Jubilees 47

The Ethiopic Bible (Ge'ez)

¹ ወበሱባዔ፡ ሳብዕ፡ በሳብዕ፡ ዓመት፡ በዘ፡ አርብዓ፡ ወሰብዓቱ፡ ኢዩቤልዉ፡ መጽአ፡ አቡከ፡ እምድረ፡ ከናአን፡ ወተወለድከ፡ በራብዕ፡ ሱባዔ፡ በሳድስ፡ ዓመቱ፡ በዘ፡ አርብዓ፡ ወሰማኒቱ፡ ኢዮቤሌዎን፡ ዘውእቱ፡ መዋዕለ፡ ምንዳቤ፡ ላዕለ፡ ውሉደ፡ እስራኤል።

² ወአዘዘ፡ ንጉሠ፡ ግብጽ፡ ፈርዖን፡ ትእዛዘ፡ ላዕሌሆሙ፡ ከመ፡ ይግድፉ፡ ውሉዶሙ፡ ኵሎ፡ ሮሰ፡ ዘተወልደ፡ ውስተ፡ ፈለግ።

³ ወነበሩ፡ እንዘ፡ ይገድፉ፡ ሰብዐተ፡ ወርኀ፡ እስከ፡ አመ፡ ዕለተ፡ ተወለድከ።

⁴ ወገብረት፡ ለከ፡ ነፍቀ፡ ወለበጠታ፡ ፒሳ፡ ወአስፋሊጦ፡ ወአንበረቶ፡ ውስተ፡ ሣዕር፡ ኀበ፡ ድንጋገ፡ ፈለግ፡ ወአንበረተከ፡ ውስቴታ፡ ሰቡዐ፡ መዋዕለ።

⁵ ወበውእቱ፡ መዋዕል፡ ወፅአት፡ ተርሙት፡ ወለተ፡ ፈርዖን፡ ከመ፡ ትትኀፀብ፡ በውስተ፡ ፈለግ፡ ወሰምዐት፡ ቃለከ፡ እንዘ፡ ትበኪ፡ ወትቤ፡ ለዕብራዊያቲሃ፡ ከመ፡ ያምጽአከ፡ ወአምጽአከ፡ ኀቤሃ።

⁶ ወአውፅአተከ፡ እምነፍቅ፡ ወምሕረተከ።

⁷ ወትቤላ፡ እኅርከ፡ እሖርኑ፡ ወእጸውዕ፡ ለኪ፡ አሐተ፡ እምዕብራዊያት፡ እንተ፡ ተሐፅኖ፡ ወታጠብዎ፡ ለኪ፡ ለዝ፡ ሕፃን።

⁸ ወሖረት፡ ወጸውዐታ፡ ለእምከ፡ ለኢዮክቤት፡ ወወሀበታ፡ ዐስበ፡ ወሐፀነተከ።

⁹ ወእምዝ፡ ልሂቀከ፡ ወሰዱከ፡ ቤተ፡ ፈርዖን፡ ወኮንከ፡ ውሉዳ፡ ወመሀረከ፡ ዕብራን፡ አቡከ፡ መጽሐፈ፡ ወእምዘ፡ ፈጸምከ፡ ሠለስተ፡ ሱባዔ፡ አብአከ፡ ውስተ፡ ዐጸደ፡ መንግሥት።

¹⁰ ወሀለውከ፡ ውስተ፡ ዐጸድ፡ ሠለስተ፡ ሱባዔ፡ ዓመት፡ እስከ፡ መዋዕል፡ አመ፡ ወፃእከ፡ እምዐጸደ፡ መንግሥት።

¹¹ ወበሳኒታ፡ ዕለት፡ ረከብከ፡ ክልኤተ፡ እንዘ፡ ይትባአሱ፡ እምውሉደ፡ እስራኤል፡ ወትቤሎ፡ ለዘይትዔገል፡ ለምንት፡ ትዘብጥ፡ እኅዋከ።

¹² ወተምዕዐ፡ ወተቈጥዐ፡ ወይቤ፡ መኑ፡ ሤመከ፡ ላዕሌነ፡ መልአከ፡ ወመኰንነ፡ ትቅትለኒኑ፡ ትፈቅድ፡ በከመ፡ ቀተልኮ፡ ለግብጻዊ፡ ወፈራህከ፡ ወጐየይከ፡ እምቅድመ፡ ዝንቱ፡ ነገር።