Jubilees 48

The Ethiopic Bible (Ge'ez)

¹ ወበሳድስ፡ ዓመት፡ ዘሱባዔ፡ ሣልስ፡ ዘአርብዓ፡ ወተስዐቱ፡ ኢዮቤልዉሳት፡ ሖርከ፡ ወነበርከ፡ ህየ፡ ኀምስተ፡ ሱባዔ፡ ወዓመተ፡ አሐደ፡ ወገባእከ፡ ውስተ፡ ግብጽ፡ በሱባዔ፡ ዳግም፡ በዓመት፡ ካልእ፡ በውእቱ፡ ኀምሳ፡ ኢዮቤልው።

² ወአንተ፡ ተአምር፡ ዘተናገረ፡ ለከ፡ በደብረ፡ ሲና፡ ወምንተ፡ ፈቀደ፡ ይግበር፡ ምስሌከ፡ መኰንነ፡ መስቴማ፡ አመ፡ ትገብእ፡ ግብጽ፡ በፍኖት፡ በአላቴ፡ ምጽላል።

³ አኮሁ፡ በኵሉ፡ ኀይሉ፡ ፈቀደ፡ ይቅትልከ፡ ወያድኅኖሙ፡ ለግብጻዊያን፡ እምእዴከ፡ እስመ፡ ርእየከ፡ ከመ፡ ተፈነውከ፡ ትግበር፡ ኵነኔ፡ ወበቀለ፡ ላዕለ፡ ግብጻዊያን።

⁴ ወባላሕኩከ፡ እምእዴሁ።

⁵ ወገብረ፡ እግዚአብሔር፡ ላዕሌሆሙ፡ በቀለ፡ ዐቢየ፡ በእንተ፡ እስራኤል፡ ወመሐጾሙ፡ ወቀተሎሙ፡ በደም፡ ወበቈርነነዓት፡ ወበትንንያ፡ ወበጽንጽያ፡ ከልብ፡ ወበእኩይ፡ ቍስል፡ ዘውእቱ፡ ይፈልሕ፡ ዕንጰዕንጴ፡ ወእንስሳሆሙ፡ በሞት፡ ወበአእባነ፡ በረድ።

⁶ ወኵሉ፡ ተፈነወ፡ ወእዴከ፡ ከመ፡ ትግበር፡ ዘእንበለ፡ ይትገበር፡ ወሀለውከ፡ ትትናገሮ፡ ለንጉሠ፡ ግብጽ፡ ወበቅድመ፡ ኵሎሙ፡ ላእካኒሁ፡ ወበቅድመ፡ ሕዝቡ።

⁷ ወኵሉ፡ ኮነ፡ በቃልከ፡ ዐሥሩ፡ ኵነኔ፡ ዐቢያት፡ ወፀዋጋት፡ መጽአ፡ ውስተ፡ ምድረ፡ ግብድ፡ ከመ፡ ትግበር፡ ቦቱ፡ በቀለ፡ እስራኤል።

⁸ ወኵሎ፡ ገብረ፡ እግዚአብሔር፡ በእንተ፡ እስራኤል።

⁹ ወመኰንነ፡ መስቴማ፡ ይትቀወመከ፡ ቅድሜከ፡ ወይፈቅድ፡ ያውድቀ፡ ውስተ፡ እደ፡ ፈርዖን፡ ወይረድእ፡ ሥራያቲሆሙ፡ ለግብጽ፡ ወይትቃወሙ፡ ወይገብሩ፡ በቅድሜከ።

¹⁰ እከየሰኬ፡ ኀደግናሆሙ፡ ይግበሩ፡ ወፈውሰ፡ ኢናበውሖሙ፡ ከመ፡ ይትገበር፡ በእደዊሆሙ።

¹¹ መሐጾሙ፡ እግዚአብሔር፡ በቍስል፡ እኩይ፡ ወስእኑ፡ ተቃውሞ፡ እስመ፡ አሕጐልናሆሙ፡ እምገቢረ፡ ምንተሂ፡ አሐደ፡ ትእምርተ።

¹² ወበኵሉ፡ ተአምር፡ ወመንክር፡ ኢኀፈረ፡ መኰንነ፡ መስቴማ፡ እስከ፡ ሶበ፡ ኀየለ፡ ወጸርኀ፡ ሎሙ፡ ለግብጽ፡ ከመ፡ ይዴግኑ፡ ድኅሬከ፡ በኵሉ፡ ኀይሎሙ፡ ለግብጽ፡ በሰረገላቲሆሙ፡ ወአፍራሲሆሙ፡ ወበኵሉ፡ ብዝኆሙ፡ ለአሕዛበ፡ ግብጽ።

¹³ ወቆምኩ፡ ማእከሌከ፡ ወማእከሎሙ፡ ለግብጽ፡ ወማእከሎሙ፡ ለእስራኤል፡ ወባላሕናሆሙ፡ ለእስራኤል፡ እምእዴሁ፡ ወእምእደ፡ ሕዝብ።

¹⁴ ወኵሎሙ፡ ሕዝብ፡ ዘአውፅአ፡ ይዴግኑ፡ ድኅሬሆሙ፡ ለእስራኤል፡ ወወረዎሙ፡ እግዚአብሔር፡ አምላክነ፡ ማእከለ፡ ባሕር፡ ውስተ፡ መዓምቅቲሃ፡ ለቀላይ፡ በታሕቴሆሙ፡ ለውሉደ፡ እስራኤል፡ በከመ፡ ወረዉ፡ ውሉዶሙ፡ ሰብአ፡ ግብጽ፡ ውስተ፡ ፈለግ፡ ምእተ፡ እልፈ፡ ተበቀሎሙ።

¹⁵ ወአመ፡ ዐሡር፡ ወረቡዕ፡ ዕለት፡ ወአመ፡ ዐሡር፡ ወኀሙስ፡ ወአመ፡ ዐሡር፡ ወሰዱስ፡ ወአመ፡ ዐሡር፡ ወሰቡዕ፡ ወአመ፡ ዐሡር፡ ወሰሙን፡ ሀሎ፡ መኰንነ፡ መስቴማ፡ እሱር፡ ወዕፅው፡ እምድኅሬሆሙ፡ ለውሉደ፡ እስራኤል፡ ከመ፡ ኢያስተዋድዮሙ።

¹⁶ ወአመ፡ ዕለተ፡ ዐሡር፡ ወተሱዕ፡ ፈታሕናሆሙ፡ ከመ፡ ይርድእዎሙ፡ ለግብጽ፡ ወከመ፡ ይዴግኑ፡ ድኅሬሆሙ፡ ለውሉደ፡ እስራኤል።

¹⁷ ወአጽንዐ፡ አልባሲሆሙ፡ ወአኀየሎሙ፡ ወተኀየሉ፡ እምኀበ፡ እግዚአብሔር፡ አምላክነ፡ ከመ፡ ይምሐጾሙ፡ ለግብጽ፡ ወይወርዎሙ፡ ማእከለ፡ ባሕር።

¹⁸ ወአመ፡ ዐሡር፡ ወረቡዕ፡ ዕለት፡ አሰርናሁ፡ ከመ፡ ኢያስተዋድዮሙ፡ ለደቂቀ፡ እስራኤል፡ በዕለት፡ አመ፡ ሀለዉ፡ ይስእሉ፡ ንዋየ፡ ወአልባሰ፡ እምኀበ፡ ሰብአ፡ ግብጽ፡ ንዋየ፡ ብሩር፡ ወንዋየ፡ ወርቅ፡ ወንዋየ፡ ብርት፡ ወከመ፡ ይማህርክዎሙ፡ ለግብጽ፡ ህየንተ፡ ተቀንዩ፡ እንተ፡ ቀነይዎሙ፡ በግፍዕ።

¹⁹ ወኢያውፃእናሆሙ፡ ለውሉደ፡ እስራኤል፡ እምግብጽ፡ ዕራቆሙ።