ላዕሌሆሙ፡ ዘእንበለ፡ ይብዝኁ፡ ወናሕምሞሙ፡ በቅኔ፡ ዘእንበለ፡ ይምጽአነ፡ ቀትል፡ ወእሙንቱኒ፡ ዘእንበለ፡ ይፅብኡነ፡ ወእመ፡ አኮሰ፡ እሙንቱኒ፡ ይዴመሩ፡ ምስለ፡ ፀር፡ ወይወፅኡ፡ እምድርነ፡ እስመ፡ ልቦሙ፡ ወገጾሙ፡ ውስተ፡ ምድረ፡ ከናአን።

¹⁴ ወሠርዐ፡ ላዕሌሆሙ፡ ሊቃነ፡ ገባር፡ ከመ፡ ያሕምምዎሙ፡ በቅኔ።

¹⁵ ወይቀንይዎሙ፡ ግፉዐ፡ ወመጠነ፡ ያሐስሙ፡ ላዕሌሆሙ፡ ከማሁ፡ ይበዝኁ፡ ወከማሁ፡ ይፈደፍዱ።

¹⁶ ወያስተራኵስዎሙ፡ ሰብአ፡ ግብጽ፡ ለውሉደ፡ እስራኤል።